ਨਵੀਂ ਦਿੱਲੀ- ਯੂ ਪੀ ਏ ਦੀ ਦੂਸਰੀ ਸਰਕਾਰ ਦੀ ਚੌਥੀ ਵਰ੍ਹੇਗੰਢ ਤੋ ਪਹਿਲਾਂ ਕਰਾਏ ਗਏ ਇੱਕ ਹੋਰ ਸਰਵੇ ਵਿੱਚ ਕਾਂਗਰਸ ਫੇਲ ਸਾਬਤ ਹੋ ਰਹੀ ਹੈ। ਇਸ ਦੇ ਮੁਤਾਬਕ ਜੇ ਹੁਣੇ ਚੋਣਾਂ ਹੋਣ ਤਾਂ ਭਾਜਪਾ ਸਭ ਤੋਂ ਵੱਡੀ ਪਾਰਟੀ ਦੇ ਰੂਪ ਵਿੱਚ ਉਭਰੇਗੀ। ਹੈਡਲਾਈਨਜ਼ ਟੂਡੇ-ਸੀ ਵੋਟਰ ਦੇ ਚੋਣ ਸਰਵੇਖਣ ਮੁਤਾਬਕ ਭਾਜਪਾ ਨੂੰ 137 ਸੀਟਾਂ ਮਿਲ ਸਕਦੀਆਂ ਹਨ, ਜਦ ਕਿ ਕਾਂਗਰਸ 116 ਸੀਟਾਂ ‘ਤੇ ਸੁੰਗੜ ਜਾਏਗੀ। ਜੇ ਭਾਜਪਾ ਨਰਿੰਦਰ ਮੋਦੀ ਨੂੰ ਪ੍ਰਧਾਨ ਮੰਤਰੀ ਦੇ ਅਹੁਦੇ ਦਾ ਉਮੀਦਵਾਰ ਬਣਾਵੇ ਤਾਂ ਪਾਰਟੀ ਦੀਆਂ ਸੀਟਾਂ 220 ਤੱਕ ਪਹੁੰਚ ਜਾਣਗੀਆਂ। ਦੇਸ਼ ਉੱਤੇ ਰਾਜ ਕਰਨ ਲਈ 545 ਮੈਂਬਰੀ ਲੋਕ ਸਭਾ ਚੋਣਾਂ ਵਿੱਚ ਬਹੁਮਤ ਲਈ 273 ਸੀਟਾਂ ਦੀ ਜ਼ਰੂਰਤ ਹੈ।

ਇਹ ਸਰਵੇਖਣ ਮਾਰਚ ਤੋਂ ਮਈ ਤੱਕ 540 ਲੋਕ ਸਭਾ ਖੇਤਰਾਂ ਦੇ ਕਰੀਬ 1.2 ਲੱਖ ਲੋਕਾਂ ‘ਤੇ ਕੀਤਾ ਗਿਆ ਦੱਸਿਆ ਗਿਆ ਹੈ। ਇਸ ਤੋਂ ਪਹਿਲਾਂ ਏ ਬੀ ਪੀ ਨਿਊਜ਼-ਨੀਲਸਨ ਦੇ ਸਰਵੇ ਵਿੱਚ ਕਿਹਾ ਗਿਆ ਸੀ ਕਿ ਹੁਣੇ ਚੋਣਾਂ ਹੋਣ ਤਾਂ ਯੂ ਪੀ ਏ ਕੁੱਲ 136 ਸੀਟਾਂ ਲੈ ਸਕੇਗੀ। ਪਿਛਲੀਆਂ ਚੋਣਾਂ ਵਿੱਚ ਉਸ ਨੂੰ 262 ਸੀਟਾਂ ‘ਤੇ ਜਿੱਤ ਮਿਲੀ ਸੀ। ਭਾਜਪਾ ਦਾ ਗਠਜੋੜ 206 ਸੀਟਾਂ ਜਿੱਤਣ ਵਿੱਚ ਸਫਲ ਰਹੇਗਾ। ਪਿਛਲੀ ਵਾਰ ਉਸ ਨੂੰ ਸਿਰਫ 158 ਸੀਟਾਂ ਮਿਲੀਆਂ ਸਨ। ਸਿਰਫ ਸੱਤ ਫੀਸਦੀ ਜਨਤਾ ਹੁਣ ਚਾਹੁੰਦੀ ਹੈ ਕਿ ਮਨਮੋਹਨ ਸਿੰਘ ਤੀਜੀ ਵਾਰ ਦੇਸ਼ ਦਾ ਪ੍ਰਧਾਨ ਮੰਤਰੀ ਬਣੇ। ਅਤੇ 48 ਫੀਸਦੀ ਲੋਕ ਨਰਿੰਦਰ ਮੋਦੀ ਨੂੰ ਪ੍ਰਧਾਨ ਮੰਤਰੀ ਦੀ ਕੁਰਸੀ ‘ਤੇ ਬੈਠਦਾ ਦੇਖਣਾ ਚਾਹੁੰਦੇ ਹਨ। ਕਾਂਗਰਸ ਦੇ ਉਪ ਪ੍ਰਧਾਨ ਰਾਹੁਲ ਗਾਂਧੀ ਨੂੰ 18 ਫੀਸਦੀ ਜਨਤਾ ਪ੍ਰਧਾਨ ਮੰਤਰੀ ਬਣਾਉਣਾ ਚਾਹੁੰਦੀ ਹੈ।