ਅੰਨਾ ਅੰਦੋਲਨ ਨੂੰ ਹਾਈਜੈਕ ਕਰ ਮੁੱਖ ਮੰਤਰੀ ਬਣੇ ਕੇਜਰੀਵਾਲ- ਰਾਮਦੇਵ

ਜਲੰਧਰ- ਕਾਂਗਰਸ ਤੋਂ ਸਮਰਥਨ ਲੈ ਕੇ ਸਰਕਾਰ ਬਣਾਉਣ ਲਈ ਅਰਵਿੰਦ ਕੇਜਰੀਵਾਲ ਦੀ ਆਲੋਚਨਾ ਕਰਦੇ ਹੋਏ ਯੋਗ ਗੁਰੂ ਬਾਬਾ ਰਾਮਦੇਵ ਨੇ ਅੱਜ ਇੱਥੇ ਕਿਹਾ ਕਿ 'ਅੰਨਾ ਦੇ ਅੰਦੋਲਨ ਨੂੰ ਹਾਈਜੈਕ' ਕਰ ਕੇ ਉਹ ਦਿੱਲੀ ਦੇ ਮੁੱਖ ਮੰਤਰੀ ਪਦ 'ਤੇ ਦੁਨੀਆ ਦੀ ਸਭ ਤੋਂ ਭ੍ਰਿਸ਼ਟ ਪਾਰਟੀ ਤੋਂ ਸਹਿਯੋਗ ਲੈ ਕੇ ਸੱਤਾ 'ਤੇ ਕਾਬਜ ਹੋ ਗਏ ਹਨ। ਜਲੰਧਰ 'ਚ ਭਾਰਤ ਸਵਾਭਿਮਾਨ ਰੰਗ ਮੰਚ ਦੇ ਇੱਕ ਪ੍ਰੋਗਰਾਮ 'ਚ ਹਿੱਸਾ ਲੈਣ ਆਏ ਯੋਗ ਗੁਰੂ ਨੇ ਅੱਜ ਇੱਥੇ ਚੁਟਕੀ ਲੈਂਦੇ ਹੋਏ ਪੱਤਰਕਾਰ ਸੰਮੇਲਨ 'ਚ ਕਿਹਾ ਕਿ ਕੇਜਰੀਵਾਲ ਆਪਣੇ ਇੱਛਤ (ਦਿੱਲੀ ਦੇ ਮੁੱਖ ਮੰਤਰੀ) ਪਦ 'ਤੇ ਪਹੁੰਚ ਗਏ ਹਨ। ਉਨ੍ਹਾਂ ਨੇ ਇਹ ਪਦ ਅੰਨਾ ਹਜ਼ਾਰੇ ਦੇ ਅੰਦੋਲਨ ਨੂੰ ਹਾਈਜੈਕ ਕਰ ਕੇ ਹਾਸਲ ਕੀਤਾ ਹੈ। ਭ੍ਰਿਸ਼ਟਾਚਾਰ ਦੇ ਮੁੱਦੇ 'ਤੇ ਕੀਤੇ ਗਏ ਅੰਨਾ ਦੇ ਅੰਦੋਲਨ ਦਾ ਇਸਤੇਮਾਲ ਕਰ ਕੇ ਉਹ ਸੱਤਾ ਤੱਕ ਪੁੱਜੇ ਹਨ।