ਢੀਂਡਸਾ ਦਾ ਕੁੜਮ ਸਮਗਲਰ- ਕਾਂਗਰਸੀਆਂ ਨੇ ਲਾਇਆ ਦੋਸ਼

ਨਾਮੀ ਸਮਗਲਰ ਕੰਵਰਜੀਤ ਸਿੰਘ ਪਹਿਲਵਾਨ ਦੀ ਬੇਟੀ ਨਾਲ ਵਿਆਹਿਆ ਹੈ ਸੁਖਦੇਵ ਸਿੰਘ ਢੀਂਡਸਾ ਦਾ ਬੇਟਾ ਪਰਮਿੰਦਰ ਢੀਂਡਸਾ!

ਅੰਮਿ੍ਤਸਰ- ਇਕ ਦਿਨ ਪਹਿਲਾਂ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਪ੍ਰਤਾਪ ਸਿੰਘ ਬਾਜਵਾ 'ਤੇ ਇਲਜ਼ਾਮ ਲਗਾਉਣ ਵਾਲੇ ਅਕਾਲੀ ਦਲ ਦੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਢੀਂਡਸਾ 'ਤੇ ਜਵਾਬੀ ਹਮਲਾ ਬੋਲਦਿਆਂ ਕਾਂਗਰਸ ਨੇ ਢੀਂਡਸਾ 'ਤੇ ਨਾਮੀ ਡਰੱਗ ਸਮਗਲਰ ਕੰਵਰਜੀਤ ਸਿੰਘ ਪਹਿਲਵਾਨ ਦਾ ਨਜ਼ਦੀਕੀ ਰਿਸ਼ਤੇਦਾਰ ਹੋਣ ਦਾ ਦੋਸ਼ ਲਗਾਇਆ ਹੈ, ਜਿਸਦੇ ਡੀ ਕੰਪਨੀ (ਦਾਊਦ) ਨਾਲ ਨਜ਼ਦੀਕੀ ਸਬੰਧ ਹਨ ਅਤੇ ਉਹ ਮੁੰਬਈ ਧਮਾਕਿਆਂ ਦਾ ਵੀ ਮਦਦਗਾਰ ਸੀ। 

ਇਥੇ ਜਾਰੀ ਇਕ ਬਿਆਨ 'ਚ ਕਾਂਗਰਸੀ ਆਗੂਆਂ ਸੁਰਿੰਦਰਪਾਲ ਸਿੰਘ ਸੀਬੀਆ ਮੀਤ ਪ੍ਰਧਾਨ ਪ੍ਰਦੇਸ਼ ਕਾਂਗਰਸ, ਰਮੇਸ਼ ਸਿੰਗਲਾ ਪ੍ਰਦੇਸ਼ ਜਨਰਲ ਸਕੱਤਰ ਤੇ ਪਰਮਜੀਤ ਸਿੰਘ ਰੰਧਾਵਾ ਪ੍ਰਦੇਸ਼ ਸਕੱਤਰ ਨੇ ਕਿਹਾ ਹੈ ਕਿ ਢੀਂਡਸਾ ਪਹਿਲਵਾਨ ਦਾ ਸਲਾਹਕਾਰ ਰਿਹਾ ਹੈ, ਜਿਹੜਾ ਉਸਦੇ ਬੇਟੇ ਵਿੱਤ ਮੰਤਰੀ ਪਰਮਿੰਦਰ ਸਿੰਘ ਢੀਂਡਸਾ ਦਾ ਸਹੁਰਾ ਹੈ। ਪਹਿਲਵਾਨ ਖੂੰਖਾਰ ਅਪਰਾਧੀ ਹੈ ਅਤੇ ਭਾਰਤ 'ਚ ਦਾਊਦ ਅਬ੍ਰਾਹਿਮ ਦਾ ਕੰਮ ਸੰਭਾਲਦਾ ਹੈ। ਉਸਨੇ ਮੁੰਬਈ ਧਮਾਕਿਆਂ 'ਚ ਵੀ ਮਦੱਦ ਕੀਤੀ ਸੀ ਅਤੇ ਪਾਕਿਸਤਾਨ ਵੱਲੋਂ ਭੇਜਿਆ ਗਿਆ ਸ਼ਿਪਮੈਂਟ ਉਸਨੇ ਪ੍ਰਾਪਤ ਕੀਤਾ ਸੀ। ਪਹਿਲਵਾਨ ਦਾ ਨਾਂ ਪੰਜਾਬ ਦੇ ਦਸ ਨੰਬਰੀਆਂ ਦੀ ਸੂਚੀ 'ਚ ਵੀ ਦਰਜ ਹੈ ਅਤੇ ਤਰਨਤਾਰਨ ਜ਼ਿਲੇ ਦੇ ਥਾਣਾ ਸਰਾਇ ਅਮਾਨਤ ਖਾਂ ਦੇ ਨੋਟਿਸ ਬੋਰਡ 'ਤੇ ਉਸਦਾ ਨਾਂ ਲਿਖਿਆ ਹੋਇਆ ਹੈ। ਪੁਲਿਸ ਰਿਕਾਰਡ 'ਚ ਉਸਨੂੰ ਗੈਰ ਹਾਜ਼ਿਰ ਦੱਸਿਆ ਗਿਆ ਹੈ, ਜਿਸ ਲਈ ਪੁਲਿਸ ਸਟੇਸ਼ਨ 'ਚ ਰੋਜ਼ ਹਾਜ਼ਰੀ ਲਗਾਉਣੀ ਜ਼ਰੂਰੀ ਹੈ। ਪਰ ਢੀਂਡਸਾ ਦਾ ਨਜ਼ਦੀਕੀ ਰਿਸ਼ਤੇਦਾਰ ਹੋਣ ਕਾਰਨ ਪਹਿਲਵਾਨ ਬਿਨਾਂ ਪੁਲਿਸ ਦੇ ਡਰ ਤੋਂ ਘੁੰਮ ਰਿਹਾ ਹੈ। 

ਕਾਂਗਰਸੀ ਆਗੂਆਂ ਨੇ ਕਿਹਾ ਕਿ ਪਹਿਲਵਾਨ ਐਨ.ਡੀ.ਪੀ.ਸੀ. ਐਕਟ ਹੇਠ ਦਰਜ਼ ਕੇਸ 'ਚ ਭਗੌੜਾ ਹੈ। ਉਨ੍ਹਾਂ ਕਿਹਾ ਕਿ ਦੁਬਈ ਤੇ ਫਿਰ ਮੁੰਬਈ ਸ਼ਿਫਟ ਹੋਣ ਤੋਂ ਪਹਿਲਾਂ ਪਹਿਲਵਾਨ ਪਾਕਿਸਤਾਨ ਤੋਂ ਨਸ਼ਿਆਂ ਤੇ ਸੋਨੇ ਦੀ ਤਸਕਰੀ 'ਚ ਸ਼ਾਮਿਲ ਸੀ। ਢੀਂਡਸਾ ਨੂੰ ਉਨ੍ਹਾਂ 'ਤੇ ਦੋਸ਼ ਲਗਾਉਣ ਦਾ ਅਧਿਕਾਰ ਨਹੀਂ ਹੈ, ਜੋ ਖੁਦ ਪਹਿਲਵਾਨ ਦਾ ਸਮਰਥਨ ਕਰ ਰਹੇ ਹਨ ਤੇ ਉਸਨੂੰ ਪੁਲਿਸ ਤੋਂ ਬਚਾਅ ਰਹੇ ਹਨ। 

ਉੁਕਤ ਕਾਂਗਰਸੀ ਆਗੂਆਂ ਨੇ ਢੀਂਡਸਾ ਪਰਿਵਾਰ ਤੇ ਪਰਮਿੰਦਰ ਢੀਂਡਸਾ ਦੇ ਸਹੁਰੇ ਦੀਆਂ ਗਤੀਵਿਧੀਆਂ ਦੀ ਡੂੰਘਾਈ ਨਾਲ ਜਾਂਚ ਕਰਵਾਏ ਜਾਣ ਦੀ ਮੰਗ ਕੀਤੀ ਹੈ।