ਬਾਬਾ ਰਾਮਦੇਵ ਨੇ ਮਾਰੀ ਯੂ-ਟਰਨ: ਕਾਂਗਰਸ ਨੂੰ ਦੇਵਾਂਗੇ ਸਮਰਥਨ

ਨਵੀਂ ਦਿੱਲੀ- ਯੋਗ ਗੁਰੂ ਬਾਬਾ ਰਾਮਦੇਵ ਆਉਣ ਵਾਲੀਆਂ ਲੋਕ ਸਭਾ ਚੋਣਾਂ 'ਚ ਕਾਂਗਰਸ ਦਾ ਸਮੱਰਥਨ ਕਰਨ ਲਈ ਤਿਆਰ ਹਨ ਪਰ ਉਨ੍ਹਾਂ ਨੇ ਇਕ ਸ਼ਰਤ ਵੀ ਰੱਖੀ ਹੈ। ਆਈ.ਸੀ ਏ.ਆਈ. ਕਾਨਫਰੰਸ 'ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਬਾਬਾ ਰਾਮਦੇਵ ਨੇ ਕਿਹਾ ਕਿ ਜੇਕਰ ਕਾਂਗਰਸ ਸਾਡੇ ਸਿੰਗਲ ਵਿੰਡੋ ਟੈਕਸੇਸ਼ਨ ਜਾਂ ਸਿੰਗਲ ਟੈਕਸ ਦੇ ਪ੍ਰਸਤਾਵ ਦਾ ਸਮੱਰਥਨ ਕਰਦੀ ਹੈ ਤਾਂ ਅਸੀਂ ਕਾਂਗਰਸ ਨੂੰ ਸਮੱਰਥਨ ਦੇਵਾਂਗੇ ਪਰ ਇਸ ਲਈ ਪਹਿਲ ਉਸ ਨੂੰ ਕਰਨੀ ਹੋਵੇਗੀ। ਬਾਬਾ ਰਾਮਦੇਵ ਚਾਹੁੰਦੇ ਹਨ ਕਿ ਸਾਰੇ ਤਰ੍ਹਾਂ ਦੇ ਪ੍ਰਤੱਖ ਤੇ ਅਪ੍ਰਤੱਖ ਕਰ ਖ਼ਤਮ ਕਰ ਦਿੱਤੇ ਜਾਣ ਤੇ ਉਸ ਦੀ ਜਗ੍ਹਾ ਬੈਂਕ 'ਚੋਂ ਹੋਣ ਵਾਲੀ ਟ੍ਰਾਂਜੈਕਸ਼ਨ 'ਤੇ ਟੈਕਸ ਲਗਾਇਆ ਜਾਵੇ। ਉਨ੍ਹਾਂ ਕਿਹਾ ਕਿ ਅਗਲੀਆਂ ਲੋਕ ਸਭਾ ਚੋਣਾਂ 'ਚ ਇਹ ਵੱਡਾ ਮੁੱਦਾ ਬਣੇਗਾ ਕਿਉਂਕਿ ਇਸ ਨਾਲ ਰਸੋਈ ਗੈਸ ਤੇ ਪੈਟਰੋਲ ਸਸਤਾ ਮਿਲੇਗਾ। ਪ੍ਰਸਤਾਵਿਤ ਸਿਸਟਮ ਨੂੰ ਜਦੋਂ ਪੂਰੀ ਤਰ੍ਹਾਂ ਨਾਲ ਲਾਗੂ ਕਰ ਦਿੱਤਾ ਜਾਵੇਗਾ ਤਾਂ ਇਸ ਨਾਲ ਖਜ਼ਾਨੇ 'ਚ ਹਰ ਸਾਲ 40 ਲੱਖ ਕਰੋੜ ਰੁਪਏ ਆਉਣਗੇ ਹੁਣ ਕੇਵਲ 10 ਲੱਖ ਕਰੋੜ ਰੁਪਏ ਆ ਰਹੇ ਹਨ।