ਦੋਸ਼ ਸੁਣ ਕੇ ਅਦਾਲਤ 'ਚ ਆਸਾਰਾਮ ਦਾ ਰੋਣਾ ਨਿਕਲਿਆ

ਜੈਪੁਰ- ਨਾਬਾਲਿਗ ਵਿਦਿਆਰਥਣ ਨਾਲ ਜਬਰ ਜਨਾਹ ਦੇ ਦੋਸ਼ 'ਚ ਜੋਧਪੁਰ ਜੇਲ੍ਹ 'ਚ ਬੰਦ ਕਥਾਵਾਚਕ ਆਸਾਰਾਮ ਵੀਰਵਾਰ ਨੂੰ ਅਦਾਲਤ 'ਚ ਆਪਣੇ ਉੱਪਰ ਲੱਗੇ ਦੋਸ਼ ਸੁਣ ਕੇ ਰੋ ਪਏ। ਉੱਥੇ ਮੌਜੂਦ ਵਕੀਲਾਂ ਨੇ ਉਨ੍ਹਾਂ ਨੂੰ ਸੰਭਾਲਿਆ। ਹਾਲਾਂਕਿ ਅਦਾਲਤ ਤੋਂ ਬਾਹਰ ਆਉਂਦੇ ਹੀ ਉਨ੍ਹਾਂ ਨੇ ਪੱਤਰਕਾਰਾਂ ਨੂੰ ਕਿਹਾ ਕਿ ਛੇਤੀ ਹੀ ਸਭ ਠੀਕ ਹੋ ਜਾਏਗਾ। 

ਇਸ ਦੌਰਾਨ ਆਸਾਰਾਮ ਦੇ ਸੇਵਾਦਾਰ ਸ਼ਿਵਾ ਅਤੇ ਹੋਸਟਲ ਦੀ ਵਾਰਡਨ ਸ਼ਿਲਪੀ ਜੇਲ੍ਹ ਤੋਂ ਰਿਹਾਅ ਹੋ ਗਏ। ਜੋਧਪੁਰ ਜ਼ਿਲ੍ਹਾ ਅਤੇ ਸੈਸ਼ਨ ਕੋਰਟ 'ਚ ਆਸਾਰਾਮ ਅਤੇ ਹੋਰ ਦੋਸ਼ੀਆਂ 'ਤੇ ਆਈਪਸੀ ਦੀ 342, 376 ਡੀ, 376 (2), 370 (4), 354 (ਏ), 504, 506, 509, 120 ਬੀ ਤਹਿਤ ਪਾਕਸੋ ਐਕਟ ਦੀਆਂ ਧਾਰਾਵਾਂ ਦੇ ਤਹਿਤ ਦੋਸ਼ ਤੈਅ ਕੀਤੇ ਗਏ ਸਨ, ਜਿਨ੍ਹਾਂ ਨੂੰ ਪੜ੍ਹ ਕੇ ਸੁਣਾਇਆ ਗਿਆ। ਆਸਾਰਾਮ ਨੇ ਇਹ ਸਾਰੇ ਅਪਰਾਧ ਤੋਂ ਮੰਨਣ ਤੋਂ ਇਨਕਾਰ ਕਰ ਦਿੱਤਾ। ਆਸਾਰਾਮ ਅਤੇ ਉਨ੍ਹਾਂ ਦੇ ਸਹਿਯੋਗੀਆਂ 'ਤੇ ਜਿਹੜੀਆਂ ਧਾਰਾਵਾਂ ਲੱਗੀਆਂ ਹਨ, ਉਨ੍ਹਾਂ 'ਚ ਨਾਬਾਲਿਗ ਨੂੰ ਸਾਜ਼ਿਸ਼ ਦੇ ਤਹਿਤ ਇਕ ਥਾਂ ਤੋਂ ਦੂਜੀ ਥਾਂ ਲੈ ਜਾਣ, ਧਮਕਾਉਣਾ, ਜ਼ਬਰਦਸਤੀ ਰੋਕਣਾ, ਬੰਧਕ ਬਣਾਉਣਾ ਅਤੇ ਜਿਨਸੀ ਸ਼ੋਸ਼ਣ ਕਰਨਾ ਵਰਗਾ ਅਪਰਾਧ ਬਣਦੇ ਹਨ। ਜੇਕਰ ਦੋਸ਼ ਸਾਬਿਤ ਹੋ ਜਾਂਦੇ ਹਨ ਤਾਂ ਆਸਾਰਾਮ ਅਤੇ ਹੋਰਨਾਂ ਨੂੰ ਦਸ ਸਾਲ ਜੇਲ੍ਹ ਤਕ ਦੀ ਸਜ਼ਾ ਹੋ ਸਕਦੀ ਹੈ।