ਬੋਲੀਨਾ ਸਥਿਤ ਡੇਰਾ ਬਾਬਾ ਭਗਤ ਰਾਮ ਦੇ ਮੁਖੀ ਮਹਿੰਦਰ ਸਿੰਘ ਵਲੋਂ ਵਿਧਵਾ ਭਰਜਾਈ ਦਾ ਕਤਲ

ਜਲੰਧਰ ਨਜ਼ਦੀਕ ਪਿੰਡ ਬੋਲੀਨਾ ਵਿਖੇ ਸਥਿਤ ਡੇਰਾ ਬਾਬਾ ਭਗਤ ਰਾਮ ਦੇ ਮੁਖੀ ਮਹਿੰਦਰ ਸਿੰਘ ਬੋਲੀਨਾ ਨੂੰ ਆਪਣੀ ਛੋਟੀ ਵਿਧਵਾ ਭਰਜਾਈ ਦਾ ਕਤਲ ਕਰਕੇ ਉਸਦੀ ਲਾਸ਼ ਡੇਰੇ ਦੇ ਹੀ ਗਟਰ ਵਿਚ ਸੁੱਟ ਦੇਣ ਦੇ ਦੋਸ਼ ਵਿਚ ਪੁਲਿਸ ਨੇ ਗਿ੍ਫ਼ਤਾਰ ਕਰ ਲਿਆ ਹੈ। ਇਸ ਸਾਧ ਨੇ ਖੁਦ ਹੀ ਪੁਲਿਸ ਨੂੰ ਦੱਸ ਕੇ ਆਪਣੇ ਹੱਥੀਂ ਇਸ ਵਿਧਵਾ ਦੀ ਅਧਨੰਗੀ ਲਾਸ਼ ਗਟਰ ਵਿਚੋਂ ਕਢਵਾਈ ਹੈ।

ਮਹਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਉਸ ਨੂੰ ਆਪਣੀ ਭਾਬੀ ਦੇ ਚਰਿਤਰ 'ਤੇ ਸ਼ੱਕ ਸੀ। ਕੁਝ ਮਹੀਨੇ ਪਹਿਲਾਂ ਉਸ ਦੇ ਛੋਟੇ ਭਰਾ ਦੀ ਮੌਤ ਹੋ ਗਈ ਸੀ। ਉਸ ਨੂੰ ਇਸ ਗੱਲ ਦਾ ਵੀ ਸ਼ੱਕ ਸੀ ਕਿ ਉਸ ਦੇ ਭਰਾ ਦੀ ਮੌਤ ਦੇ ਪਿੱਛੇ ਉਸ ਦੀ ਭਾਬੀ ਦਾ ਹੀ ਹੱਥ ਹੈ। ਮਹਿੰਦਰ ਸਿੰਘ ਨੇ ਭਾਬੀ ਤੋਂ ਬਦਲਾ ਲੈਣ ਲਈ ਉਸ ਨੂੰ 4 ਅਪ੍ਰੈਲ ਨੂੰ ਕੁਝ ਪੈਸੇ ਦੇਣ ਲਈ ਧਾਰਮਿਕ ਸਥਾਨ ਕੋਲ ਬਣੇ ਕਮਰੇ 'ਚ ਬੁਲਾਇਆ, ਜਿੱਥੇ ਉਸ ਦੀ ਗਲਾ ਘੋਟ ਕੇ ਉਸ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ ਤੇ ਲਾਸ਼ ਨੂੰ ਗਟਰ 'ਚ ਸੁੱਟ ਦਿੱਤਾ। ਮਹਿੰਦਰ ਸਿੰਘ ਨੇ ਉਸ ਦੇ ਸਰੀਰ 'ਤੇ ਪਾਏ ਕਪੜੇ ਕੈਂਚੀ ਨਾਲ ਕੱਟ ਦਿੱਤੇ ਤਾਂ ਜੋ ਜੇਕਰ ਕਦੇ ਲਾਸ਼ ਬਰਾਮਦ ਹੋਵੇ ਤਾਂ ਉਸ ਦੀ ਪਛਾਣ ਨਾ ਹੋ ਸਕੇ। ਉਸ ਦਾ ਕਹਿਣਾ ਸੀ ਕਿ ਉਹ ਭਾਬੀ ਖਿਲਾਫ ਪੁਲਸ 'ਚ ਸ਼ਿਕਾਇਤ ਦੇਣ ਤੋਂ ਵੀ ਡਰਦਾ ਸੀ। ਉਸ ਨੂੰ ਸ਼ੱਕ ਸੀ ਕਿ ਭਾਬੀ ਉਸ ਕਿਸੇ ਝੂਠੇ ਕੇਸ 'ਚ ਫਸਾ ਸਕਦੀ ਹੈ। ਪੁਲਸ ਨੇ ਮਾਮਲਾ ਦਰਜ ਕਰਕੇ ਅੱਗੇ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲਸ ਛੇਤੀ ਹੀ ਮਹਿੰਦਰ ਸਿੰਘ ਨੂੰ ਰਿਮਾਂਡ 'ਤੇ ਲੈਣ ਦੀ ਤਿਆਰੀ ਕਰ ਰਹੀ ਹੈ, ਤਾਂ ਜੋ ਪਤਾ ਲੱਗ ਸਕੇ ਕਿ ਉਸ ਨੇ ਹੱਤਿਆ ਇਕੱਲੇ ਕੀਤੀ ਹੈ ਜਾਂ ਹੋਰ ਲੋਕ ਵੀ ਉਸ ਨਾਲ ਸ਼ਾਮਲ ਸਨ।