ਇਮਰਾਨ ਖਾਨ ਦੀ ਪਾਰਟੀ ਵੱਲੋਂ ਸੂਬਾ-ਏ-ਸਰਹੱਦ ਦੀ ਅਸੈਂਬਲੀ 'ਚ ਇਕ ਹੋਰ ਸਿੱਖ ਸ: ਸਵਰਨ ਸਿੰਘ ਨੂੰ ਮੈਂਬਰ ਨਾਮਜ਼ਦ

ਅੰਮਿ੍ਤਸਰ- ਪਾਕਿ ਦੇ ਸੂਬਾ-ਏ-ਸਰਹੱਦ ਦੀ ਅਸੈਂਬਲੀ 'ਚ ਇਕ ਹੋਰ ਸਿੱਖ ਸ: ਸਵਰਨ ਸਿੰਘ ਨੂੰ ਮੈਂਬਰ ਨਾਮਜ਼ਦ ਕੀਤਾ ਗਿਆ ਹੈ | ਪਾਕਿਸਤਾਨ ਤੋਂ ਸ: ਸਵਰਨ ਸਿੰਘ ਨੇ ਦੱਸਿਆ ਕਿ ਸੂਬਾ-ਏ-ਸਰਹੱਦ ਜਿਸ ਨੂੰ ਫਰੰਟੀਅਰ ਸੂਬੇ ਵਜੋਂ ਵੀ ਜਾਣਿਆ ਜਾਂਦਾ ਹੈ, 'ਚ ਸੱਤਾ ਹਾਸਲ ਕਰਨ ਵਾਲੀ ਸਾਬਕਾ ਕ੍ਰਿਕਟਰ ਇਮਰਾਨ ਖਾਨ ਦੀ ਸਿਆਸੀ ਪਾਰਟੀ 'ਪਾਕਿਸਤਾਨ- ਤਹਿਰੀਕ-ਏ- ਇਨਸਾਫ' ਵੱਲੋਂ ਉਨ੍ਹਾਂ ਨੂੰ ਅਸੈਂਬਲੀ ਦਾ ਮੈਂਬਰ ਨਾਮਜ਼ਦ ਕੀਤਾ ਗਿਆ ਹੈ | ਸ: ਸਵਰਨ ਸਿੰਘ ਪਾਕਿਸਤਾਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਹਨ | ਪਾਕਿਸਤਾਨ ਦੇ ਨਾਰੋਵਾਲ ਜ਼ਿਲ੍ਹਾ ਤੋਂ ਕੌਮੀ ਅਸੈਂਬਲੀ ਦੇ ਮੈਂਬਰ ਬਣੇ ਸ੍ਰੀ ਅਹਿਸਾਨ ਇਕਬਾਲ ਨੇ ਸ੍ਰੀ ਕਰਤਾਰਪੁਰ ਸਾਹਿਬ ਤੋਂ ਫ਼ੋਨ 'ਤੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਸਿੱਖਾਂ ਨੂੰ ਪਾਕਿ ਦੀਆਂ ਸੂਬਾ ਅਸੈਂਬਲੀਆਂ 'ਚ ਪ੍ਰਤੀਨਿਧਤਾ ਮਿਲਣ ਨਾਲ ਗੁਰਦੁਆਰਿਆਂ ਦੀ ਸਾਂਭ ਸੰਭਾਲ ਅਤੇ ਮਰਯਾਦਾ ਸਬੰਧੀ ਪਾਕਿ ਸਰਕਾਰ ਨਾਲ ਸੁਯੋਗ ਤਾਲਮੇਲ ਬਣ ਪਾਵੇਗਾ |