ਨਗਰੋਟਾ ਬਗਵਾਂ- ਜਦ ਤੱਕ ਮੁੰਬਈ ਸੀਰੀਅਲ ਬੰਬ ਧਮਾਕੇ ਦੇ ਅੱਤਵਾਦੀ ਸਰਗਨਾ ਦਾਊਦ ਤੇ ਅਜ਼ਹਰ ਮਸੂਦ ਵਰਗੇ ਅੱਤਵਾਦੀਆਂ ਨੂੰ ਪਾਕਿਸਤਾਨ ਭਾਰਤ ਹਵਾਲੇ ਨਹੀਂ ਕਰਦਾ, ਉਦੋਂ ਤੱਕ ਉਸ ਨਾਲ ਗੱਲਬਾਤ ਕਰਨ ਦਾ ਕੋਈ ਅਰਥ ਨਹੀਂ। ਇਹ ਗੱਲ ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਰਾਸ਼ਟਰੀ ਪ੍ਰਧਾਨ ਪ੍ਰਵੀਨ ਤੋਗੜੀਆ ਨੇ ਇਥੇ ਪੱਤਰਕਾਰਾਂ ਨੂੰ ਕਹੀ।

ਤੋਗੜੀਆ ਨੇ ਕਿਹਾ ਕਿ ਜੇ ਦਾਊਦ ਤੇ ਅਜ਼ਹਰ ਮਸੂਦ ਨੂੰ ਸ਼ਰੇਆਮ ਦਿੱਲੀ ਵਿੱਚ ਫਾਂਸੀ ‘ਤੇ ਲਟਕਾਇਆ ਜਾਏ ਜਾਂ ਫਿਰ ਪਾਕਿਸਤਾਨ ਦੀ ਧਰਤੀ ‘ਤੇ ਅਮਰੀਕਾ ਦੀ ਤਰ੍ਹਾਂ ਡਰੋਨ ਹਮਲਾ ਕਰ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ ਜਾਏ ਤਾਂ ਦੋਬਾਰਾ ਕੋਈ ਵੀ ਅੱਤਵਾਦੀ ਪਾਕਿਸਤਾਨ ਵਿੱਚ ਪੈਦਾ ਨਹੀਂ ਹੋਵੇਗਾ। ਉਨ੍ਹਾਂ ਨੇ ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਨਵਾਜ਼ ਦੀ ਭਾਰਤ ਯਾਤਰਾ ਬਾਰੇ ਕਿਹਾ ਕਿ ਉਨ੍ਹਾਂ ਦੇ ਇਥੇ ਆਉਣ ਜਾਂ ਨਾ ਆਉਣ ਨਾਲ ਕੋਈ ਫਰਕ ਨਹੀਂ ਪੈਂਦਾ। ਜਦ ਤੱਕ ਪਾਕਿ ਅੱਤਵਾਦੀਆਂ ਨੂੰ ਭਾਰਤ ਹਵਾਲੇ ਨਹੀਂ ਕਰਦਾ ਕਿਸੇ ਪ੍ਰਕਾਰ ਦੀ ਗੱਲਬਾਤ ਸਾਰਥਕ ਨਹੀਂ ਹੋਵੇਗੀ।