ਗੁਰਾਇਆ- ਪ੍ਰਵਾਸੀ ਲਾੜੀ ਵੱਲੋਂ ਇਥੋਂ ਦੇ ਨੌਜਵਾਨ ਨਾਲ ਠੱਗੀ ਮਾਰਨ ਦਾ ਸਮਾਚਾਰ ਮਿਲਿਆ ਹੈ। ਇਕਬਾਲ ਸਿੰਘ ਪੁੱਤਰ ਸੰਸਾਰ ਸਿੰਘ ਵਾਸੀ ਗੁਰਾਇਆ ਨੇ ਕਿਹਾ ਕਿ ਉਸ ਨੇ ਆਪਣੇ ਲੜਕੇ ਪ੍ਰਭਜੀਤ ਸਿੰਘ ਦੀ ਸ਼ਾਦੀ 19 ਮਾਰਚ 2012 ਨੂੰ ਬਲਜਿੰਦਰ ਕੌਰ ਪੁੱਤਰੀ ਲਖਵੀਰ ਸਿੰਘ ਵਾਸੀ ਪਿੰਡ ਲੱਲੀਆਂ ਹਾਲ ਵਾਸੀ ਕੈਨੇਡਾ ਨਾਲ ਕੀਤੀ ਸੀ। ਅਸੀਂ ਲੜਕੀ ਤੇ ਉਸ ਦੇ ਪਰਵਾਰ ਨੂੰ ਗਹਿਣੇ ਪਾਏ ਸਨ, ਜੋ ਕੈਨੇਡਾ ਏਅਰਪੋਰਟ ‘ਤੇ ਕਸਟਮ ਅਧਿਕਾਰੀਆਂ ਨੇ ਫੜ ਲਏ ਸਨ। ਲੜਕੀ ਦੇ ਪਿਤਾ ਨੇ ਦੂਤਘਰ ਨੂੰ ਦੇਣ ਲਈ 10 ਲੱਖ ਰੁਪਏ ਸਾਡੇ ਤੋਂ ਲਏ ਕਿ ਕੰਮ ਜਲਦੀ ਬਣ ਜਾਵੇਗਾ। ਵਿਆਹ ਦੀ ਰਜਿਸਟਰੇਸ਼ਨ ਚਾਰ ਅਪ੍ਰੈਲ 2012 ਨੂੰ ਹੋਈ ਅਤੇ ਫਿਰ ਦਸ ਲੱਖ ਰੁਪਏ ਸਾਡੇ ਕੋਲ ਆ ਗਏ। ਅਸੀਂ ਆਪਣੇ ਲੜਕੇ ਦੀ ਖੁਸ਼ੀ ਲਈ ਲੱਖਾਂ ਰੁਪਏ ਦੇ ਗਹਿਣੇ ਤੇ ਖਰੀਦਦਾਰੀ ਕਰਵਾ ਕੇ ਲੜਕੀ ਬਲਜਿੰਦਰ ਕੌਰ ਤੇ ਉਸ ਪਤੀ ਨੂੰ ਦਿੱਤੀ।

ਫਿਰ ਲੜਕੀ ਨੇ ਮੇਰੇ ਲੜਕੇ ਨੂੰ ਫੋਨ ‘ਤੇ ਦੱਸਿਆ ਕਿ ਮੇਰੀ ਜ਼ਬਰਦਸਤੀ ਸ਼ਾਦੀ ਕੀਤੀ ਗਈ ਹੈ, ਮੈਂ ਕਿਸੇ ਹੋਰ ਲੜਕੇ ਨਾਲ ਪਿਆਰ ਕਰਦੀ ਸੀ ਤੇ ਉਸੇ ਨਾਲ ਵਿਆਹ ਕਰਵਾਉਣਾ ਹੈ। ਜਨਵਰੀ 2013 ਵਿੱਚ ਲੜਕੀ ਦੇ ਭਰਾ ਮਲਵਿੰਦਰ ਸਿੰਘ ਤੇ ਪਿਤਾ ਲਖਵੀਰ ਸਿੰਘ ਭਾਰਤ ਆਏ ਤੇ ਜ਼ਮੀਨ ਬਲਜਿੰਦਰ ਕੌਰ ਦੇ ਨਾਮ ਕਰਵਾਉਣ ਦੀ ਮੰਗ ਕੀਤੀ। ਮੇਰਾ ਲੜਕਾ ਡਰਦਾ ਦੁਬਈ ਚਲਾ ਗਿਆ ਹੈ, ਜੋ ਉਥੇ ਧੱਕੇ ਖਾ ਰਿਹਾ ਹੈ ਅਤੇ ਇਹ ਹੁਣ ਵੀ ਤਿੰਨ ਲੱਖ ਮੰਗ ਰਹੇ ਹਨ। ਉਨ੍ਹਾਂ ਐਸ ਐਸ ਪੀ ਜਲੰਧਰ ਨੂੰ ਇਸ ਸਬੰਧੀ ਪੱਤਰ ਲਿਖ ਕੇ ਇਨਸਾਫ ਦੀ ਮੰਗ ਕੀਤੀ ਸੀ, ਜੋ ਦਰਖਾਸਤ ਐਂਟੀ ਫਰਾਡ ਜਲੰਧਰ ਕੋਲ ਜਾਂਚ ਅਧੀਨ ਹੈ। ਉਨ੍ਹਾਂ ਕਿਹਾ ਕਿ ਉਕਤ ਲੋਕ ਮੇਰੇ ਅਤੇ ਮੇਰੇ ਪੁੱਤਰ ਖਿਲਾਫ ਐਨ ਆਰ ਆਈ ਥਾਣੇ ਵਿੱਚ ਵੀ ਸ਼ਿਕਾਇਤਾਂ ਕਰ ਰਹੇ ਹਨ। ਉਨ੍ਹਾਂ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਅਜਿਹੇ ਦੋਸ਼ੀਆਂ ਖਿਲਾਫ ਧੋਖਾਧੜੀ ਦਾ ਮੁਕੱਦਮਾ ਦਰਜ ਕੀਤਾ ਜਾਵੇ।