ਆਦਮਪੁਰਾ ਵਿੱਚ ਚੋਣ ਹਿੰਸਾ : ਜ਼ਿੱਦ ਤੇ ਜਿੱਤ ਦੀ ਲੜਾਈ ਵਿੱਚ ਹਾਰਿਆ ਗ਼ਰੀਬ ਪਰਿਵਾਰ

<p>ਜਸਪ੍ਰੀਤ ਦੀ ਮਾਂ ਵਿਰਲਾਪ ਕਰਦੀ ਹੋਈ<br></p>

ਬਠਿੰਡਾ ਦੇ ਪਿੰਡ ਆਦਮਪੁਰਾ ਵਿੱਚ ਚੋਣ ਹਿੰਸਾ ਵਿੱਚ ਪਿੰਡ ਸਿਧਾਨਾ ਦਾ ਨੌਜਵਾਨ ਜਸਪ੍ਰੀਤ ਸਿੰਘ ਭੇਟ ਚੜ੍ਹ ਗਿਆ ਹੈ। ਉਸ ਦੀ ਉਮਰ ਤੋਂ ਵੱਧ ਉਸ ਦੇ ਸਰੀਰ ’ਤੇ ਗੋਲੀਆਂ ਦੇ ਨਿਸ਼ਾਨ ਸਨ। ਛਲਣੀ ਹੋਏ ਜਸਪ੍ਰੀਤ ਦੇ ਮਾਪੇ ਹੁਣ ਪੁੱਛਦੇ ਹਨ ਕਿ ਉਸ ਦਾ ਕੀ ਕਸੂਰ ਸੀ। ਪਿੰਡ ਸਿਧਾਨਾ ਦੇ ਹਰ ਘਰ ਵਿੱਚ ਇਸ ਜਵਾਨ ਮੌਤ ਨੇ ਦੁੱਖਾਂ ਦੇ ਦੀਵੇ ਬਾਲ ਦਿੱਤੇ। ਹਰ ਅੱਖ ਨਮ ਹੋ ਗਈ ਤੇ ਹਰ ਗੱਚ ਭਰ ਆਇਆ ਜਦੋਂ ਬਜ਼ੁਰਗ ਬਾਪ ਚਰਨਜੀਤ ਸਿੰਘ ਨੇ ਆਪਣੇ ਜਵਾਨ ਪੁੱਤ ਦੀ ਚਿਖਾ ਨੂੰ ਅੱਗ ਦਿਖਾਈ। ਕਿਸਾਨ ਚਰਨਜੀਤ ਸਿੰਘ ਕੋਲ ਸਿਰਫ਼ ਢਾਈ ਏਕੜ ਜ਼ਮੀਨ ਹੈ ਜਿਸ ਨਾਲ ਉਸ ਨੇ ਆਪਣੇ ਇਕਲੌਤੇ ਪੁੱਤ ਜਸਪ੍ਰੀਤ ਨੂੰ ਜਮ੍ਹਾਂ ਦੋ ਤੱਕ ਦੀ ਪੜ੍ਹਾਈ ਕਰਾਈ। ਜਸਪ੍ਰੀਤ ਦੀ ਇੱਕੋ ਇੱਕ ਮੁਟਿਆਰ ਭੈਣ ਸਿਮਰਜੀਤ ਕੌਰ ਲਈ ਸਦਾ ਲਈ ਇਹ ਜਹਾਨ ਖ਼ਾਲੀ ਹੋ ਗਿਆ ਹੈ। ਹਰ ਰੱਖੜੀ ਦੇ ਦਿਨ ਇਸ ਭੈਣ ਨੂੰ ਹੌਲ ਪੈਣਗੇ। ਉਸ ਨੂੰ ਭਰਾ ਦੇ ਪਰਤਣ ਦਾ ਝਉਲਾ ਪਏਗਾ। ਹੁਣ ਦੋ ਦਿਨਾਂ ਤੋਂ ਮਾਂ ਤੇ ਭੈਣ ਨੂੰ ਦੌਰੇ ਪੈ ਰਹੇ ਹਨ ਤੇ ਬਾਪ ਸੱੁਧ ਬੁੱਧ ਵਿੱਚ ਨਹੀਂ। 21 ਵਰ੍ਹਿਆਂ ਦਾ ਜਸਪ੍ਰੀਤ ਸਿੰਘ ਫੁੱਟਬਾਲ ਤੇ ਕਬੱਡੀ ਦਾ ਖਿਡਾਰੀ ਸੀ।

ਪੀਪਲਜ਼ ਪਾਰਟੀ ਦੇ ਆਗੂ ਲੱਖਾ ਸਧਾਣਾ ਨਾਲ ਉਸ ਦੀ ਇਕੋ ਸਾਂਝ ਖੇਡਾਂ ਦੀ ਸੀ। ਖੇਡ ਹੀ ਉਸ ਨੂੰ ਲੱਖਾ ਸਧਾਣਾ ਦੇ ਨਜ਼ਦੀਕ ਲੈ ਆਈ। ਜਸਪ੍ਰੀਤ ਸਿੰਘ ਫੌਜ ਵਿੱਚ ਭਰਤੀ ਹੋਣਾ ਚਾਹੁੰਦਾ ਸੀ। ਉਹ ਫੌਜੀ ਭਰਤੀ ਲਈ ਤਿਆਰੀ ਵਿੱਚ ਜੁਟਿਆ ਹੋਇਆ ਸੀ। ਉਹ ਦੇਸ਼ ਦੀ ਸੇਵਾ ਦਾ ਜਜ਼ਬਾ ਰੱਖਦਾ ਸੀ ਜਿਸ ਕਰਕੇ ਉਹ ਪਿੰਡ ਦੇ ਜਿੰਮ ਵਿੱਚ ਖੁਦ ਵੀ ਤਿਆਰੀ ਕਰ ਰਿਹਾ ਸੀ ਤੇ ਹੋਰਾਂ ਨੌਜਵਾਨਾਂ ਨੂੰ ਵੀ ਪ੍ਰੇਰਦਾ ਸੀ। ਦੇਸ਼ ਦੀ ਸੇਵਾ ਲਈ ਘਰੋਂ ਤੁਰਨ ਤੋਂ ਪਹਿਲਾਂ ਹੀ ਉਹ ਜਹਾਨੋਂ ਤੁਰ ਗਿਆ ਹੈ। ਚਾਚੇ ਬੇਅੰਤ ਸਿੰਘ ਨੇ ਦੱਸਿਆ ਕਿ ਜਸਪ੍ਰੀਤ ਫੌਜ ਵਿੱਚ ਭਰਤੀ ਹੋਣਾ ਚਾਹੁੰਦਾ ਸੀ ਤੇ ਉਹ ਖੇਡਾਂ ਵਿੱਚ ਦਿਨ ਰਾਤ ਮਿਹਨਤ ਕਰ ਰਿਹਾ ਸੀ। ਉਸ ਦਾ ਕਹਿਣਾ ਸੀ ਕਿ ਸਿਆਸੀ ਖੇਡ ਨੇ ਮਾਪਿਆਂ ਦੇ ਹੱਥ ਖਾਲੀ ਕਰ ਦਿੱਤੇ ਹਨ।

ਜਸਪ੍ਰੀਤ ਦੀ ਛੋਟੀ ਭੈਣ ਸਿਮਰਜੀਤ ਕੌਰ ਨੇ ਹੁਣੇ ਹੀ ਮੈਟ੍ਰਿਕ ਕੀਤੀ ਹੈ। ਮਾਂ ਤੇ ਭੈਣ ਦਾ ਦੁੱਖ ਵੇਖਿਆ ਨਹੀਂ ਜਾ ਰਿਹਾ। ਪੰਚਾਇਤ ਮੈਂਬਰ ਰਾਜ ਸਿੰਘ ਦਾ ਕਹਿਣਾ ਸੀ ਕਿ ਇਸ ਪਰਿਵਾਰ ਵੱਲੋਂ ਕਦੇ ਵੀ ਸਿਆਸਤ ਵਿੱਚ ਹਿੱਸਾ ਨਹੀਂ ਲਿਆ ਗਿਆ ਤੇ ਇਹ ਪਰਿਵਾਰ ਤਾਂ ਖੇਤੀ ਕਰਕੇ ਆਪਣਾ ਜੀਵਨ ਬਸਰ ਕਰਨ ਤੱਕ ਸੀਮਤ ਸੀ। ਉਨ੍ਹਾਂ ਦੱਸਿਆ ਕਿ ਜਸਪ੍ਰੀਤ ਖੇਡਾਂ ਦਾ ਸ਼ੌਕੀਨ ਸੀ ਜਿਸ ਕਰਕੇ ਉਹ ਲੱਖਾ ਸਧਾਣਾ ਨਾਲ ਜੁੜਿਆ ਹੋਇਆ ਸੀ। ਉਨ੍ਹਾਂ ਆਖਿਆ ਕਿ ਜਸਪ੍ਰੀਤ ਦੀ ਮੌਤ ਨਾਲ ਪੂਰਾ ਪਿੰਡ ਕੰਬਿਆ ਹੈ।

ਪਿੰਡ ਸਿਧਾਨਾ ਦੇ ਸ਼ਮਸ਼ਾਨਘਾਟ ਵਿੱਚ ਜਸਪ੍ਰੀਤ ਸਿੰਘ ਦੇ ਸਸਕਾਰ ਮੌਕੇ ਸਿਆਸੀ ਧਿਰਾਂ ਦੇ ਆਗੂ ਵੀ ਪੁੱਜੇ ਹੋਏ ਸਨ। ਇਨ੍ਹਾਂ ਆਗੂਆਂ ਨੇ ਮਾਪਿਆਂ ਨਾਲ ਦੁੱਖ ਵੰਡਾਇਆ ਤੇ ਹੌਸਲਾ ਦਿੱਤਾ। ਪੀਪਲਜ਼ ਪਾਰਟੀ ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਬਾਦਲ,ਪੰਜਾਬ ਕਾਂਗਰਸ ਦੇ ਮੀਤ ਪ੍ਰਧਾਨ ਗੁਰਪ੍ਰੀਤ ਸਿੰਘ ਕਾਂਗੜ, ਵਿਧਾਇਕ ਅਜਾਇਬ ਸਿੰਘ ਭੱਟੀ, ਕਾਂਗਰਸ ਦੇ ਜ਼ਿਲ੍ਹਾ ਪ੍ਰਧਾਨ ਨਰਿੰਦਰ ਸਿੰਘ ਭਲੇਰੀਆ ਤੇ ਕਿਸਾਨ ਧਿਰਾਂ ਦੇ ਆਗੂ ਵੀ ਸਸਕਾਰ ਮੌਕੇ ਹਾਜ਼ਰ ਸਨ। ਪਿੰਡ ਸਿਧਾਨਾ ਸੋਗ ਵਿੱਚ ਡੁੱਬਾ ਹੋਇਆ ਸੀ। ਜਵਾਨ ਪੁੱਤ ਦੀ ਮੌਤ ਨੇ ਪਿੰਡ ਦੇ ਹਰ ਨਿਆਣੇ ਸਿਆਣੇ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਲੋਕਾਂ ਨੇ ਦੱਸਿਆ ਕਿ ਸਿਆਸੀ ਕਤਾਰਾਂ ’ਚੋਂ ਬਾਹਰ ਨਿਕਲ ਕੇ ਲੋਕਾਂ ਨੇ ਪਿੰਡ ਦੇ ਇੱਕ ਜਵਾਨ ਜੀਅ ਦੇ ਚਲੇ ਜਾਣ ਦਾ ਦੁੱਖ ਮਨਾਇਆ ਹੈ। ਜਦੋਂ ਜਸਪ੍ਰੀਤ ਦਾ ਸਸਕਾਰ ਹੋਇਆ ਤਾਂ ਉਦੋਂ ਪਿੰਡ ਦੇ ਹਰ ਘਰ ਦਾ ਜੀਅ ਉਸ ਦੇ ਆਖਰੀ ਸਫ਼ਰ ਵਿੱਚ ਸ਼ਾਮਲ ਸੀ।