ਉੱਤਰੀ ਕੋਰੀਆ ਨੇ ਫਿਰ ਦਾਗੀਆਂ ਤਿੰਨ ਮਿਜ਼ਾਈਲਾਂ

ਸਿਓਲ : ਉੱਤਰੀ ਕੋਰੀਆ ਨੇ ਸ਼ਨਿਚਰਵਾਰ ਨੂੰ ਆਪਣੇ ਪੂਰਬੀ ਤੱਟ ਤੋਂ ਤਿੰਨ ਮਿਜ਼ਾਈਲਾਂ ਦਾਗੀਆਂ। ਦੱਖਣੀ ਕੋਰੀਆ ਦੇ ਰੱਖਿਆ ਮੰਤਰਾਲੇ ਵਲੋਂ ਇਹ ਜਾਣਕਾਰੀ ਦਿੱਤੀ ਗਈ ਹੈ। ਹਾਲਾਂਕਿ ਮਿਜ਼ਾਈਲ ਦਾਗੇ ਜਾਣ ਦੇ ਉਦੇਸ਼ ਬਾਰੇ ਪਤਾ ਨਹੀਂ ਲੱਗ ਸਕਿਆ ਹੈ। ਉੱਤਰੀ ਕੋਰੀਆ ਵਲੋਂ ਘੱਟ ਦੂਰੀ ਦੀ ਮਿਜ਼ਾਈਲ ਲਾਂਚ ਕਰਨਾ ਕੋਈ ਅਸਧਾਰਨ ਗੱਲ ਨਹੀਂ ਹੈ। ਪਰ ਮੰਤਰਾਲੇ ਵਲੋਂ ਇਸ ਬਾਰੇ 'ਚ ਕੋਈ ਅਨੁਮਾਨ ਪ੍ਰਗਟ ਨਹੀਂ ਕੀਤਾ ਗਿਆ ਹੈ ਕਿ ਸ਼ਨਿਚਰਵਾਰ ਨੂੰ ਚੁੱਕਿਆ ਗਿਆ ਉੱਤਰੀ ਕੋਰੀਆ ਦਾ ਕਦਮ ਪ੍ਰੀਖਣ ਦਾ ਹਿੱਸਾ ਸੀ ਜਾਂ ਸਿਖਲਾਈ ਅਭਿਆਸ ਤਹਿਤ ਇਸ ਨੂੰ ਅੰਜਾਮ ਦਿੱਤਾ ਗਿਆ। ਦੱਖਣੀ ਕੋਰੀਆ ਦੇ ਰੱਖਿਆ ਮੰਤਰਾਲੇ ਦੇ ਬੁਲਾਰੇ ਨੇ ਫੋਨ 'ਤੇ ਦੱਸਿਆ ਕਿ ਉੱਤਰੀ ਕੋਰੀਆ ਨੇ ਸਵੇਰੇ ਦੋ ਮਿਜ਼ਾਈਲਾਂ ਦਾਗੀਆਂ। ਦੁਪਹਿਰ ਬਾਅਦ ਉਸ ਵਲੋਂ ਇਕ ਹੋਰ ਮਿਜ਼ਾਈਲ ਦਾਗੀ ਗਈ। ਉਨ੍ਹਾਂ ਕਿਹਾ ਕਿ ਕਿਸੇ ਭੜਕਾਊ ਕਾਰਵਾਈ ਦੀ ਸਥਿਤੀ 'ਚ ਮੰਤਰਾਲਾ ਹਾਲਾਤ 'ਤੇ ਨਜ਼ਰ ਰੱਖ ਰਿਹਾ ਹੈ ਤੇ ਚੌਕਸ ਹੈ। ਕਿਓਡੋ ਸਮਾਚਾਰ ਏਜੰਸੀ ਨੇ ਜਾਪਾਨੀ ਸਰਕਾਰ ਦੇ ਇਕ ਸੂਤਰ ਦੇ ਹਵਾਲੇ ਨਾਲ ਤਿੰਨ ਮਿਜ਼ਾਈਲਾਂ ਦਾਗੇ ਜਾਣ ਦੀ ਗੱਲ ਕਹੀ ਹੈ। ਇਸ ਦੀ ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਕੋਈ ਵੀ ਮਿਜ਼ਾਈਲ ਜਾਪਾਨ ਦੀ ਸਮੁੰਦਰੀ ਹੱਦ 'ਚ ਨਹੀਂ ਡਿੱਗੀ।