ਚੇ ਗੁਵੇਰਾ ਦੀਆਂ ਇਤਿਹਾਸਕ ਤਸਵੀਰਾਂ ਸਪੇਨ ‘ਚੋਂ ਮਿਲੀਆਂ

<p>ਚੇ ਗੁਵੇਰਾ ਦੀ ਆਖ਼ਰੀ ਵੇਲੇ ਦੀ ਤਸਵੀਰ।<br></p>

ਮੈਡਰਿਡ- ਕਿਊਬਾ ਦੇ ਇਨਕਲਾਬੀ ਆਗੂ ਚੇ ਗੁਵੇਰਾ ਦੀਆਂ ਮੌਤ ਵਾਲੀਆਂ ਇਤਿਹਾਸਕ ਤਸਵੀਰਾਂ ਕਰੀਬ ਅੱਧੀ ਸਦੀ ਤੱਕ ਗੁਆਚੀਆਂ ਰਹਿਣ ਤੋਂ ਬਾਅਦ ਸਪੇਨ ਦੇ ਛੋਟੇ ਕਸਬੇ ‘ਚੋਂ ਮਿਲੀਆਂ ਹਨ। ਇਹ ਤਸਵੀਰਾਂ ਏਐਫਪੀ ਦੇ ਫੋਟੋਗਰਾਫਰ ਨੇ ਉਸ ਸਮੇਂ ਖਿੱਚੀਆਂ ਸਨ ਜਦੋਂ ਗੁਵੇਰਾ ਨੂੰ ਗੋਲੀਆਂ ਮਾਰਨ ਬਾਅਦ ਸਟਰੈਚਰ ‘ਤੇ ਲਿਆਂਦਾ ਜਾ ਰਿਹਾ ਸੀ।

ਬਾਗੀ ਆਗੂ ਚੇ ਗੁਵੇਰਾ ਨੂੰ ਅਕਤੂਬਰ 1967 ‘ਚ ਬੋਲੀਵੀਅਨ ਫੌਜ ਨੇ ਗੋਲੀਆਂ ਮਾਰੀਆਂ ਸਨ। ਇਨ੍ਹਾਂ ਅੱਠ ਕਾਲੀ ਚਿੱਟੀਆਂ ਤਸਵੀਰਾਂ ‘ਚ ਉਸ ਦੀ ਨੰਗੀ ਛਾਤੀ ਖੂਨ ਨਾਲ ਲੱਥਪਥ ਦਿਖਾਈ ਗਈ ਹੈ ਅਤੇ ਉਸ ਦੀਆਂ ਅੱਖਾਂ ਖੁੱਲ੍ਹੀਆਂ ਹਨ।

ਇਹ ਇਤਿਹਾਸਕ ਤਸਵੀਰਾਂ ਉੱਤਰੀ ਸਪੇਨ ਦੇ ਰਿਕਲਾ ਕਸਬੇ ਦੇ ਸਥਾਨਕ ਕੌਂਸਲਰ ਇਮਾਨੋਲ ਅਰਟੇਗਾ ਕੋਲ ਪਈਆਂ ਹਨ। ਉਸ ਨੂੰ ਇਹ ਤਸਵੀਰਾਂ ਉਸ ਦੇ ਅੰਕਲ ਲੁਈਸ ਕੁਆਰਟੇਰੋ ਤੋਂ ਮਿਲੀਆਂ ਸਨ ਜੋ 1960ਵਿਆਂ ‘ਚ ਬੋਲੀਵੀਆ ‘ਚ ਮਿਸ਼ਨਰੀ ਸਨ।

ਅਰਟੇਗਾ (45) ਨੇ ਦੱਸਿਆ ਕਿ ਉਸ ਦੀ ਮਾਂ ਮੁਤਾਬਕ ਫਰੈਂਚ ਪੱਤਰਕਾਰ ਨੇ ਇਹ ਤਸਵੀਰਾਂ ਅੰਕਲ ਨੂੰ ਦਿੱਤੀਆਂ ਸਨ ਅਤੇ ਉਨ੍ਹਾਂ ਦੀ 2012 ‘ਚ ਮੌਤ ਤੋਂ ਬਾਅਦ ਸਾਮਾਨ ‘ਚੋਂ ਇਹ ਤਸਵੀਰਾਂ ਮਿਲੀਆਂ ਸਨ।
ਇਨਕਲਾਬੀ ਚੇ ਗੁਵੇਰਾ ਦੀਆਂ ਹੋਰ ਰੰਗੀਨ ਤਸਵੀਰਾਂ ਏਐਫਪੀ ਦੇ ਪੱਤਰਕਾਰ ਮਾਰਕ ਹਟਨ ਨੇ ਲਈਆਂ ਸਨ ਜੋ ਉਸ ਸਮੇਂ ਕੌਮਾਂਤਰੀ ਮੀਡੀਆ ‘ਚ ਪ੍ਰਕਾਸ਼ਤ ਹੋਈਆਂ ਸਨ। ਇਕ ਤਸਵੀਰ ਗੁਵੇਰਾ ਦੀ ਸਾਥੀ ਤਮਾਰਾ ਬੁੰਕੇ ਦੀ ਵੀ ਹੈ, ਜਿਸ ਦੇ ਚਿਹਰੇ ਨੂੰ ਬੁਰੀ ਤਰ੍ਹਾਂ ਕੁਚਲਿਆ ਹੋਇਆ ਹੈ।