ਅਮਰੀਕਾ ਦੇ ਉੱਘੇ ਬਲੌਗਰ ਅਵਿਜੀਤ ਦੀ ਬੰਗਲਾਦੇਸ਼ ਵਿੱਚ ਹੱਤਿਆ; ਪਤਨੀ ਜ਼ਖਮੀ

ਢਾਕਾ- ਅਮਰੀਕਾ ਦੇ ਉੱਘੇ ਬਲੌਗਰ ਦੀ ਬੰਗਲਾਦੇਸ਼ ਵਿੱਚ ਹੱਤਿਆ ਕਰ ਦਿੱਤੀ ਗਈ ਹੈ ਜਦਕਿ ਅਣਪਛਾਤੇ ਹਮਲਾਵਰਾਂ ਦੇ ਹਮਲੇ ਵਿੱਚ ਉਸ ਦੀ ਪਤਨੀ ਗੰਭੀਰ ਫੱਟੜ ਹੋ ਗਈ। ਕੁਝ ਦਿਨ ਪਹਿਲਾਂ ਕੱਟੜਪੰਥੀਆਂ ਨੇ ਉਨ੍ਹਾਂ ਨੂੰ ਇਸਲਾਮ ਧਰਮ ਦੇ ਖ਼ਿਲਾਫ਼ ਲਿਖਣ ’ਤੇ ਧਮਕੀਆਂ ਦਿੱਤੀਆਂ ਸਨ।

44 ਸਾਲਾ ਅਵਿਜੀਤ ਰਾਏ ਪੁਸਤਕ ਮੇਲੇ ਵਿੱਚ ਹਿੱਸਾ ਲੈਣ ਲਈ 16 ਫਰਵਰੀ ਨੂੰ ਇਥੇ ਆਇਆ ਸੀ ਤੇ ਉਸ ਦੀਆਂ ਤਿੰਨ ਪੁਸਤਕਾਂ ਵੀ ਮੇਲੇ ਵਿੱਚ ਸ਼ਾਮਲ ਸਨ। ਉਸ ਨੇ 4 ਮਾਰਚ ਨੂੰ ਅਮਰੀਕਾ ਪਰਤਣਾ ਸੀ। ਉਹ ਬੰਗਲਾਦੇਸ਼ ਵਿੱਚ ਜਨਮਿਆ ਸੀ ਤੇ ਹੁਣ ਅਮਰੀਕੀ ਨਾਗਰਿਕ ਸੀ। ਮਰਹੂਮ ਦੇ ਭਰਾ ਅਨੁਜੀਤ ਰਾਏ ਨੇ ਦੱਸਿਆ, ‘‘ਮੇਰੇ ਭਰਾ ਨੂੰ ਉਸ ਦੀਆਂ ਪੁਸਤਕਾਂ ਤੇ ਬਲੌਗ ’ਚ ਟਿੱਪਣੀਆਂ ਕਰਨ ਕਾਰਨ ਅਤਿਵਾਦੀਆਂ ਪਾਸੋਂ ਧਮਕੀਆਂ ਮਿਲੀਆਂ ਸਨ। ਉਹ ਆਪਣੀ ਪਤਨੀ ਰਫੀਦਾ ਅਹਿਮਦ ਬੋਨਾ ਨਾਲ ਢਾਕਾ ਆਇਆ ਸੀ। 40 ਸਾਲਾ ਬੋਨਾ ਦੀ ਹਾਲਤ ਗੰਭੀਰ ਹੈ। ਉਸ ਦਾ ਢਾਕਾ ਮੈਡੀਕਲ ਕਾਲਜ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਹੈ।’’ 

ਪੁਲੀਸ ਅਧਿਕਾਰੀ ਸਿਰਾਜੁਲਇਸਲਾਮ ਨੇ ਕਿਹਾ ਕਿ ਹਾਲੇ ਤੱਕ ਹਮਲਾਵਰਾਂ ਦੀ ਪਛਾਣ ਨਹੀਂ ਹੋ ਸਕੀ। ਇਸ ਜੋੜੇ ’ਤੇ ਹਮਲਾ ਉਦੋਂ ਹੋਇਆ ਜਦੋਂ ਉਹ ਪੁਸਤਕ ਮੇਲੇ ਵਿੱਚੋਂ ਪਰਤ ਰਿਹਾ ਸੀ ਤੇ ਰਾਹ ਵਿੱਚ ਆਟੋ-ਰਿਕਸ਼ਾ ਸਵਾਰਾਂ ਨੇ ਉਨ੍ਹਾਂ ਨੂੰ ਰੋਕ ਕੇ ਹਮਲਾ ਕਰ ਦਿੱਤਾ। ਹੈਰਾਨੀ ਦੀ ਗੱਲ ਹੈ ਕਿ ਹਮਲਾ ਪੁਲੀਸ ਬੈਰੀਕੇਡ ਦੇ ਐਨ ਸਾਹਮਣੇ ਹੋਇਆ।