ਨਵੀਂ ਦਿੱਲੀ- ਹਰ ਸਾਲ ਰਾਸ਼ਟਰਪਤੀ ਭਵਨ ਵਿਚ ਸ਼ਾਨਦਾਰ ਸਮਾਗਮ ਹੁੰਦਾ ਹੈ। ਜਦੋਂ ਪਦਮ ਪੁਰਸਕਾਰ ਦਿੱਤੇ ਜਾਂਦੇ ਹਨ ਤਾਂ ਆਪਣੇ-ਆਪਣੇ ਫਨ ਵਿਚ ਮਾਹਿਰ ਲੋਕਾਂ ਨੂੰ ਸਰਕਾਰ ਚੁਣਦੀ ਹੈ ਅਤੇ ਉਨ੍ਹਾਂ ਨੂੰ ਵਿਸ਼ੇਸ਼ ਨਾਗਰਿਕ ਸਨਮਾਨਾਂ ਨਾਲ ਸਨਮਾਨਿਤ ਕਰਦੀ ਹੈ ਪਰ ਇਸ ਵਾਰ ਪਦਮ ਪੁਰਸਕਾਰ ਸਮਾਗਮ ਦੇ ਕੁਝ ਦਿਨ ਮਗਰੋਂ ਹੀ ਇਹ ਵਿਵਾਦਾਂ ਵਿਚ ਘਿਰ ਗਿਆ ਹੈ। ਨਵਾਂ ਵਿਵਾਦ ਜਨਤਾ ਦਲ (ਯੂ) ਦੇ ਪ੍ਰਧਾਨ ਸ਼ਰਦ ਯਾਦਵ ਦੇ ਬਿਆਨ ਤੋਂ ਪੈਦਾ ਹੋ ਗਿਆ ਹੈ।

ਸ਼੍ਰੀ ਯਾਦਵ ਨੇ ਮੁੰਬਈ ਵਿਚ ਪਦਮ ਪੁਰਸਕਾਰਾਂ ‘ਤੇ ਹਮਲਾ ਬੋਲਿਆ ਅਤੇ ਕਿਹਾ ਕਿ ਪਦਮ ਪੁਰਸਕਾਰ ਸਿਰਫ ਮੱਕਾਰਾਂ, ਬੇਈਮਾਨਾਂ ਅਤੇ ਵੱਡੇ ਲੋਕਾਂ ਨੂੰ ਮਿਲਦਾ ਹੈ। ਉਨ੍ਹਾਂ ਨੇ ਗਰੀਬਾਂ ਅਤੇ ਆਦਿਵਾਸੀਆਂ ਦਾ ਹਵਾਲਾ ਦੇ ਕੇ ਸਵਾਲ ਕੀਤਾ ਕਿ ਹੁਣ ਤਕ ਪਦਮ ਪੁਰਸਕਾਰਾਂ ਲਈ ਆਦਿਵਾਸੀਆਂ ‘ਚੋਂ ਕੋਈ ਕਿਉਂ ਨਹੀਂ ਚੁਣਿਆ ਗਿਆ। ਵਰਨਣਯੋਗ ਹੈ ਕਿ ਕੁਝ ਦਿਨ ਪਹਿਲਾਂ ਪ੍ਰਸਿੱਧ ਲੇਖਕ ਸਲੀਮ ਖਾਨ ਨੇ ਪਦਮਸ਼੍ਰੀ ਲੈਣ ਤੋਂ ਨਾਂਹ ਕਰ ਦਿੱਤੀ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੀ ਹਸਤੀ ਪਦਮਸ਼੍ਰੀ ਤੋਂ ਵੱਡੀ ਹੈ। ਸਲੀਮ ਖਾਨ ਤੇ ਹੁਣ ਸ਼ਰਦ ਯਾਦਵ ਦੇ ਸਵਾਲ ਸਿਰਫ ਪਦਮ ਪੁਰਸਕਾਰਾਂ ਦੀ ਚੋਣ ਪ੍ਰਕਿਰਿਆ ‘ਤੇ ਸਵਾਲ ਨਹੀਂ ਹਨ, ਸਗੋਂ ਦੇਸ਼ ਦੇ ਸਭ ਤੋਂ ਵਿਸ਼ੇਸ਼ ਨਾਗਰਿਕ ਸਨਮਾਨਾਂ ਨੂੰ ਲੈ ਕੇ ਨਜ਼ਰੀਏ ‘ਤੇ ਵੀ ਸਵਾਲ ਹੈ।