ਜਲੰਧਰ- ਪੰਜਾਬ ਦੇ ਸਾਬਕਾ ਡੀ ਜੀ ਪੀ ਸ਼ਸ਼ੀ ਕਾਂਤ ਨੇ ਖੁਲਾਸਾ ਕੀਤਾ ਹੈ ਕਿ ਪੰਜਾਬ ਦੇ 10 ਵੱਡੇ ਰਾਜਸੀ ਲੋਕ ਤਸਕਰੀ ਵਿੱਚ ਸ਼ਾਮਲ ਹਨ। ਇਨ੍ਹਾਂ ਵਿੱਚ ਪੰਜਾਬ ਦੇ ਸੀਨੀਅਰ ਰਾਜਨੇਤਾ ਅਤੇ ਵੱਡੇ ਸਮਾਜ ਸੇਵਕ ਹਨ। ਇਕ ਸਾਲ ਤੋਂ ਇਨ੍ਹਾਂ ਦੀਆਂ ਫਾਈਲਾਂ ਗ੍ਰਹਿ ਵਿਭਾਗ ਨੇ ਰੋਕ ਰੱਖੀਆਂ ਹਨ।

ਪੰਜਾਬ ਨਸ਼ਾ ਵਿਰੋਧੀ ਮੰਚ ਦਾ ਗਠਨ ਕਰਕੇ ਜਨਤਾ ਦਾ ਸਮਰਥਨ ਮੰਗਣ ਚੱਲੇ ਸ਼ਸ਼ੀ ਕਾਂਤ ਨੇ ਕਿਹਾ ਕਿ ਜਦ ਉਹ ਪੰਜਾਬ ਦੇ ਖੁਫੀਆ ਵਿਭਾਗ ਵਿੱਚ ਏ ਡੀ ਜੀ ਪੀ ਸਨ ਤਾ ਉਨ੍ਹਾਂ ਖੁਫੀਆ ਜਾਂਚ ਕਰਵਾਈ ਸੀ। ਇਸ ਵਿੱਚ ਅਜਿਹੇ 10 ਲੋਕਾਂ ਦਾ ਨਾਮ ਸਾਹਮਣੇ ਆਇਆ ਸੀ, ਜੋ ਤਸਕਰੀ ਕਰਦੇ ਸਨ। ਇਸ ਵਿੱਚ ਕਾਂਗਰਸ, ਭਾਜਪਾ ਤੇ ਅਕਾਲੀ ਦਲ ਦੀਆਂ ਵੱਡੀਆਂ ਹਸਤੀਆਂ ਸਨ। ਉਨ੍ਹਾਂ ਨੇ ਇਨ੍ਹਾਂ 10 ਲੋਕਾਂ ਦੀ ਫਾਈਲ ਤਤਕਾਲੀ ਡੀ ਜੀ ਪੀ ਸੌਂਪੀ ਅਤੇ ਇਸ ਦੇ ਬਾਅਦ ਇਹ ਫਾਈਲ ਗ੍ਰਹਿ ਸਕੱਤਰ ਕੋਲ ਗਈ ਅਤੇ ਉਥੇ ਫਸੀ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਰਿਟਾਰਮੈਂਟ ਵੇਲੇ ਉਹ ਡੀ ਜੀ ਪੀ ਜੇਲ ਸਨ। ਇਸ ਦੌਰਾਨ ਉਨ੍ਹਾਂ ਨੇ ਕਪੂਰਥਲਾ ਮਾਡਰਨ ਜੇਲ ਵਿੱਚ ਜੋ ਹਾਲਾਤ ਦੇਖੇ, ਉਸ ਤੋਂ ਦੰਗ ਰਹਿ ਗਏ।

ਸ਼ਸ਼ੀ ਕਾਂਤ ਨੇ ਜਲੰਧਰ ਸਮੇਤ ਦੋਆਬਾ ਦੇ ਸਾਰੇ ਜ਼ਿਲਿਆਂ ਦੇ ਉਚ ਪੁਲਸ ਅਧਿਕਾਰੀਆਂ ਨੂੰ ਪ੍ਰਾਪਰਟੀ ਡੀਲਰ ਦੀ ਉਪਮਾ ਦਿੰਦੇ ਹੋਏ ਕਿਹਾ ਕਿ ਇਥੇ ਪੁਲਸ ਭੂ-ਮਾਫੀਆ ਦਾ ਹਿੱਸਾ ਬਣ ਚੁੱਕੀ ਹੈ। ਐਨ ਆਰ ਆਈਜ਼ ਦੀਆਂ ਜ਼ਮੀਨਾਂ ਨੂੰ ਪੁਲਸ ਅਧਿਕਾਰੀਆਂ ਦੀ ਮਦਦ ਨਾਲ ਹੜੱਪਿਆ ਜਾਂਦਾ ਹੈ। ਇਸ ਮਾਮਲੇ ਵਿੱਚ ਉਸ ਨੂੰ ਐਨ ਆਰ ਆਈ ਦੇ ਕਈ ਗਰੁੱਪ ਮਿਲੇ ਹਨ। ਸੂਬਾ ਸਰਕਾਰ ਨੇ ਜੋ ਐਨ ਆਰ ਆਈ ਸਭਾ ਬਣਾਈ ਹੈ, ਉਹ ਫੇਲ੍ਹ ਹੋ ਚੁੱਕੀ ਹੈ।