ਕਾਤਲਾਨਾ ਹਮਲੇ 'ਚ ਜ਼ਖਮੀ ਹੋਏ ਸਿੱਖ ਕਾਰਕੁੰਨ ਜੋਗਾ ਸਿੰਘ ਖਾਲਿਸਤਾਨੀ ਨੇ ਦਮ ਤੋੜਿਆ

ਲੁਧਿਆਣਾ (ਚੜ੍ਹਦੀ ਕਲਾ ਬਿਊਰੋ)- ਕਾਤਲਾਨਾ ਹਮਲੇ 'ਚ ਜ਼ਖਮੀ ਹੋਏ ਸਿੱਖ ਕਾਰਕੁੰਨ ਜੋਗਾ ਸਿੰਘ ਖਾਲਿਸਤਾਨੀ ਨੇ ਵੀਰਵਾਰ ਸ਼ਾਮ ਨੂੰ ਲੁਧਿਆਣਾ ਦੇ ਡੀ. ਐਮ. ਸੀ. ਹਸਪਤਾਲ ਵਿਚ ਜ਼ਖਮਾਂ ਦੀ ਤਾਬ ਨਾ ਝੱਲਦੇ ਹੋਏ ਦਮ ਤੋੜ ਦਿੱਤਾ ਹੈ। ਪਿਛਲੇ ਕਰੀਬ ਦੋ ਮਹੀਨਿਆਂ ਤੋਂ ਜ਼ਿੰਦਗੀ ਅਤੇ ਮੌਤ ਦੀ ਲੜਾਈ ਲੜ ਰਹੇ ਜੋਗਾ ਸਿੰਘ ਉੱਤੇ 1 ਜੁਲਾਈ ਨੂੰ ਲੁਧਿਆਣਾ ਦੇ ਚੂਹੜਪੁਰ ਇਲਾਕੇ 'ਚ ਇਨੋਵਾ ਕਾਰ ਵਿਚ ਸਵਾਰ ਹਮਲਾਵਰਾਂ ਵੱਲੋਂ ਕਾਤਲਾਨਾ ਹਮਲਾ ਕੀਤਾ ਗਿਆ ਸੀ, ਜਿਸ ਵਿੱਚ ਜੋਗਾ ਸਿੰਘ ਖਾਲਿਸਤਾਨੀ ਤੇ ਉਨ੍ਹਾਂ ਦਾ ਇਕ ਸਾਥੀ ਗੰਭੀਰ ਜ਼ਖ਼ਮੀ ਹੋ ਗਏ ਸਨ। ਜਦੋਂ ਜੋਗਾ ਸਿੰਘ ਖਾਲਿਸਤਾਨੀ ਆਪਣੇ ਤਿੰਨ ਸਾਥੀਆਂ ਨਾਲ ਚੂਹੜਪੁਰ ਰੋਡ 'ਤੇ ਮੋਟਰ ਸਾਈਕਲਾਂ 'ਤੇ ਜਾ ਰਹੇ ਸਨ ਤਾਂ ਇਕ ਤੇਜ਼ ਰਫ਼ਤਾਰ ਇਨੋਵਾ ਕਾਰ ਨੇ ਉਨ੍ਹਾਂ ਦੇ ਮੋਟਰ ਸਾਈਕਲ ਨੂੰ ਜ਼ਬਰਦਸਤ ਟੱਕਰ ਮਾਰੀ ਸੀ। ਇਸ ਉੱਤੇ ਜੋਗਾ ਸਿੰਘ ਖਾਲਿਸਤਾਨੀ ਅਤੇ ਉਨ੍ਹਾਂ ਦੀ ਪਿਛਲੀ ਸੀਟ 'ਤੇ ਬੈਠਾ ਸੁਖਵਿੰਦਰ ਸਿੰਘ ਦੋਵੇਂ ਹੇਠਾਂ ਡਿੱਗ ਪਏ। ਇਨੋਵਾ ਕਾਰ 'ਚ ਛੇ ਦੇ ਕਰੀਬ ਹਮਲਾਵਰ ਸਵਾਰ ਸਨ, ਜਿਨ੍ਹਾਂ ਨੇ ਕਾਰ ਵਿਚੋਂ ਉੱਤਰ ਕੇ ਤੇਜ਼ਧਾਰ ਹਥਿਆਰਾਂ ਨਾਲ ਉਨ੍ਹਾਂ ਉੱਤੇ ਹਮਲਾ ਕਰ ਦਿੱਤਾ। ਇਸ ਮਾਮਲੇ 'ਚ 4 ਵਿਅਕਤੀ ਹਿਰਾਸਤ 'ਚ ਵੀ ਲਏ ਗਏ ਸਨ ਪਰ ਪੁਲਿਸ ਜਾਂਚ 'ਚ ਕੁਝ ਵੀ ਬਾਹਰ ਨਹੀਂ ਆਇਆ।

ਜੋਗਾ ਸਿੰਘ ਖਾਲਿਸਤਾਨੀ ਕਿਸੇ ਜਥੇਬੰਦੀ ਨਾਲ ਜੁੜੇ ਹੋਏ ਨਹੀਂ ਸਨ ਪਰ ਉਹ ਹਮੇਸ਼ਾ ਸਿੱਖ ਪੰਥ ਦੇ ਮੁੱਦਿਆਂ ਨੂੰ ਠੋਕ ਕੇ ਉਠਾਉਂਦੇ ਸਨ। ਮੌਜੂਦਾ ਸਮੇਂ ਪੰਥ 'ਤੇ ਕੋਈ ਭੀੜ ਪੈਂਦੀ ਜਾਂ ਕੋਈ ਦੁਸ਼ਟ ਲਲਕਾਰਦਾ ਤਾਂ ਓਸ ਵੇਲੇ ਮੱਲੋ-ਮੱਲੀ ਨਿਗ੍ਹਾ ਜੋਗਾ ਸਿੰਘ ਨੂੰ ਲੱਭਣ ਲੱਗ ਪੈਂਦੀ ਸੀ। ਜਿੱਥੇ ਕਿਤੇ ਵੀ ਸਿੱਖਾਂ ਨੂੰ ਵੰਗਾਰਿਆਂ ਗਿਆ, ਜੋਗਾ ਸਿੰਘ ਨੇ ਕਦੇ ਇਹ ਨਹੀਂ ਸੀ ਦੇਖਿਆ ਕਿ ਉਸ ਦੇ ਮਗਰ ਕੌਣ ਹੈ, ਇੱਕਲਾ ਹੀ ਜਾ ਕੇ ਹਿੱਕ 'ਚ ਵੱਜਦਾ ਸੀ।

ਇਤਿਹਾਸ ਗਵਾਹ ਹੈ ਕਿ ਸੂਰਮਿਆਂ ਦੀਆਂ ਉਮਰਾਂ ਥੋੜੀਆਂ ਹੀ ਹੁੰਦੀਆਂ ਹਨ ਪਰ ਉਹ ਲੰਮਾ ਸਮਾਂ ਲੋਕਾਂ ਦੇ ਮਨਾਂ 'ਚ ਯਾਦ ਰੱਖੇ ਜਾਂਦੇ ਹਨ। ਭਵਿੱਖ 'ਚ ਜਦ ਵੀ ਪੰਥ 'ਤੇ ਭੀੜ ਪਈ, ਸਿੱਖ ਵਿਰੋਧੀ ਤਾਕਤਾਂ ਵਲੋਂ ਕਿੱਧਰੋਂ ਲਲਕਾਰਾ ਵੱਜਿਆ ਤਾਂ ਜੋਗਾ ਸਿੰਘ ਚੇਤੇ ਆਇਆ ਕਰੇਗਾ।