ਕੈਨੇਡਾ 'ਚ ਕਤਲ ਕੀਤੀ ਪੰਜਾਬਣ ਦੇ ਪਤੀ ਅਤੇ ਭਾੜੇ ਦੇ ਕਾਤਲ ਨੂੰ ਉਮਰ ਕੈਦ

<p>ਮ੍ਰਿਤਕਾ ਅਮਨਪ੍ਰੀਤ ਕੌਰ ਬਾਹੀਆ ਦੀ ਪੁਰਾਣੀ ਤਸਵੀਰ<br></p>

ਸਰੀ (ਗੁਰਪ੍ਰੀਤ ਸਿੰਘ ਸਹੋਤਾ)- ਇੱਥੋਂ ਦੇ ਨਿਊਟਨ ਇਲਾਕੇ 'ਚ 7 ਫਰਵਰੀ 2007 ਨੂੰ ਕਤਲ ਹੋਈ 33 ਸਾਲਾ, ਤਿੰਨ ਧੀਆਂ ਦੀ ਮਾਂ ਅਮਨਪ੍ਰੀਤ ਕੌਰ ਬਾਹੀਆ ਦੇ ਕਤਲ ਦੇ ਦੋਸ਼ 'ਚ ਜਿਊਰੀ ਨੇ ਉਸਦੇ ਪਤੀ 46 ਸਾਲਾ ਬਲਜਿੰਦਰ ਸਿੰਘ ਬਾਹੀਆ ਅਤੇ ਭਾੜੇ ਦੇ ਕਾਤਲ ਐਡੁਅਰਡ ਬੈਰੇਨੇਕ ਨੂੰ ਦੋਸ਼ੀ ਕਰਾਰ ਦਿੰਦਿਆਂ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਦੋਵਾਂ ਦੀ 25 ਸਾਲ ਤੱਕ ਪੈਰੋਲ ਨਹੀਂ ਹੋ ਸਕੇਗੀ। ਮਾਣਯੋਗ ਜੱਜ ਨੇ ਇਸ ਅਪਰਾਧ ਨੂੰ ਬੇਹੱਦ ਘਿਨੌਣਾ ਕਰਾਰ ਦਿੱਤਾ।

ਜ਼ਿਲ੍ਹਾ ਕਪੂਰਥਲਾ ਨਾਲ ਸਬੰਧਿਤ ਅਮਨਪ੍ਰੀਤ ਕੌਰ ਬਾਹੀਆ ਵਾਰਦਾਤ ਵਾਲੇ ਦਿਨ ਘਰ ਇਕੱਲੀ ਸੀ ਕਿ ਅਣਪਛਾਤਾ ਹਮਲਾਵਰ ਘਰ ਵਿਚ ਦਾਖਲ ਹੋ ਕੇ ਉਸਦਾ ਚਾਕੂ ਨਾਲ ਕਤਲ ਕਰਕੇ ਫ਼ਰਾਰ ਹੋ ਗਿਆ ਸੀ। ਕਤਲ ਦਾ ਪਤਾ ਉਦੋਂ ਲੱਗਾ ਜਦੋਂ ਮ੍ਰਿਤਕਾ ਦਾ ਸਹੁਰਾ ਦੀਦਾਰ ਸਿੰਘ ਬਾਹੀਆ ਘਰ ਆਇਆ। ਇਸ ਕੇਸ ਨੂੰ ਹੱਲ ਕਰਨ ਵਿਚ ਪੁਲਿਸ ਨੂੰ ਉਦੋਂ ਭਾਰੀ ਸਫਲਤਾ ਮਿਲੀ ਸੀ ਜਦੋਂ ਸਸਕੈਚੂਅਨ ਸੂਬੇ ਦੀ ਜੇਲ੍ਹ ਵਿਚ ਨਜ਼ਰਬੰਦ ਭਾੜੇ ਦੇ ਕਾਤਲ ਐਡੁਅਰਡ ਬੈਰੇਨੇਕ ਨੇ ਜੇਲ੍ਹ 'ਚ ਇੱਕ ਪੁਲਿਸ ਮੁਖ਼ਬਰ ਕੋਲ ਕਬੂਲ ਕਰ ਲਿਆ ਕਿ ਅਮਨਪ੍ਰੀਤ ਦਾ ਕਤਲ ਉਸਦੇ ਪਤੀ ਬਲਜਿੰਦਰ ਸਿੰਘ ਬਾਹੀਆ ਅਤੇ ਉਸਦੀ ਰੀਅਲ ਅਸਟੇਟ ਏਜੰਟ ਪ੍ਰੇਮਿਕਾ ਤਨਪ੍ਰੀਤ ਕੌਰ ਅਟਵਾਲ ਨੇ ਸੁਪਾਰੀ ਦੇ ਕੇ ਕਰਵਾਇਆ ਸੀ। 

ਅੱਜ ਦੇ ਫ਼ੈਸਲੇ ਨਾਲ ਸਥਾਨਕ ਭਾਈਚਾਰੇ ਨੇ ਜਿੱਥੇ ਰਾਹਤ ਮਹਿਸੂਸ ਕੀਤੀ ਹੈ ਉੱਥੇ ਭਾਈਚਾਰਾ ਅਤੇ ਅਮਨਪ੍ਰੀਤ ਕੌਰ ਬਾਹੀਆ ਦੇ ਰਿਸ਼ਤੇਦਾਰ ਉਸਦੀਆਂ ਤਿੰਨ ਧੀਆਂ ਬਾਰੇ ਕਾਫੀ ਫ਼ਿਕਰਮੰਦ ਹਨ, ਜੋ ਮਾਂ-ਬਾਪ ਬਾਹਰੀਆਂ ਹੋ ਕੇ ਜੀਅ ਰਹੀਆਂ ਹਨ।