ਨਵੀਂ ਦਿੱਲੀ- ਭਾਜਪਾ ਦੀ ਰਾਸ਼ਟਰੀ ਉਪ ਪ੍ਰਧਾਨ ਸਾਧਵੀ ਉਮਾ ਭਾਰਤੀ ਨੇ ਨਰਿੰਦਰ ਮੋਦੀ ਨਾਲ ਜੁੜੇ ਇੱਕ ਸਵਾਲ ਬਾਰੇ ਕਿਹਾ ਕਿ ਇਹ ਅਜਿਹਾ ਵਿਸ਼ਾ ਹੈ ਜਿਸ ‘ਤੇ ਸਾਰੇ ਬੋਲਣਾ ਚਾਹੁੰਦੇ ਹਨ, ਪ੍ਰੰਤੂ ਉਸ ਦੇ ਬਾਅਦ ਜੋ ਹੁੰਦਾ ਹੈ, ਉਹ ਬਾਪ ਰੇ ਬਾਪ…! ਇਹ ਤੂੜੀ ਦੇ ਢੇਰ ਨੂੰ ਅੱਗ ਲਾਉਣ ਵਾਂਗ ਹੈ। ਇਸ ਲਈ ਮੈਂ ਤੈਅ ਕੀਤਾ ਹੈ ਕਿ ਇਸ ਵਿਸ਼ੇ ‘ਤੇ ਮੈਂ ਕੁਝ ਨਹੀਂ ਬੋਲਾਂਗੀ। ਇਸ ਵਿਸ਼ੇ ‘ਤੇ ਮੇਰੇ ਆਪਣੇ ਵਿਚਾਰ ਹਨ, ਪਰ ਆਪਣੀ ਰਾਏ ਉਚਿਤ ਫੋਰਮ ‘ਤੇ ਪ੍ਰਗਟਾਵਾਂਗੀ। ਆਪਣੇ ਜੱਦੀ ਸ਼ਹਿਰ ਵਿੱਚ ਪਾਰਟੀ ਵੱਲੋਂ ਅਣਗੌਲੇ ਜਾਣ ‘ਤੇ ਆਪਣਾ ਦਰਦ ਬਿਆਨ ਕਰਦੇ ਹੋਏ ਉਮਾ ਨੇ ਕਿਹਾ ਕਿ ਮੈਨੂੰ ਜਦ ਮੱਧ ਪ੍ਰਦੇਸ਼ ਵਿੱਚ ਨਹੀਂ ਬੁਲਾਉਂਦੇ ਤਾਂ ਹੈਰਾਨੀ ਹੁੰਦੀ ਹੈ। ਮੈਂ ਉਪਯੋਗੀ ਹਾਂ, ਇਸ ਲਈ ਪੂਰੇ ਦੇਸ਼ ਵਿੱਚ ਮੈਨੂੰ ਬੁਲਾਇਆ ਜਾਂਦਾ ਹੈ, ਪ੍ਰੰਤੂ ਮੱਧ ਪ੍ਰਦੇਸ਼ ਵਿੱਚ ਨਹੀਂ। 

ਇੰਦੌਰ ਪ੍ਰੈਸ ਕਲੱਬ ਵਿੱਚ ਉਮਾ ਨੇ ਬਹੁਤ ਸੰਭਲ ਕੇ ਆਪਣੀ ਗੱਲ ਕਹੀ, ਪ੍ਰੰਤੂ ਅਣਗੌਲੇ ਕੀਤੇ ਜਾਣ ਦਾ ਦਰਦ ਛੁਪਾ ਨਹੀਂ ਸਕੀ। ਉਨ੍ਹਾਂ ਕਿਹਾ ਕਿ ਮੈਨੂੰ ਗਵਾਲੀਅਰ ਵਿੱਚ ਨਹੀਂ ਬੁਲਾਇਆ ਗਿਆ, ਇਸ ਲਈ ਨਹੀਂ ਗਈ। ਮੈਂ ਆਪਣੇ ਵੱਲੋਂ ਕਿਵੇਂ ਕਹਾਂ ਕਿ ਮੈਂ ਇਥੇ ਬੈਠੀ ਹਾਂ, ਮੇਰੇ ‘ਤੇ ਫੁੱਲ ਚੜ੍ਹਾਓ, ਮੇਰੀ ਪੂਜਾ ਕਰੋ। 2003 ਵਿੱਚ ਮੱਧ ਪ੍ਰਦੇਸ਼ ਵਿੱਚ ਭਾਜਪਾ ਨੂੰ ਸੱਤਾ ਵਿੱਚ ਲਿਆਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਵਾਲੀ ਉਮਾ ਨੇ ਕਿਹਾ ਕਿ ਪਾਰਟੀ ਦੇ ਪ੍ਰੋਗਰਾਮਾਂ ਵਿੱਚ ਮੈਨੂੰ ਹਰ ਜਗ੍ਹਾ ਬੁਲਾਇਆ ਜਾਂਦਾ ਹੈ, ਬਸ ਇਸੇ ਰਾਜ ਵਿੱਚ ਮੇਰੀ ਕੋਈ ਲੋੜ ਨਹੀਂ ਹੈ।