ਇਸ਼ਰਤ ਜਹਾਂ ਕਥਿਤ ਝੂਠੇ ਪੁਲੀਸ ਮੁਕਾਬਲੇ ਵਿਚ ਗੁਜਰਾਤ ਹਾਈ ਕੋਰਟ ਵੱਲੋਂ ਸੀਬੀਆਈ ਦੀ ਝਾੜ-ਝੰਬ

ਅਹਿਮਦਾਬਾਦ- ਇਸ਼ਰਤ ਜਹਾਂ ਕਥਿਤ ਝੂਠੇ ਪੁਲੀਸ ਮੁਕਾਬਲੇ ਸਬੰਧੀ ਕੇਸ ਵਿਚ ਚਾਰਜਸ਼ੀਟ ਦਾਖਲ ਕਰਨ ਦਾ ਮਾਮਲਾ ਲਟਕਾਉਣ ਬਦਲੇ ਗੁਜਰਾਤ ਹਾਈ ਕੋਰਟ ਨੇ ਅੱਜ ਸੀਬੀਆਈ ਦੀ ਜ਼ੋਰਦਾਰ ਝਾੜ-ਝੰਬ ਕੀਤੀ। ਅਦਾਲਤ ਨੇ ਕਿਹਾ ਕਿ ਜਾਂਚ ਏਜੰਸੀ ਇਸ ਪੁਲੀਸ ਮੁਕਾਬਲੇ ਦੀ ਅਸਲੀਅਤ ਪਤਾ ਲਾਵੇ ਅਤੇ ਉਸ ਨੂੰ ਇਸ ਸਬੰਧੀ ਇੰਟੈਲੀਜੈਂਸ ਬਿਊਰੋ (ਆਈਬੀ) ਦੀਆਂ ਖੁਫੀਆਂ ਰਿਪੋਰਟਾਂ ਵੱਲ ਧਿਆਨ ਦੇਣ ਜਾਂ ਇਹ ਜਾਨਣ ਦੀ ਕੋਈ ਲੋੜ ਨਹੀਂ ਹੈ ਕਿ  ਮਾਰੇ ਗਏ ਵਿਅਕਤੀ ਅਤਿਵਾਦੀ ਸਨ ਜਾਂ ਨਹੀਂ। ਇਹ ਟਿੱਪਣੀਆਂ ਹਾਈ ਕੋਰਟ ਦੇ ਜਸਟਿਸ ਜਯੰਤ ਪਟੇਲ ਤੇ ਜਸਟਿਸ ਅਭਿਲਾਸ਼ਾ ਕੁਮਾਰੀ ਦੇ ਡਿਵੀਜ਼ਨ ਬੈਂਚ ਨੇ ਕੀਤੀਆਂ। ਅਦਾਲਤ ਨੇ ਕਿਹਾ, ‘‘ਮੁਢਲੇ ਤੌਰ ’ਤੇ ਅਸੀਂ ਪਾਇਆ ਹੈ ਕਿ ਸੀਬੀਆਈ ਵੱਲੋਂ ਮੁਕਾਬਲੇ ਦੀ ਅਸਲੀਅਤ ਦੀ ਜਾਂਚ ਕਰਨ ਦੀ ਥਾਂ ਆਈਬੀ ਵੱਲੋਂ ਦਿੱਤੀਆਂ ਖੁਫੀਆਂ ਰਿਪੋਰਟਾਂ ਦੀ ਅਸਲੀਅਤ ਜਾਨਣ ਵੱਲ ਵੱਧ ਤਵੱਜੋ ਦਿੱਤੀ ਜਾ ਰਹੀ ਹੈ।’’ ਅਦਾਲਤ ਨੇ ਕਿਹਾ, ‘‘ਜਾਪਦਾ ਹੈ ਕਿ ਪਿਛਲੇ ਇਕ ਮਹੀਨੇ ਤੋਂ ਤੁਹਾਡੀ ਇਹ ਪਤਾ ਲਾਉਣ ਵਿਚ ਵੱਧ ਰੁਚੀ ਸੀ ਕਿ ਮਾਰੇ ਗਏ ਵਿਅਕਤੀ ਅਤਿਵਾਦੀ ਸਨ ਜਾਂ ਨਹੀਂ ਪਰ ਅਦਾਲਤ ਦਾ ਇਸ ਨਾਲ ਕੋਈ ਸਰੋਕਾਰ ਨਹੀਂ ਹੈ ਕਿ ਉਹ ਅਤਿਵਾਦੀ ਸਨ ਜਾਂ ਆਮ ਇਨਸਾਨ। ਕਿਸੇ ਵੀ ਹਾਲਤ ਵਿਚ ਉਨ੍ਹਾਂ ਨੂੰ ਇਸ ਤਰ੍ਹਾਂ ਨਹੀਂ ਸੀ ਮਾਰ ਮੁਕਾਇਆ ਜਾਣਾ ਚਾਹੀਦਾ।’’ ਅਦਾਲਤ ਨੇ ਸੀਬੀਆਈ ਨੂੰ ਇਹ ਸਫਾਈ ਦੇਣ ਲਈ ਕਿਹਾ ਕਿ ਉਹ ਮੁਲਜ਼ਮਾਂ ਦੀ ਗ੍ਰਿਫਤਾਰੀ ਦੇ 90 ਦਿਨਾਂ ਦੌਰਾਨ ਚਾਰਜਸ਼ੀਟ ਦਾਖਲ ਕਰਨ ਵਿਚ ਕਿਉਂ ਨਾਕਾਮ  ਰਹੀ। ਇਸ ਦੇ ਜਵਾਬ ਵਿਚ ਜਾਂਚ ਏਜੰਸੀ ਨੇ ਕਿਹਾ ਕਿ ਇਹ ਸਾਜ਼ਿਸ਼ ਦਾ ਇਕ ਬੜਾ ਵੱਡਾ ਕੇਸ ਹੈ ਅਤੇ ਜਾਂਚ ਦੌਰਾਨ ਇਕ ਤੋਂ ਇਕ ਖੁਲਾਸੇ ਹੋ ਰਹੇ ਹਨ ਜਿਸ ਕਾਰਨ ਦੇਰ ਹੋ ਰਹੀ ਹੈ।