ਬਿਲ 21 ਦੇ ਖ਼ਿਲਾਫ਼ ਸਰੀ ਸਿਟੀ ਕੌਂਸਲ ‘ਚ ਲਿਆਂਦਾ ਮਤਾ ਸਰਬ-ਸੰਮਤੀ ਨਾਲ ਪਾਸ

ਸਰੀ (ਅਕਾਲ ਗਾਰਡੀਅਨ ਬਿਊਰੋ)- ਕੈਨੇਡੀਅਨ ਸੂਬੇ ਕਿਊਬੈੱਕ ‘ਚ ਸਰਕਾਰੀ ਮੁਲਾਜ਼ਮਾਂ ਨੂੰ ਧਾਰਮਿਕ ਚਿੰਨ੍ਹ ਪਹਿਨਣੋਂ ਰੋਕਣ ਵਾਲੇ ਬਿਲ 21 ਦੇ ਖ਼ਿਲਾਫ਼ ਸਰੀ ਦੀ ਸਿਟੀ ਕੌਂਸਲ ‘ਚ ਕੌਂਸਲਰ ਬਰੈਂਡਾ ਲੌਕ ਵਲੋਂ ਮਤਾ ਲਿਆਂਦਾ ਗਿਆ, ਜਿਸਨੂੰ ਕੌਂਸਲ ਨੇ ਸਰਬ-ਸੰਮਤੀ ਨਾਲ ਪਾਸ ਕਰ ਦਿੱਤਾ। ਇਸ ਬਿਲ ਦਾ ਵਿਰੋਧ ਕਰਨ ਦੀ ਗੱਲ ਕਿਊਬੈਕ ਤੋਂ ਆਪਣਾ ਟਿਕਾਣਾ ਬਦਲ ਕੇ ਸਰੀ ਲਿਆਉਣ ਵਾਲੀ ਅਧਿਆਪਕਾ ਅੰਮ੍ਰਿਤ ਕੌਰ ਨੇ ਚਲਾਈ ਸੀ, ਜਿਸ ‘ਤੇ ਕੰਮ ਕਰਦਿਆਂ ਸਿਟੀ ਆਫ ਸਰੀ ਨੇ ਇਸ ਵਿਤਕਰੇ ਭਰਪੂਰ ਬਿਲ ਦੇ ਵਿਰੋਧ ‘ਚ ਖੜਨ ਦਾ ਅਹਿਦ ਲਿਆ। ਇਸ ਤੋਂ ਪਹਿਲਾਂ ਟਰਾਂਟੋ, ਕੈਲਗਰੀ, ਵਿਕਟੋਰੀਆ ਆਦਿ ਸ਼ਹਿਰਾਂ ਦੀਆਂ ਕੌਂਸਲਾਂ ਵੀ ਵਿਤਕਰੇ ਭਰਭੂਰ ਇਸ ਕਿਊਬੈੱਕੀ ਬਿਲ ਦੇ ਖਿਲਾਫ ਮਤੇ ਪਾਸ ਕਰ ਚੁੱਕੀਆਂ ਹਨ।