ਸਾਬਕਾ ਫ਼ੌਜੀ ਅਧਿਕਾਰੀ ਨੇ ਪਤਨੀ ਦੇ ਕੀਤੇ 100 ਟੁਕੜੇ

ਭੁਵਨੇਸ਼ਵਰ- ਉੜੀਸਾ 'ਚ ਫ਼ੌਜ ਦੇ ਸੇਵਾ ਮੁਕਤ ਅਧਿਕਾਰੀ ਨੇ ਅਪਣੀ ਪਤਨੀ ਦੀ ਪਹਿਲਾਂ ਬੇਰਹਿਮੀ ਨਾਲ ਹਤਿਆ ਕੀਤੀ ਅਤੇ ਫਿਰ ਉਸ ਦੇ ਸਰੀਰ ਨੂੰ 100 ਟੁਕੜਿਆਂ 'ਚ ਵੱਢ ਦਿਤਾ। ਉਹ ਪਿਛਲੇ ਕਈ ਦਿਨਾਂ ਤੋਂ ਲਾਸ਼ ਦੇ ਟੁਕੜਿਆਂ ਨੂੰ ਟਿਕਾਣੇ ਲਾ ਰਿਹਾ ਸੀ ਪਰ ਸ਼ੁੱਕਰਵਾਰ ਰਾਤ ਮੁਲਜ਼ਮ ਨੂੰ ਫੜ ਲਿਆ ਗਿਆ। ਇਹ ਸਨਸਨੀਖ਼ੇਜ਼ ਵਾਰਦਾਤ ਕਰੀਬ 15 ਦਿਨ ਪਹਿਲਾਂ ਹੋਈ ਪਰ ਇਸ ਦਾ ਪਤਾ ਸ਼ੁੱਕਰਵਾਰ ਨੂੰ ਚਲਿਆ। ਫ਼ੌਜ ਦੇ ਸਾਬਕਾ ਅਧਿਕਾਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। 

ਡੀਸੀਪੀ ਨਿਤਿਨਜੀਤ ਸਿੰਘ ਨੇ ਦਸਿਆ ਕਿ ਇਹ ਪਤਾ ਲਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਕਿ ਉਸ ਨੇ ਹਤਿਆ ਕਿਉਂ ਕੀਤੀ। ਉਂਜ ਉਸ ਨੇ ਅਪਣਾ ਜੁਰਮ ਕਬੂਲ ਲਿਆ ਹੈ। ਸੋਮਨਾਥ ਦੀ ਪਤਨੀ ਉਸਾਕਸ਼ੀ ਦੇ ਸਰੀਰ ਦੇ ਅੰਗ ਘਰ 'ਚ ਇਕ ਡੱਬੇ 'ਚੋਂ ਮਿਲੇ ਜੋ ਪੂਰੀ ਤਰ੍ਹਾਂ ਸੜ ਚੁੱਕੇ ਸਨ। ਮਾਮਲੇ ਦਾ ਤਦ ਪਤਾ ਚਲਿਆ ਜਦ ਸੋਮਨਾਥ ਦਾ ਰਿਸ਼ਤੇਦਾਰ ਉਸ ਦੇ ਘਰ ਪੁਜਿਆ। ਦਰਅਸਲ ਸੋਮਨਾਥ ਦੇ ਅਮਰੀਕਾ ਰਹਿੰਦੇ ਮੁੰਡੇ ਨੇ ਕਈ ਵਾਰ ਘਰ ਫ਼ੋਨ ਕੀਤਾ ਪਰ ਕਿਸੇ ਨੇ ਚੁਕਿਆ ਨਹੀਂ। ਉਸ ਨੇ ਕਿਸੇ ਰਿਸ਼ਤੇਦਾਰ ਨੂੰ ਕਿਹਾ ਕਿ ਉਹ ਘਰ ਜਾਵੇ। ਜਦ ਰਿਸ਼ਤੇਦਾਰ ਘਰ ਪੁਜਿਆ ਤਾਂ ਉਸ ਨੂੰ ਹਾਲਾਤ ਅਜੀਬ ਜਿਹੇ ਲੱਗੇ। ਸੋਮਨਾਥ ਉਸ ਨੂੰ ਦੇਖ ਕੇ ਘਬਰਾ ਗਿਆ। ਜਦ ਰਿਸ਼ਤੇਦਾਰ ਨੇ ਉਸਾਕਸ਼ੀ ਬਾਰੇ ਪੁਛਿਆ ਤਾਂ ਉਹ ਬਹਾਨੇ ਬਣਾਉਣ ਲੱਗਾ। ਫਿਰ ਉਸ ਦੀ ਨਜ਼ਰ ਡੱਬੇ 'ਤੇ ਪਈ ਜਿਸ 'ਚ ਗਲੇ-ਸੜੇ ਅੰਗ ਪਏ ਸਨ। ਜਿਸ ਤੋਂ ਬਾਅਦ ਉਸ ਨੇ ਪੁਲਿਸ ਨੂੰ ਬੁਲਾ ਲਿਆ।