ਨਕਲੀ ਨਸ਼ੇ ਬਣ ਰਹੇ ਨੇ ਓਵਰਡੋਜ਼ ਦਾ ਕਾਰਨ

ਸਰੀ-ਵੈਨਕੂਵਰ ਇਲਾਕੇ ‘ਚ ਨਕਲੀ ਨਸ਼ੇ ਓਵਰਡੋਜ਼ ਕਾਰਨ ਹੋ ਰਹੀਆਂ ਮੌਤਾਂ ਦਾ ਵੱਡਾ ਕਾਰਨ ਹਨ, ਜਿਨ੍ਹਾਂ ਦੀ ਭੇਟ ਕੁਝ ਪੰਜਾਬੀ ਵੀ ਚੜ੍ਹ ਰਹੇ ਹਨ। ਅਜਿਹੀਆਂ ਖਬਰਾਂ ਬਾਹਰ ਨਹੀਂ ਆਉਂਦੀਆਂ, ਇਸ ਕਰਕੇ ਆਮ ਲੋਕਾਂ ਨੂੰ ਪਤਾ ਨਹੀਂ ਲਗਦਾ ਪਰ ਇਹ ਰੁਝਾਨ ਰੁਕਣ ਦਾ ਨਾਮ ਨਹੀਂ ਲੈ ਰਿਹਾ।

ਓਵਰਡੋਜ਼ ਹੋ ਕੇ ਮਰਨ ਵਾਲੇ ਪੰਜਾਬੀਆਂ ‘ਚੋਂ ਵੱਡੀ ਗਿਣਤੀ ਪੰਜਾਬ ਤੋਂ ਨਵੇਂ ਆਏ ਪੰਜਾਬੀ ਹਨ, ਜਿਨ੍ਹਾਂ ‘ਚ ਨੌਜਵਾਨਾਂ ਤੋਂ ਲੈ ਕੇ ਅੱਧਖੜ ਉਮਰ ਦੇ ਵਿਅਕਤੀ ਸ਼ਾਮਲ ਹਨ, ਜੋ ਪਿੱਛਿਓਂ ਨਸ਼ਾ ਕਰਨ ਦੇ ਆਦੀ ਹਨ।

ਹੈਰੋਇਨ, ਸਮੈਕ ਤੋਂ ਇਲਾਵਾ ਹੁਣ ਅਫੀਮ, ਡੋਡਿਆਂ ਅਦਿ ‘ਚ ਵੀ ਫੈਂਟਾਨਿਲ ਜਾਂ ਹੋਰ ਕੈਮੀਕਲ ਮਿਲਾ ਕੇ ਵੇਚੇ ਜਾ ਰਹੇ ਹਨ, ਜੋ ਜਾਨਲੇਵਾ ਸਿੱਧ ਹੋ ਸਕਦੇ ਹਨ।

ਚਾਹੀਦਾ ਤਾਂ ਇਹੀ ਹੈ ਕਿ ਕੋਈ ਨਸ਼ਾ ਕੀਤਾ ਹੀ ਨਾ ਜਾਵੇ ਪਰ ਜੇਕਰ ਕੋਈ ਆਦੀ ਬਣ ਹੀ ਚੁੱਕਾ ਹੈ ਤਾਂ ਇਸ ਗੱਲ ਦਾ ਵਿਸ਼ੇਸ਼ ਖਿਆਲ ਰੱਖਿਆ ਜਾਵੇ ਕਿ ਨਸ਼ੇ ਦਾ ਭੁਸ ਪੂਰਾ ਕਰਨ ਲਈ ਲਈ ਗਈ ਡੋਜ਼ ਆਖਰੀ ਡੋਜ਼ ਵੀ ਬਣ ਸਕਦੀ ਹੈ। ਇਸ ਚਿੱਕੜ ‘ਚੋਂ ਕਿਸੇ ਨਾ ਕਿਸੇ ਤਰੀਕੇ ਨਿਕਲਣ ਦੀ ਕੋਸ਼ਿਸ਼ ਕੀਤੀ ਜਾਵੇ।

ਸਰਕਾਰਾਂ ਨੂੰ ਸਭ ਪਤਾ ਕਿ ਇਹ ਨਸ਼ਾ ਕਿੱਥੋਂ ਆ ਰਿਹਾ ਤੇ ਕਿਵੇਂ ਆਮ ਲੋਕਾਂ ਤੱਕ ਇਹ ਜ਼ਹਿਰ ਪੁੱਜ ਰਹੀ ਹੈ ਪਰ ਉਨ੍ਹਾਂ ਦੀ ਇਸਨੂੰ ਖਤਮ ਕਰਨ ‘ਚ ਕੋਈ ਦਿਲਚਸਪੀ ਨਹੀਂ ਜਾਪਦੀ।

ਗੁਰਪ੍ਰੀਤ ਸਿੰਘ ਸਹੋਤਾ/ ਸਰੀ/ ਚੜ੍ਹਦੀਕਲਾ ਬਿਊਰੋ