ਕੈਨੇਡੀਅਨ ਪੁਲਿਸ ਮੁਖੀਆਂ ਨੇ ਕੈਨੇਡਾ ਸਰਕਾਰ ਨੂੰ ਨਸ਼ਿਆਂ ਸਬੰਧੀ ਦਿੱਤੀ ਨਿਵੇਕਲੀ ਸਲਾਹ

ਕੈਨੇਡਾ ਭਰ ਦੀਆਂ ਪੁਲਿਸ ਫੋਰਸਾਂ ਦੇ ਮੁਖੀਆਂ ਨੇ ਕੈਨੇਡਾ ਸਰਕਾਰ ਨੂੰ ਨਸ਼ਿਆਂ ਦੀ ਸਮੱਸਿਆ ਨਾਲ ਸਿੱਝਣ ਲਈ ਨਿਵੇਕਲੀ ਸਲਾਹ ਦਿੱਤੀ ਹੈ। ਉਨ੍ਹਾਂ ਕਿਹਾ ਹੈ ਕਿ ਨਿੱਜੀ ਵਰਤੋਂ ਲਈ ਡਰੱਗ ਵਰਤਣ ਵਾਲਿਆਂ ਨੂੰ ਅਪਰਾਧ ਦੇ ਘੇਰੇ 'ਚੋਂ ਬਾਹਰ ਰੱਖਣਾ ਚਾਹੀਦਾ ਹੈ ਅਤੇ ਡਰੱਗ ਨੀਤੀ ਸਬੰਧੀ ਸੁਧਾਰਾਂ ਬਾਰੇ ਖੋਜ ਕਰਨ ਲਈ ਕੌਮੀ ਟਾਸਕ ਫੋਰਸ ਬਣਾਈ ਜਾਣੀ ਚਾਹੀਦੀ ਹੈ।

"ਕੈਨੇਡੀਅਨ ਐਸੋਸੀਏਸ਼ਨ ਆਫ ਚੀਫਸ ਆਫ ਪੁਲਿਸ" ਦੇ ਮੁਖੀ ਐਡਮ ਪਾਮਰ, ਜੋ ਕਿ ਵੈਨਕੂਵਰ ਪੁਲਿਸ ਦੇ ਮੁਖੀ ਵੀ ਹਨ, ਨੇ ਕਿਹਾ ਕਿ ਪੰਜ ਸਾਲ ਅਸੀਂ ਇਸ ਮੁੱਦੇ 'ਤੇ ਕੰਮ ਕੀਤਾ ਅਤੇ ਇਸ ਨਤੀਜੇ 'ਤੇ ਪਹੁੰਚੇ ਹਾਂ ਕਿ ਨਸ਼ਿਆਂ ਦਾ ਸੇਵਨ ਅਤੇ ਨਸ਼ਿਆਂ ਦੀ ਆਦਤ ਇੱਕ ਜਨਤਕ ਸਿਹਤ ਸਮੱਸਿਆ ਹੈ, ਜਿਸਨੂੰ ਬਿਮਾਰਾਂ ਵਾਂਗ ਇਲਾਜ ਕਰਕੇ ਠੀਕ ਕੀਤਾ ਜਾ ਸਕਦਾ ਹੈ, ਨਾ ਕਿ ਨਸ਼ਾ ਵਰਤਣ ਵਾਲਿਆਂ 'ਤੇ ਮੁਕੱਦਮੇ ਚਲਾ ਕੇ।

ਪਾਮਰ ਨੇ ਕਿਹਾ ਕਿ ਨਸ਼ੇ ਦੇ ਆਦੀ ਹੋ ਜਾਣਾ ਕੋਈ ਅਪਰਾਧ ਨਹੀਂ ਤੇ ਇਸਨੂੰ ਅਪਰਾਧ ਵਾਂਗ ਨਜਿੱਠਿਆ ਜਾਣਾ ਚਾਹੀਦਾ ਹੈ। ਸਾਡੀ ਸਿਫਾਰਿਸ਼ ਮੁਤਾਬਕ ਕੈਨੇਡਾ ਨੂੰ ਚਾਹੀਦਾ ਕਿ ਉਹ ਇਸ ਮਸਲੇ ਨੂੰ ਕਨੂੰਨੀ ਆਧਾਰ 'ਤੇ ਨਜਿੱਠਣ ਦੀ ਬਜਾਇ ਸਰੀਰਕ ਅਤੇ ਮਾਨਸਿਕ ਸਿਹਤ ਦੇ ਆਧਾਰ 'ਤੇ ਨਜਿੱਠੇ।

ਪੁਲਿਸ ਮੁਖੀਆਂ ਦੀ ਸੋਚ ਹੈ ਕਿ ਨਸ਼ਾ ਵੇਚਣ ਵਾਲੇ ਟੰਗੇ ਜਾਣ, ਨਾ ਕਿ ਨਸ਼ਾ ਵਰਤਣ ਦੇ ਆਦੀ ਹੋਏ ਲੋਕ। ਇਸ ਨਾਲ ਪੁਲਿਸ ਅਤੇ ਅਦਾਲਤਾਂ 'ਤੇ ਬੋਝ ਵੀ ਘਟੇਗਾ, ਜਿਸ ਕਾਰਨ ਉਹ ਨਸ਼ਾ ਵੇਚਣ ਵਾਲਿਆਂ ਦੁਆਲੇ ਹੋ ਸਕਣਗੇ।

ਬੀਸੀ ਦੇ ਮੁੱਖ ਮੰਤਰੀ ਜੌਨ ਹੌਰੇਗਨ ਨੇ ਪੁਲਿਸ ਮੁਖੀਆਂ ਦੇ ਇਸ ਫੈਸਲੇ ਨਾਲ ਸਹਿਮਤੀ ਜਤਾਉਂਦਿਆਂ ਕਿਹਾ ਹੈ ਕਿ ਇਹ ਸਹੀ ਤਰੀਕਾ ਹੋਵੇਗਾ।

• ਗੁਰਪ੍ਰੀਤ ਸਿੰਘ ਸਹੋਤਾ/ ਸਰੀ/ ਚੜ੍ਹਦੀ ਕਲਾ ਬਿਊਰੋ