ਕੁਕਿਟਲਮ ਪੁਲਿਸ ਨੂੰ ਨਿੰਬੂ ਟੰਗਣ ਵਾਲੇ ਦੀ ਭਾਲ਼

ਸਰੀ ਨਾਲ ਵਗਦਾ ਫਰੇਜ਼ਰ ਦਰਿਆ ਟੱਪ ਕੇ ਮੌਜੂਦ ਸ਼ਹਿਰ ਕੁਕਿਟਲਮ ਦੀ ਪੁਲਿਸ ਉਨ੍ਹਾਂ ਵਿਅਕਤੀਆਂ ਦੀ ਭਾਲ਼ ਕਰ ਰਹੀ ਹੈ, ਜੋ ਸ਼ਹਿਰ ਦੇ ਪਾਰਕਾਂ 'ਚ ਪਗਡੰਡੀਆਂ ਦੁਆਲੇ ਦਰਖਤਾਂ 'ਤੇ ਸੂਈਆਂ ਨਾਲ ਵਿੰਨ੍ਹੇ ਨਿੰਬੂ ਟੰਗ ਜਾਂਦੇ ਹਨ।

ਗੇਟਸ ਪਾਰਕ ਅਤੇ ਕੁਕਿਟਲਮ ਦਰਿਆ ਨਾਲ ਚਲਦੀਆਂ ਪਗਡੰਡੀਆਂ ਤੋਂ ਇਹ ਨਿੰਬੂ ਲੱਭੇ ਹਨ, ਜਿਨ੍ਹਾਂ ਨੂੰ ਦੁਫਾੜ ਕਰਕੇ ਵਿੱਚ ਕੁਝ ਭਰਿਆ ਗਿਆ ਹੈ ਅਤੇ ਫਿਰ ਸੂਈਆਂ ਅਤੇ ਲਾਲ ਧਾਗੇ ਨਾਲ ਮੁੜ ਜੋੜਿਆ ਗਿਆ ਹੈ।

ਪੁਲਿਸ ਨੂੰ ਡਰ ਹੈ ਕਿ ਇਹ ਸੂਈਆਂ ਡਿਗ ਕੇ ਕਿਸੇ ਦੇ ਚੁੱਭ ਨਾ ਜਾਣ ਜਾਂ ਇਨ੍ਹਾਂ 'ਚ ਕੋਈ ਕੀਟਾਣੂ ਨਾ ਹੋਣ, ਜੋ ਕਿਸੇ ਦੀ ਸਿਹਤ ਲਈ ਹਾਨੀਕਾਰਕ ਹੋਣ।

ਪੁਲਿਸ ਨੇ ਜਿੱਥੇ ਗਵਾਹਾਂ ਨੂੰ ਅੱਗੇ ਆਉਣ ਦੀ ਬੇਨਤੀ ਕੀਤੀ ਹੈ, ਉੱਥੇ ਨਾਲ ਹੀ ਜਨਤਾ ਨੂੰ ਚੌਕੰਨਾ ਕਰਦਿਆਂ ਕਿਹਾ ਹੈ ਕਿ ਅਜਿਹੇ ਨਿੰਬੂਆਂ ਨੂੰ ਛੇੜਿਆ ਨਾ ਜਾਵੇ, ਬਲਕਿ ਪੁਲਿਸ ਨੂੰ ਸੂਚਿਤ ਕੀਤਾ ਜਾਵੇ। ਪੁਲਿਸ ਨੇ ਨਿੰਬੂ ਟੰਗਣ ਵਾਲੇ ਨੂੰ ਪੁੱਛਿਆ ਹੈ ਕਿ ਉਹ ਦੱਸੇ ਕਿ ਅਜਿਹਾ ਕਰਕੇ ਕਿ ਉਹ ਕਰਨਾ ਕੀ ਚਾਹੁੰਦਾ ਹੈ।

ਪੁਲਿਸ ਨੂੰ ਸ਼ਾਇਦ ਜਾਣਕਾਰੀ ਨਹੀਂ ਕਿ ਇਹ ਕਿਸੇ ਟੂਣੇ-ਟਾਮ੍ਹਣ ਵਾਲੇ ਦਾ ਕਾਰਾ ਹੋ ਸਕਦਾ ਹੈ। ਹਜ਼ਾਰਾਂ ਅੰਧਵਿਸ਼ਵਾਸੀ ਲੋਕਾਂ ਨੂੰ ਭੋਟਣ ਲਈ ਤਰਾਂ ਤਰਾਂ ਦੇ ਸਾਧ-ਜੋਸ਼ੀ-ਬਾਬੇ-ਜਾਦੂਗਰ ਕੈਨੇਡਾ 'ਚ ਸਰਗਰਮ ਹਨ, ਜੋ ਅੰਧਵਿਸ਼ਵਾਸੀ ਲੋਕਾਂ ਨੂੰ ਸਮੱਸਿਆਵਾਂ ਦੇ ਹੱਲ ਲਈ ਭੋਟ ਕੇ ਅਜਿਹੇ ਕੁਰਾਹੇ ਪਾ ਦਿੰਦੇ ਹਨ। ਬਹੁਤ ਵਾਰ ਇਹ ਫੜੇ ਵੀ ਜਾ ਚੁੱਕੇ ਹਨ ਪਰ ਦਿਨ ਬਦਿਨ ਇਨ੍ਹਾਂ ਦੀ ਗਿਣਤੀ ਵਧਦੀ ਜਾ ਰਹੀ ਹੈ।

ਇਨ੍ਹਾਂ 'ਚੋਂ ਬਹੁਤੇ ਠੱਗ ਕੈਨੇਡਾ ਵਿੱਚ ਟੂਰਿਸਟ ਵੀਜ਼ੇ 'ਤੇ ਆਉਂਦੇ ਹਨ ਅਤੇ ਗੈਰਕਨੂੰਨੀ ਤੌਰ 'ਤੇ ਅਜਿਹੇ ਘਟੀਆ ਕੰਮ ਕਰਦਿਆਂ ਹਰ ਸਾਲ ਹਜ਼ਾਰਾਂ ਡਾਲਰ ਬਣਾ ਕੇ ਤੁਰਦੇ ਲਗਦੇ ਹਨ ਕਿਉਂਕਿ ਕੈਨੇਡਾ ਅੰਦਰ ਵੀ ਮਨੁੱਖੀ ਜਾਮੇ 'ਚ ਵਿਚਰਦੀਆਂ ਭੇਡਾਂ ਦੀ ਕੋਈ ਕਮੀ ਨਹੀਂ ਹੈ।

• ਗੁਰਪ੍ਰੀਤ ਸਿੰਘ ਸਹੋਤਾ/ ਸਰੀ/ ਚੜ੍ਹਦੀ ਕਲਾ ਬਿਊਰੋ