ਕੈਲਗਰੀ ਦੇ ਕਿਸਾਨ ਚੋਰੀ ਸਾਗ ਤੋੜਨ ਵਾਲਿਆਂ ਤੋਂ ਦੁਖੀ

ਬੀਤੇ ਕੁਝ ਹਫਤਿਆਂ ਤੋਂ ਕੈਨੇਡਾ ਦੇ ਸੂਬੇ ਅਲਬਰਟਾ ਵਿੱਚ ਮੌਜੂਦ ਸ਼ਹਿਰ ਕੈਲਗਰੀ ਦੇ ਬਾਹਰਵਾਰ ਸਰੋਂ ਬੀਜਣ ਵਾਲੇ ਗੋਰੇ ਕਿਸਾਨ ਪੁਲਿਸ ਕੋਲ ਸ਼ਿਕਾਇਤ ਕਰ ਰਹੇ ਹਨ ਕਿ ਲੋਕ ਉਨ੍ਹਾਂ ਦੀ ਫਸਲ ਖਰਾਬ ਕਰ ਰਹੇ ਹਨ।

ਕੁਝ ਨੇ ਸ਼ਿਕਾਇਤ ਕੀਤੀ ਕਿ ਕੁਝ ਲੋਕ ਇੱਕਠੇ ਹੋ ਕੇ ਆਉਂਦੇ ਹਨ ਅਤੇ ਸਰੋਂ ਦੇ ਪੱਤੇ ਤੋੜ ਕੇ ਜਾਂ ਬੂਟਾ ਉਪਰੋਂ ਉਪਰੋਂ ਵੱਢ ਕੇ ਗੱਡੀਆਂ ਭਰ ਭਰ ਲੈ ਜਾਂਦੇ ਹਨ। ਇੱਕ ਗੋਰੇ ਕਿਸਾਨ ਦਾ ਕਹਿਣਾ ਹੈ ਕਿ ਉਸਦੀ ਦੋ ਏਕੜ ਫਸਲ ਖਰਾਬ ਹੋ ਗਈ, ਹੁਣ ਬੀਅ ਨਹੀਂ ਪੈਣਾ।

ਇੱਕ ਥਾਂ ਤਾਂ ਗੁਆਂਢੀ ਨੇ ਸਾਗ ਤੋੜਦੇ ਲੋਕ ਦੇਖ ਕੇ ਪੁਲਿਸ ਸੱਦ ਲਈ ਅਤੇ ਪੁਲਿਸ ਨੇ ਬਿਨਾ ਇਜ਼ਾਜ਼ਤ ਸਾਗ ਤੋੜਦੇ ਲੋਕਾਂ ਨੂੰ ਜੁਰਮਾਨਾ ਕਰਕੇ ਘਰ ਤੋਰਿਆ।

ਗੋਰੇ ਕਿਸਾਨਾਂ ਲਈ ਇਹ ਸਮਝਣਾ ਔਖਾ ਹੋ ਰਿਹਾ ਕਿ ਆਖਰ ਏਨੇ ਸਾਗ ਦਾ ਇਹ ਸ਼ਹਿਰ ਤੋਂ ਆਉਣ ਵਾਲੇ ਲੋਕ ਕਰਦੇ ਕੀ ਹਨ!

ਦੱਸਣਯੋਗ ਹੈ ਕਿ ਕੈਲਗਰੀ ਹੁਣ ਪੰਜਾਬੀਆਂ ਦੀ ਚੋਖੀ ਵਸੋਂ ਵਾਲਾ ਸ਼ਹਿਰ ਬਣ ਚੁੱਕਾ ਹੈ।

ਕੌਣ ਹੋ ਸਕਦੇ ਇਹ ਲੋਕ?

ਕੈਨੇਡਾ ਦੇ ਕੌਮੀ ਚੈਨਲ ਸੀਬੀਸੀ ਨੇ ਇਸ 'ਤੇ ਅੱਜ ਇੱਕ ਸਟੋਰੀ ਕੀਤੀ ਹੈ ਪਰ ਸਾਗ ਚੋਰਾਂ ਦੀ ਸ਼ਨਾਖਤ ਬਾਰੇ ਕੋਈ ਇਸ਼ਾਰਾ ਨਹੀਂ ਕੀਤਾ ਪਰ ਇਹ ਖਬਰ ਪੜ੍ਹਨ ਵਾਲੇ ਪੰਜਾਬੀ ਚੰਗੀ ਤਰਾਂ ਜਾਣਦੇ ਹਨ ਕਿ ਇਹ ਸਾਗ ਚੋਰ ਕੌਣ ਹੋ ਸਕਦੇ ਹਨ ਅਤੇ ਇੰਨੇ ਸਾਗ ਦਾ ਕੀ ਕੀਤਾ ਜਾਂਦਾ!

ਹੁਣ ਗੋਰੇ ਕਿਸਾਨਾਂ ਨੂੰ ਕੀ ਪਤਾ ਕਿ ਏਨੀ ਦੂਰੋਂ ਮਿਹਨਤ ਨਾਲ ਚੋਰੀ ਸਾਗ ਤੋੜ ਕੇ ਸ਼ਹਿਰ ਲਿਜਾ ਕੇ ਲਿਹਾਜਾਂ ਵੀ ਪੂਰਨੀਆਂ ਹੁੰਦੀਆਂ। ਧੀ-ਪੁੱਤ-ਦਰਾਣੀ-ਜੇਠਾਣੀ-ਨਨਾਣ-ਭੈਣ ਦਾ ਸਾਰਾ ਟੱਬਰ ਵੀ ਖੁਸ਼ ਕਰਨਾ, ਘਰੋ-ਘਰ ਸਾਗ ਵੰਡ ਕੇ।

• ਗੁਰਪ੍ਰੀਤ ਸਿੰਘ ਸਹੋਤਾ/ ਸਰੀ/ ਚੜ੍ਹਦੀ ਕਲਾ ਬਿਊਰੋ