ਰੌਕੀ ਮਾਊਂਟੇਨਜ਼ 'ਚ ਸੈਲਾਨੀ ਬੱਸ ਪਲਟਣ ਕਾਰਨ 3 ਮੌਤਾਂ

Posted on July 19th, 2020

ਬਲਜੀਤ ਸਿੰਘ ਸਹੋਤਾ/ ਐਡਮਿੰਟਨ/ ਚੜ੍ਹਦੀ ਕਲਾ ਬਿਊਰੋ

ਬੀਸੀ ਅਤੇ ਅਲਬਰਟਾ ਵਿਚਾਲੇ ਪੈਂਦੇ ਜਗਤ ਪ੍ਰਸਿੱਧ ਰੌਕੀ ਮਾਊਂਟੇਨਜ਼ 'ਤੇ ਗਲੇਸ਼ੀਅਰ ਵਿਖਾਲਣ ਲਿਜਾ ਰਹੀ ਇੱਕ ਟੂਰਿਸਟ ਬੱਸ ਦੇ ਪਲਟ ਜਾਣ ਨਾਲ 3 ਮੌਤਾਂ ਹੋ ਗਈਆਂ ਜਦਕਿ 14 ਹੋਰ ਜ਼ਖਮੀ ਹੋ ਗਏ।

ਹਰ ਸਾਲ ਗਰਮੀਆਂ 'ਚ ਦੁਨੀਆਂ ਭਰ ਤੋਂ ਸੈਲਾਨੀ ਜੈਸਪਰ ਲਾਗੇ ਇਹ ਗਲੇਸ਼ੀਅਰ ਅਤੇ ਰੌਕੀ ਮਾਊਂਟੇਨਜ਼ ਦੇਖਣ ਆਉਂਦੇ ਹਨ, ਜਿਨ੍ਹਾਂ ਨੂੰ ਬਰਫ ਅਤੇ ਪੱਥਰਾਂ 'ਚ ਚੱਲ ਸਕਣ ਵਾਲੀਆਂ ਬਹੁਤ ਵੱਡੇ-ਵੱਡੇ ਟਾਇਰਾਂ ਵਾਲੀਆਂ ਬੱਸਾਂ 'ਚ ਸਵਾਰ ਕਰਕੇ ਗਲੇਸ਼ੀਅਰ ਤੱਕ ਲਿਜਾਇਆ ਜਾਂਦਾ ਹੈ।

ਉਕਤ ਬੱਸ ਦੁਨੀਆ ਦੇ ਸਭ ਤੋਂ ਵੱਡੇ ਨੌਨ-ਪੋਲਰ ਕੋਲੰਬੀਆ ਆਈਸਫੀਲਡ ਵਿੱਚ ਜਾ ਰਹੀ ਸੀ, ਜਦ ਅਚਾਨਕ ਬੇਕਾਬੂ ਹੋ ਕੇ ਪਲਟੀਆਂ ਖਾ ਗਈ।

ਹਾਦਸੇ ਦੇ ਕਾਰਨ ਬਾਰੇ ਏਨਾ ਹੀ ਕਿਹਾ ਜਾ ਰਿਹਾ ਹੈ ਕਿ ਪਹਾੜ ਤੋਂ ਅਚਾਨਕ ਪੱਥਰ ਰੁੜਨ ਕਾਰਨ ਇਹ ਹਾਦਸਾ ਵਾਪਰਿਆ।

ਜ਼ਖਮੀਆਂ ਨੂੰ ਇਲਾਜ ਲਈ ਐਡਮਿੰਟਨ ਅਤੇ ਕੈਲਗਰੀ ਹਸਪਤਾਲਾਂ 'ਚ ਲਿਜਾਇਆ ਗਿਆ ਹੈ। ਅਲਬਰਟਾ ਦੇ ਮੁੱਖ ਮੰਤਰੀ ਜੇਸਨ ਕੇਨੀ ਨੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਹਾਦਸੇ ਦੀ ਜਾਂਚ ਦੇ ਆਦੇਸ਼ ਵੀ ਦਿੱਤੇ ਹਨ।