ਬੀਸੀ ਦੀਆਂ ਬੱਸਾਂ ਤੇ ਗੱਡੀਆਂ 'ਚ ਮਾਸਕ ਪਹਿਨਣਾ ਲਾਜ਼ਮੀ ਕਰਾਰ

ਗੁਰਪ੍ਰੀਤ ਸਿੰਘ ਸਹੋਤਾ/ ਸਰੀ/ ਚੜ੍ਹਦੀ ਕਲਾ ਬਿਊਰੋ

ਬੀਸੀ ਵਿੱਚ ਜਨਤਕ ਆਵਾਜ਼ਾਈ ਸੇਵਾਵਾਂ ਦੇਣ ਵਾਲੇ ਅਦਾਰੇ ਟਰਾਂਸਲਿੰਕ ਅਤੇ ਬੀਸੀ ਟਰਾਂਜ਼ਿਟ ਨੇ ਸੂਬੇ ਦੀਆਂ ਬੱਸਾਂ, ਸਕਾਈਟਰੇਨਾਂ, ਸੀਅ-ਬੱਸਾਂ 'ਚ ਮਾਸਕ ਪਹਿਨਣਾ ਲਾਜ਼ਮੀ ਕਰ ਦਿੱਤਾ ਹੈ। 24 ਅਗਸਤ ਤੋਂ ਬੀਸੀ ਵਾਸੀਆਂ ਨੂੰ ਇਸ ਹੁਕਮ ਦੀ ਤਾਮੀਲ ਕਰਨੀ ਪਵੇਗੀ। ਟਰਾਂਜ਼ਿਟ ਪੁਲਿਸ ਵਲੋਂ ਇਹ ਯਕੀਨੀ ਬਣਾਇਆ ਜਾਵੇਗਾ ਕਿ ਸਭ ਇਸ ਅਸੂਲ ਦੀ ਪਾਲਣਾ ਕਰਨ।

ਪੰਜ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਅਤੇ ਕਿਸੇ ਬਿਮਾਰੀ ਜਾਂ ਹੋਰ ਕਾਰਨ ਮਾਸਕ ਨਾ ਪਹਿਨ ਸਕਣ ਵਾਲੇ ਲੋਕਾਂ ਨੂੰ ਇਸਤੋਂ ਛੋਟ ਦਿੱਤੀ ਗਈ ਹੈ। ਅਜਿਹਾ ਸੂਬੇ ਦੇ ਲੋਕਾਂ ਨੂੰ ਕਰੋਨਾ ਵਾਇਰਸ ਤੋਂ ਬਚਾਉਣ ਲਈ ਕੀਤਾ ਜਾ ਰਿਹਾ ਹੈ ਕਿਉਂਕਿ ਬੱਸਾਂ, ਸਕਾਈਟਰੇਨਾਂ, ਸੀਅ-ਬੱਸਾਂ ਆਦਿ 'ਚ ਸਫਰ ਕਰਨ ਵਾਲੇ ਲੋਕਾਂ ਲਈ ਦੂਰ ਦੂਰ ਰਹਿ ਕੇ ਸਫਰ ਕਰਨਾ ਬੇਹੱਦ ਮੁਸ਼ਕਿਲ ਸਿੱਧ ਹੋ ਰਿਹਾ ਹੈ।