ਦੇਹਰਾਦੂਨ- ਕੇਦਾਰ ਨਾਥ ਧਾਮ ਵਿੱਚ ਭਗਵਾਨ ਕੇਦਾਰ ਨਾਥ ਦੀ ਪੂਜਾ ਨੂੰ ਲੈ ਕੇ ਉਤਰਾਖੰਡ ਵਿੱਚ ਧਰਮ ਗੁਰੂ ਵੰਡੇ ਗਏ ਹਨ। ਕੇਦਾਰ ਨਾਥ ਮੰਦਰ ਦੀ ਜਗ੍ਹਾ ਓਂਕਾਰੇਸ਼ਵਰ ਮੰਦਰ ਵਿੱਚ ਪੂਜਾ ਹੋਣ ਨੂੰ ਲੈ ਕੇ ਜੋਸ਼ੀਮੱਠ ਦੇ ਮੁਖੀ ਸ਼ੰਕਰਾਚਾਰੀਆ ਸਵਾਮੀ ਸਵਰੂਪਾਨੰਦ ਸਰਸਵਤੀ ਅਤੇ ਕੇਦਾਰਨਾਥ ਧਾਮ ਦੇ ਰਾਵਲ ਭੀਮਾ ਸ਼ੰਕਰ ਸ਼ਿਵਚਾਰੀਆ ਮਹਾਸਵਾਮੀ ਦੋ ਵੱਖੋ ਵੱਖ ਸਟੈਂਡ ਲੈਣ ਲੱਗ ਗਏ ਹਨ। ਸ਼ੰਕਰਾਚਾਰੀਆ ਸਵਾਮੀ ਸਵਰੂਪਾਨੰਦ ਦਾ ਕਹਿਣਾ ਹੈ ਕਿ ਭਗਵਾਨ ਕੇਦਾਰ ਨਾਥ ਦੀ ਪੂਜਾ ਸਿਰਫ ਕੇਦਾਰ ਨਾਥ ਮੰਦਰ ਵਿੱਚ ਹੋਣੀ ਚਾਹੀਦੀ ਹੈ। ਰਾਵਲ ਭੀਮਾ ਸ਼ੰਕਰ ਲਿੰਗ ਸ਼ਿਵਾਚਾਰੀਆ ਦਾ ਕਹਿਣਾ ਹੈ ਸ਼ਾਸਤਰਾਂ ਅਨੁਸਾਰ ਕੇਦਾਰ ਨਾਥ ਮੰਦਰ ਵਿੱਚ ਉਦੋਂ ਤੱਕ ਪੂਜਾ ਨਹੀਂ ਕੀਤੀ ਜਾ ਸਕਦੀ, ਜਦੋਂ ਤੱਕ ਮੰਦਰ ਦਾ ਸ਼ੁੱਧੀਕਰਣ ਨਾ ਕਰ ਲਿਆ ਜਾਏ। ਸਵਾਮੀ ਸਵਰੂਪਾਨੰਦ ਸਰਸਵਤੀ ਨੇ ਕਿਹਾ ਕਿ ਕੇਦਾਰ ਨਾਥ ਦੇ ਰਾਵਲ ਨੇ ਪ੍ਰੰਪਰਾਵਾਂ ਨੂੰ ਤੋੜਿਆ ਹੈ, ਲਿਹਾਜਾ ਉਨ੍ਹਾਂ ਨੇ ਮੰਦਰ ਵਿੱਚ ਪੂਜਾ ਕਰ ਦਾ ਅਧਿਕਾਰ ਵੀ ਗੁਆ ਦਿੱਤਾ ਹੈ। ਰਾਵਲ ਨੂੰ ਅਹੁਦੇ ਤੋਂ ਹਟਾਉਣ ਦੀ ਫਿਰ ਤੋਂ ਵਕਾਲਤ ਕਰਦੇ ਹੋਏ ਸ਼ੰਕਰਾਚਾਰੀਆ ਨੇ ਓਂਕਾਰੇਸ਼ਵਰ ਮੰਦਰ ਵਿੱਚ ਹੋ ਰਹੀ ਪੂਜਾ ਨੂੰ ਨਕਾਰ ਦਿੱਤਾ।

ਕੇਦਾਰ ਨਾਥ ਮੰਦਰ ਟੁੱਟਾ ਹੀ ਨਹੀਂ ਤਾਂ ਮੁੜ ਉਸਾਰੀ ਕਾਹਦੇ ਲਈ: ਤੋਗੜੀਆ

ਰਾਂਚੀ- ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਕੌਮਾਂਤਰੀ ਕਾਰਜਕਾਰੀ ਪ੍ਰਧਾਨ ਪ੍ਰਵੀਨ ਤੋਗੜੀਆ ਨੇ ਕਿਹਾ ਕਿ ਜਦ ਕੇਦਾਰ ਨਾਥ ਦੇ ਮੰਦਰ ਨੂੰ ਹੜ੍ਹ ‘ਚ ਕੋਈ ਨੁਕਸਾਨ ਨਹੀਂ ਹੋਇਆ ਤੇ ਉਥੋਂ ਦੀਆਂ ਸਾਰੀਆਂ ਮੂਰਤੀਆਂ ਵੀ ਸੁਰੱਖਿਅਤ ਹਨ ਤਾਂ ਇਸ ਇਤਿਹਾਸਕ ਮੰਦਰ ਦੀ ਮੁੜ ਉਸਾਰੀ ਲਈ ਇੰਨੀ ਸਿਆਸਤ ਕਿਉਂ ਹੋ ਰਹੀ ਹੈ। ਕੇਦਾਰ ਨਾਥ ਮੰਦਰ ਦੇ ਮੁੜ ਨਿਰਮਾਣ ਬਾਰੇ ਗੁਜਰਾਤ ਦੇ ਮੁੱਖ ਮੰਤਰੀ ਨਰਿੰਦਰ ਮੋਦੀ ਵਲੋਂ ਪਿਛਲੇ ਹਫਤੇ ਦਿੱਤੇ ਪ੍ਰਸਤਾਵ ਦੇ ਸਬੰਧ ‘ਚ ਤੋਗੜੀਆ ਨੇ ਕਿਹਾ ਕਿ ਕੇਦਾਰ ਨਾਥ ਮੰਦਰ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ। ਉਨ੍ਹਾਂ ਕਿਹਾ ਕਿ ਮੰਦਰ ਖੇਤਰ ਦੇ ਨੇੜੇ ਦੀਆਂ ਧਰਮਸ਼ਾਲਾਵਾਂ ਤੇ ਹੋਰ ਧਾਰਮਿਕ ਸਥਾਨ ਹੜ੍ਹ ‘ਚ ਰੁੜ੍ਹ ਗਏ ਹਨ, ਉਨ੍ਹਾਂ ਦੀ ਉਸਾਰੀ ਲਈ ਸਾਰੇ ਚਾਹਵਾਨ ਲੋਕਾਂ ਤੇ ਸੰਸਥਾਵਾਂ ਦਾ ਸਹਿਯੋਗ ਲੈ ਕੇ ਜੰਗੀ ਪੱਧਰ ‘ਤੇ ਕੰਮ ਕੀਤਾ ਜਾਣਾ ਚਾਹੀਦਾ ਹੈ। ਭਾਜਪਾ ‘ਤੇ ਹਮਲਾ ਕਰਦਿਆਂ ਤੋਗੜੀਆ ਨੇ ਕਿਹਾ ਕਿ ਜਦ ਛੱਤੀਸਗੜ੍ਹ ‘ਚ ਕਾਂਗਰਸੀ ਨੇਤਾਵਾਂ ‘ਤੇ ਨਕਸਲੀ ਹਮਲਾ ਹੋਇਆ ਤਾਂ ਭਾਜਪਾ ਨੇਤਾਵਾਂ ਨੇ ਇਸ ਨੂੰ ਕੌਮੀ ਆਫਤ ਮੰਨ ਕੇ ਕਿਹਾ ਕਿ ਇਸ ‘ਤੇ ਸਿਆਸਤ ਨਹੀਂ ਹੋਣੀ ਚਾਹੀਦੀ, ਪਰ ਹੁਣ ਜਦ ਉਤਰਾਖੰਡ ‘ਚ ਉਸ ਤੋਂ ਮਾੜੀ ਹਾਲਤ ਹੈ ਤਾਂ ਉਸ ਨੂੰ ਲੈ ਕੇ ਸਿਆਸਤ ਕਿਉਂ ਕਰ ਰਹੀ ਹੈ।