ਸਰੀ 'ਚ ਇੱਕ ਪੰਜਾਬਣ ਦਾ ਕਤਲ, ਦੋ ਜ਼ਖਮੀ

ਗੁਰਪ੍ਰੀਤ ਸਿੰਘ ਸਹੋਤਾ । ਸਰੀ । ਚੜ੍ਹਦੀ ਕਲਾ ਬਿਊਰੋ

ਸਰੀ ਦੀ 127 ਸਟਰੀਟ ਅਤੇ 66 ਐਵੇਨਿਉ ਲਾਗੇ ਮੌਜੂਦ ਇੱਕ ਟਾਊਨਹਾਊਸ ਕੰਪਲੈਕਸ ਵਿੱਚੋਂ ਪੁਲਿਸ ਨੂੰ ਇੱਕ ਔਰਤ ਬੇਹੱਦ ਗੰਭੀਰ ਹਾਲਤ 'ਚ ਜ਼ਖਮੀ ਹੋਈ ਮਿਲੀ, ਜਦਕਿ ਇੱਕ ਦੋ ਸਾਲ ਦਾ ਬੱਚਾ ਅਤੇ ਇੱਕ ਹੋਰ ਮਰਦ ਘੱਟ ਜ਼ਖਮੀ ਹਾਲਤ 'ਚ ਮਿਲੇ। ਇਹ ਘਟਨਾ ਮੰਗਲਵਾਰ ਰਾਤ ਤਕਰੀਬਨ 9 ਕੁ ਵਜੇ ਦੀ ਹੈ।

ਛੁਰੇਬਾਜ਼ੀ ਦੀ ਇਸ ਘਟਨਾ 'ਚ ਬੇਹੱਦ ਜ਼ਖਮੀ ਹੋਈ ਔਰਤ ਨੂੰ ਬਚਾਇਆ ਨਹੀਂ ਜਾ ਸਕਿਆ ਜਦਕਿ ਦੂਜੇ ਦੋਵੇਂ ਜ਼ਖਮੀਆਂ ਦੀ ਹਾਲਤ ਖਤਰੇ ਤੋਂ ਬਾਹਰ ਹੈ ਅਤੇ ਉਹ ਹਸਪਤਾਲ 'ਚ ਇਲਾਜ ਅਧੀਨ ਹਨ।

ਪੁਲਿਸ ਮੁਤਾਬਕ ਇੱਕ ਸ਼ੱਕੀ ਵਿਅਕਤੀ ਮੌਕੇ ਤੋਂ ਤਾਂ ਫਰਾਰ ਹੋ ਗਿਆ ਪਰ ਕੁਝ ਦੇਰ ਬਾਅਦ ਪਿੱਛਾ ਕਰਨ 'ਤੇ ਫੜਿਆ ਗਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਹਮਲਾਵਰ ਅਤੇ ਪੀੜਤ ਇੱਕ ਦੂਜੇ ਨੂੰ ਜਾਣਦੇ ਸਨ।

ਪਹਿਲਾਂ ਇਸਨੂੰ ਲੁੱਟ-ਖੋਹ ਦੀ ਵਾਰਦਾਤ ਸਮਝਿਆ ਜਾ ਰਿਹਾ ਸੀ ਪਰ ਹੁਣ ਹਾਲਾਤ ਘਰੇਲੂ ਹਿੰਸਾ ਵਾਲੇ ਜਾਪ ਰਹੇ ਹਨ।

ਆਂਢ-ਗੁਆਂਢ ਮੁਤਾਬਕ ਇਸ ਯੂਨਿਟ 'ਚ ਇੱਕ ਪੰਜਾਬੀ ਪਰਿਵਾਰ ਰਹਿੰਦਾ ਹੈ। ਕੁਝ ਲੋਕਾਂ ਨੇ ਮਰਨ ਵਾਲੀ ਔਰਤ ਦਾ ਨਾਮ ਵੀ ਦੱਸਿਆ ਪਰ ਪੁਲਿਸ ਵਲੋਂ ਅਧਿਕਾਰਤ ਤੌਰ 'ਤੇ ਨਾਮ ਜਾਰੀ ਕਰਨ ਦੀ ਉਡੀਕ ਕੀਤੀ ਜਾ ਰਹੀ ਹੈ।