ਢੇਰਾਂ ਤੋਂ ਸਰੀ ਤੱਕ.....!

ਗੁਰਪ੍ਰੀਤ ਸਿੰਘ ਸਹੋਤਾ । ਸਰੀ ।

ਕੁਝ ਮਹੀਨੇ ਪਹਿਲਾਂ ਇਹ ਕਤੂਰੇ ਮਾਹਿਲਪੁਰ ਲਾਗੇ ਪਿੰਡ ਘੁਮਿਆਲਾ ਦੇ ਢੇਰਾਂ, ਗਲ਼ੀਆਂ 'ਚ ਘੁੰਮਦੇ ਸਨ। ਦੁਆਬੇ 'ਚ ਢੇਰ ਕਹਿ ਦਿੰਦੇ ਹਨ ਤੇ ਮਾਲਵੇ 'ਚ ਰੂੜੀਆਂ। ਪਰ ਹੁਣ ਕੈਨੇਡਾ ਦੇ ਸ਼ਹਿਰ ਸਰੀ 'ਚ ਹਨ। ਨਜ਼ਾਰੇ ਉੱਥੇ ਸੀ ਜਾਂ ਇੱਥੇ ਹਨ, ਇਹ ਤਾਂ ਇਹੀ ਦੱਸ ਸਕਦੇ ਹਨ ਪਰ ਇਹ ਪੱਕਾ ਹੈ ਕਿ ਇਨ੍ਹਾਂ ਦੀ ਕਿਸਮਤ 'ਚ ਕੈਨੇਡਾ ਦਾ ਸਫਰ ਲਿਖਿਆ ਹੋਇਆ ਸੀ।

ਹੋਇਆ ਇਸ ਤਰਾਂ ਕਿ ਸਰੀ ਦਾ ਇੱਕ ਪਰਿਵਾਰ ਪੰਜਾਬ ਗਿਆ ਹੋਇਆ ਸੀ, ਕਰੋਨਾ ਕਾਰਨ ਕਈ ਮਹੀਨੇ ਉਨ੍ਹਾਂ ਨੂੰ ਪੰਜਾਬ ਰਹਿਣਾ ਪਿਆ। ਬੱਚਿਆਂ ਦਾ ਪਿੰਡ 'ਚ ਰਹਿੰਦੀ ਇੱਕ ਕੁੱਤੀ ਨਾਲ ਤੇਹ ਪੈ ਗਿਆ, ਜਿਸਨੇ ਕੁਝ ਮਹੀਨੇ ਬਾਅਦ ਕੁਝ ਕਤੂਰਿਆਂ ਨੂੰ ਜਨਮ ਦਿੱਤਾ। ਬੱਚਿਆਂ ਦਾ ਇਨ੍ਹਾਂ ਕਤੂਰਿਆਂ ਨਾਲ ਇੰਨਾ ਲਗਾਅ ਹੋ ਗਿਆ ਕਿ ਉਹ ਇਨ੍ਹਾਂ ਨੂੰ ਕੈਨੇਡਾ ਮੰਗਵਾ ਕੇ ਹਟੇ।

ਹੁਣ ਇਹ ਸਰੀ ਰਹਿੰਦੇ ਹਨ, ਕੈਨੇਡੀਅਨ ਅੰਦਾਜ਼ 'ਚ। ਕੈਨੇਡਾ ਤੋਂ ਬਹੁਤ ਲੋਕ ਕੁੱਤੇ ਲੈ ਕੇ ਪੰਜਾਬ ਜਾਂਦੇ ਰਹੇ ਹਨ ਪਰ ਪੰਜਾਬ ਤੋਂ ਕੈਨੇਡਾ ਆਉਣ ਵਾਲੇ ਸ਼ਾਇਦ ਇਹ ਪਹਿਲੇ ਕੁੱਤੇ ਹੋਣਗੇ, ਜੋ ਢੇਰਾਂ/ਰੂੜੀਆਂ ਤੋਂ ਇੱਥੇ ਪੁੱਜੇ ਹਨ। ਮੱਝਾਂ ਤਾਂ ਕਈ ਸਾਲ ਪਹਿਲਾਂ ਬੀਸੀ ਦੇ ਸ਼ਹਿਰ ਐਬਸਫੋਰਡ ਲੈ ਆਏ ਸਨ।