ਸਾਬਕਾ ਅਧਿਕਾਰੀ ਸ਼ਸ਼ੀਕਾਂਤ ਡਰੱਗ ਮਾਫੀਆ ਬਾਰੇ ਸੂਚੀ ਜਾਰੀ ਕਰੇ: ਬੈਂਸ

ਲੁਧਿਆਣਾ- ਪ੍ਰਮੁੱਖ ਸਕੱਤਰ ਗ੍ਰਹਿ ਡੀ.ਐਸ. ਬੈਂਸ ਨੇ ਅੱਜ ਇਥੇ ਸਾਬਕਾ ਏਡੀਜੀਪੀ ਜੇਲ੍ਹਾਂ ਸ੍ਰੀ ਸ਼ਸ਼ੀਕਾਂਤ ’ਤੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਹੈ ਕਿ ਜੇ ਇਸ ਸਾਬਕਾ ਅਧਿਕਾਰੀ ਪਾਸ ਡਰੱਗ ਮਾਫੀਏ ਦੇ ਲੋਕਾਂ ਦੇ ਨਾਂ ਹਨ ਤਾਂ ਉਹ ਇਨ੍ਹਾਂ ਦੀ ਸੂਚੀ ਜਾਰੀ ਕਰੇ। ਉਹ ਇਸ ’ਤੇ ਸਖ਼ਤ ਐਕਸ਼ਨ ਲੈਣਗੇ। ਉਹ ਇਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰ ਰਹੇ ਸਨ।

ਸਾਬਕਾ ਆਈਪੀਐਸ ਸ਼ਸ਼ੀਕਾਂਤ ਨੇ ਹਾਲ ਹੀ ਵਿੱਚ ਦਾਅਵਾ ਕੀਤਾ ਸੀ ਕਿ ਜੇਲ੍ਹਾਂ ਵਿੱਚ ਨਸ਼ੇ ਸਪਲਾਈ ਕਰਨ ਵਾਲਾ ਤਿੰਨ ਧਿਰੀ ਮਾਫੀਆ ਬਣਿਆ ਹੋਇਆ ਹੈ। ਇਸ ਵਿੱਚ ਜੇਲ੍ਹ ਅਧਿਕਾਰੀ, ਸਿਆਸਤਦਾਨ ਤੇ ਨਸ਼ੇ ਵਿਕਰੇਤਾ ਸ਼ਾਮਲ ਹਨ।

ਸ੍ਰੀ ਬੈਂਸ ਨੇ ਕਿਹਾ ਕਿ ਨਸ਼ੇ ਸਪਲਾਈ ਕਰਨ ਵਿੱਚ ਸ਼ਾਮਲ ਲੋਕਾਂ ਦੀ ਸ਼ਸ਼ੀਕਾਂਤ ਸਬੰਧਤ ਮੰਤਰੀ ਅਤੇ ਗ੍ਰਹਿ ਦਫਤਰ ਨੂੰ ਸੂਚੀ ਭੇਜਣ। ਉਨ੍ਹਾਂ ਕਿਹਾ ਕਿ ਸ਼ਸ਼ੀਕਾਂਤ ਹਵਾ ਵਿੱਚ ਦਾਅਵਾ ਪੇਸ਼ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਵੱਲੋਂ ਸਰਕਾਰ ਨੂੰ ਅਜਿਹੇ ਵਿਅਕਤੀਆਂ ਦੀ ਕੋਈ ਲਿਸਟ ਨਹੀਂ ਭੇਜੀ ਗਈ। ਉਨ੍ਹਾਂ ਕਿਹਾ ਕਿ ਸਾਬਕਾ ਅਧਿਕਾਰੀ ਇਸ ਮਾਮਲੇ ਨੂੰ ਸਪਸ਼ਟ ਕਰਨ। ਉਹ ਇਨ੍ਹਾਂ ਨਾਵਾਂ ਦੀ ਸੂਚੀ ਕਿਸੇ ਵੀ ਟਾਇਮ ਉਨ੍ਹਾਂ ਦੇ ਦਫਤਰ ਨੂੰ ਭੇਜਣ। ਉਹ ਇਸ ਸਬੰਧੀ ਜ਼ਿੰਮੇਵਾਰ ਦੋਸ਼ੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕਰਨਗੇ, ਪ੍ਰੰਤੂ ਅਖ਼ਬਾਰੀ ਬਿਆਨਾਂ ਨਾਲ ਮਸਲਾ ਹੱਲ ਨਹੀਂ ਹੋ ਸਕਦਾ।