ਗ੍ਰਹਿ ਮੰਤਰਾਲਾ ਪ੍ਰਿੰਟ ਤੇ ਪ੍ਰਸਾਰਣ ਮੀਡੀਆ 'ਚ ਵਿਦੇਸ਼ੀ ਨਿਵੇਸ਼ ਦੀ ਹੱਦ ਵਧਾਉਣ ਦੇ ਵਿਰੁੱਧ

ਨਵੀਂ ਦਿੱਲੀ - ਕੇਂਦਰੀ ਗ੍ਰਹਿ ਮੰਤਰਾਲਾ ਪ੍ਰਿੰਟ ਤੇ ਪ੍ਰਸਾਰਣ ਮੀਡੀਆ 'ਚ ਸਿੱਧੇ ਵਿਦੇਸ਼ੀ ਨਿਵੇਸ਼ ਦੀ ਹੱਦ ਵਧਾਉਣ ਦੀ ਕਿਸੇ ਵੀ ਕਾਰਵਾਈ ਦਾ ਵਿਰੋਧ ਕਰਦਾ ਹੈ ਤੇ ਕਿਹਾ ਕਿ ਇਸ ਖੇਤਰ 'ਚ ਹੋਰ ਵਿਦੇਸ਼ੀ ਨਿਵੇਸ਼ ਦੇਸ਼ ਦੀ ਸੁਰੱਖਿਆ ਲਈ ਨੁਕਸਾਨਦੇਹ ਸਾਬਤ ਹੋ ਸਕਦਾ ਹੈ। ਮੰਤਰਾਲੇ ਦਾ ਕਹਿਣਾ ਕਿ ਖ਼ਬਰਾਂ ਤੇ ਚਾਲੰਤ ਮਾਮਲਿਆਂ ਦੇ ਪ੍ਰੋਗਰਾਮ ਚਲਾਉਣ ਵਾਲੇ ਟੈਲੀਵੀਜ਼ਨ ਚੈਨਲ ਖੋਲ੍ਹਣ ਤੇ ਅਖ਼ਬਾਰਾਂ ਤੇ ਰਸਾਲੇ ਛਾਪਣ ਦੀ ਇਜਾਜ਼ਤ ਦੇਣ ਨਾਲ ਭਾਰਤ ਦੇ ਘਰੇਲੂ ਮਾਮਲਿਆਂ ਤੇ ਰਾਜਨੀਤੀ ਵਿਚ ਦਖਲਅੰਦਾਜ਼ੀ ਹੋ ਸਕਦੀ ਹੈ। ਮੌਜੂਦਾ ਸਮੇਂ ਐਫ. ਐਮ. ਰੇਡੀਓ ਤੇ ਖਬਰਾਂ ਦਾ ਪ੍ਰਸਾਰਣ ਤੇ ਚਾਲੰਤ ਮਾਮਲਿਆਂ ਵਾਲੇ ਟੈਲੀਵੀਜ਼ਨ ਚੈਨਲਾਂ ਤੇ ਪ੍ਰਿੰਟ ਮੀਡੀਆ 'ਚ 26 ਫ਼ੀਸਦ ਵਿਦੇਸ਼ੀ ਨਿਵੇਸ਼ ਦੀ ਇਜਾਜ਼ਤ ਹੈ ਤੇ ਵਣਜ ਮੰਤਰਾਲੇ ਨੇ ਇਸ ਨੂੰ ਵਧਾ ਕੇ 49 ਫ਼ੀਸਦੀ ਕਰਨ ਦੀ ਤਜਵੀਜ਼ ਪੇਸ਼ ਕੀਤੀ ਹੈ।