6 ਹਜ਼ਾਰ ਤੋਂ ਜ਼ਿਆਦਾ ਭਾਰਤੀ ਵਿਦੇਸ਼ੀ ਜੇਲ੍ਹਾਂ 'ਚ ਬੰਦ

Posted on August 7th, 2013

ਨਵੀਂ ਦਿੱਲੀ- 6 ਹਜ਼ਾਰ ਤੋਂ ਜ਼ਿਆਦਾ ਭਾਰਤੀ ਵੱਖ-ਵੱਖ ਮਾਮਲਿਆਂ 'ਚ ਵਿਦੇਸ਼ੀ ਜੇਲ੍ਹਾਂ ਵਿਚ ਬੰਦ ਹਨ, ਜਦੋਂ ਕਿ 117 ਭਾਰਤੀ ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਵੀ ਆਪਣੀ ਰਿਹਾਈ ਦੀ ਉਡੀਕ 'ਚ ਹਨ। ਵਿਦੇਸ਼ ਰਾਜ ਮੰਤਰੀ ਮਹਾਰਾਣੀ ਪ੍ਰਨੀਤ ਕੌਰ ਨੇ ਲੋਕ ਸਭਾ 'ਚ ਇਕ ਲਿਖਤੀ ਜਵਾਬ ਵਿਚ ਕਿਹਾ ਕਿ ਕਰੀਬ 6004 ਭਾਰਤੀ ਵੀਜ਼ਾ ਨਿਯਮਾਂ, ਸਮੇਂ ਤੋਂ ਵੱਧ ਕਿਸੇ ਦੇਸ਼ 'ਚ ਰਹਿਣ, ਗੈਰ-ਕਾਨੂੰਨੀ ਤੌਰ 'ਤੇ ਵਿਦੇਸ਼ ਜਾਣ ਤੇ ਲੁੱਟ ਜਿਹੇ ਜ਼ੁਰਮਾਂ ਦੇ ਦੋਸ਼ ਵਿਚ ਵਿਦੇਸ਼ੀ ਜੇਲ੍ਹਾਂ ਵਿਚ ਬੰਦ ਹਨ। ਉਨ੍ਹਾਂ ਕਿਹਾ ਕਿ ਹਾਲਾਂਕਿ ਕਈ ਭਾਰਤੀ ਨਸ਼ਾ ਸਪਲਾਈ, ਕਤਲ ਤੇ ਜਬਰ ਜਨਾਹ ਵਰਗੇ ਮਾਮਲਿਆਂ ਵਿਚ ਵੀ ਵਿਦੇਸ਼ੀ ਜੇਲ੍ਹਾਂ ਵਿਚ ਬੰਦ ਹਨ। ਉਨ੍ਹਾਂ ਦੱਸਿਆ ਕਿ ਹੁਣ ਤੱਕ 22 ਭਾਰਤੀਆਂ ਦੀ ਵਿਦੇਸ਼ੀ ਜੇਲ੍ਹਾਂ ਵਿਚ ਮੌਤ ਹੋ ਚੁੱਕੀ ਹੈ। ਸਰਕਾਰੀ ਅੰਕੜਿਆਂ ਅਨੁਸਾਰ ਸਭ ਤੋਂ ਵੱਧ 1400 ਭਾਰਤੀ ਸਾਊਦੀ ਅਰਬ ਦੀਆਂ ਜੇਲ੍ਹਾਂ ਵਿਚ ਬੰਦ ਹਨ। ਉਨ੍ਹਾਂ ਦੱਸਿਆ ਕਿ ਯੂ. ਏ. ਈ. ਦੀਆਂ ਜੇਲ੍ਹਾਂ ਵਿਚ 1032, ਅਮਰੀਕਾ 'ਚ 514, ਪਾਕਿਸਤਾਨ 'ਚ 213, ਮਲੇਸ਼ੀਆ 'ਚ 244, ਨਿਪਾਲ 'ਚ 377, ਕੁਵੈਤ ਵਿਚ 222 ਅਤੇ ਸਿੰਘਾਪੁਰ ਦੀਆਂ ਜੇਲ੍ਹਾਂ ਵਿਚ 152 ਭਾਰਤੀ ਕੈਦ ਹਨ।