ਹੋਸਨੀ ਮੁਬਾਰਕ ਰਿਹਾਅ

ਕਾਹਿਰਾ-ਮਿਸਰ ਦੇ ਸਾਬਕਾ ਤਾਨਾਸ਼ਾਹ ਹੋਸਨੀ ਮੁਬਾਰਕ ਜੋਕਿ ਭਿ੍ਸ਼ਟਾਚਾਰ ਤੇ ਪ੍ਰਦਰਸ਼ਨਕਾਰੀਆਂ ਦੀ ਹੱਤਿਆ ਸਬੰਧੀ ਮਾਮਲਿਆਂ ਦਾ ਸਾਹਮਣਾ ਕਰ ਰਹੇ ਹਨ, ਨੂੰ ਅੱਜ ਕਰੀਬ ਦੋ ਸਾਲ ਬਾਅਦ ਰਿਹਾਅ ਕਰ ਦਿੱਤਾ ਗਿਆ ਪਰ ਉਹ ਮੁਕੱਦਮਾ ਚੱਲਣ ਤੱਕ ਘਰ 'ਚ ਨਜ਼ਰਬੰਦ ਹੀ ਰਹਿਣਗੇ | 85 ਸਾਲਾ ਹੋਸਨੀ ਮੁਬਾਰਕ ਨੂੰ ਕਾਹਿਰਾ ਦੀ ਤੋਰਾ ਜੇਲ੍ਹ 'ਚੋਂ ਇਕ ਮੈਡੀਕਲ ਹੈਲੀਕਾਪਟਰ ਰਾਹੀਂ ਮਾਦੀ ਫ਼ੌਜੀ ਹਸਪਤਾਲ ਲਿਆਂਦਾ ਗਿਆ | ਜ਼ਿਕਰਯੋਗ ਹੈ ਕਿ ਉਨ੍ਹਾਂ ਦੀ ਰਿਹਾਈ ਕੱਲ੍ਹ ਦਿੱਤੇ ਗਏ ਹੁਕਮਾਂ ਤੋਂ ਬਾਅਦ ਅਮਲ 'ਚ ਲਿਆਂਦੀ ਗਈ ਹੈ | ਉਨ੍ਹਾਂ ਦੀ ਰਿਹਾਈ ਦੌਰਾਨ ਉਨ੍ਹਾਂ ਦੇ ਕੁਝ ਹਿਮਾਇਤੀ ਜੇਲ੍ਹ ਦੇ ਬਾਹਰ ਇਕੱਠੇ ਹੋਏ ਤੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ | ਪ੍ਰਧਾਨ ਮੰਤਰੀ ਹਾਜ਼ੇਮ ਅਲ-ਬੇਬਲਾਵੀ ਨੇ ਬੀਤੀ ਰਾਤ ਕਿਹਾ ਸੀ ਕਿ ਹੋਸਨੀ ਮੁਬਾਰਕ ਨੂੰ ਰਿਹਾਅ ਕਰਨ ਤੋਂ ਬਾਅਦ ਘਰ 'ਚ ਨਜ਼ਰਬੰਦ ਕੀਤਾ ਜਾਵੇਗਾ |