ਮੋਹਾਲੀ- ਬਲਜੀਤ ਸਿੰਘ ਖਾਲਸਾ ਨੇ ਫੇਜ਼-7 ਵਿੱਚ ਖੋਲ੍ਹੀ ਗਈ ਹੈਲਪਲਾਈਨ ਦੇ ਅੰਗਰੇਜ਼ੀ ਵਿੱਚ ਲਿਖੇ ਬੋਰਡ ‘ਤੇ ਕਾਲਾ ਰੰਗ ਫੇਰ ਦਿੱਤਾ ਤੇ ਕਿਹਾ ਕਿ ਅੰਗਰੇਜ਼ੀ ਲਿਖੇ ਬੋਰਡਾਂ ‘ਤੇ ਕਾਲਾ ਰੰਗ ਫੇਰਨ ਦਾ ਸਿਲਸਿਲਾ ਜਾਰੀ ਰਹੇਗਾ। ਉਨ੍ਹਾਂ ਨੇ ਕਿਹਾ ਕਿ ਇੱਕ ਪਾਸੇ ਅਕਾਲੀ ਦਲ ਦਿੱਲੀ ਵਿੱਚ ਪੰਜਾਬੀ ਭਾਸ਼ਾ ਲਾਗੂ ਕਰਾਉਣ ਲਈ ਕੋਸ਼ਿਸ਼ਾਂ ਕਰਦਾ ਹੈ, ਦੂਜੇ ਪਾਸੇ ਪੰਜਾਬ ਦੇ ਕਈ ਹਿੱਸਿਆਂ ਵਿੱਚ ਅੰਗਰੇਜ਼ੀ ਵਿੱਚ ਲਿਖੇ ਬੋਰਡ ਲਾਏ ਗਏ ਹਨ। ਫੇਜ਼-7 ਵਿੱਚ ਇੱਕ ਪ੍ਰਾਈਵੇਟ ਕੰਪਨੀ ਦੇ ਬੋਰਡ ‘ਤੇ ਵੀ ਕਾਲਾ ਰੰਗ ਫੇਰਦੇ ਹੋਏ ਖਾਲਸਾ ਨੇ ਕਿਹਾ ਕਿ ਇਹ ਕੰਪਨੀਆਂ ਪੰਜਾਬ ਦੀ ਜਨਤਾ ਨੂੰ ਕਰੋੜਾਂ ਰੁਪਏ ਵਿੱਚ ਮਕਾਨ ਵੇਚਦੀਆਂ ਹਨ, ਪ੍ਰੰਤੂ ਆਪਣਾ ਪ੍ਰਚਾਰ ਅੰਗਰੇਜ਼ੀ ਭਾਸ਼ਾ ਵਿੱਚ ਕਰਦੀਆਂ ਹਨ, ਜਿਸ ਨੂੰ ਸਹਿਣ ਨਹੀਂ ਕੀਤਾ ਜਾਏਗਾ। 

ਫੇਜ਼-7 ਵਿੱਚ ਕਈ ਬੋਰਡਾਂ ‘ਤੇ ਕਾਲਾ ਰੰਗ ਫੇਰਨ ਦੇ ਬਾਅਦ ਖਾਲਸਾ ਫੇਜ਼-11 ਵੱਲ ਜਦ ਜਾਣ ਲੱਗੇ ਤਾਂ ਪੀ ਸੀ ਆਰ ਇੰਚਾਰਜ ਰਾਮਦਰਸ਼ਨ ਆ ਗਏ ਤੇ ਉਨ੍ਹਾਂ ਨੂੰ ਥਾਣੇ ਪਹੁੰਚਾਇਆ। ਖਾਲਸਾ ਨੇ ਕਿਹਾ ਕਿ ਚਾਹੇ ਪੁਲਸ ਉਨ੍ਹਾਂ ਨੂੰ ਕਿੰਨੀ ਵਾਰ ਗ੍ਰਿਫਤਾਰ ਕਰੇ, ਪਰ ਉਹ ਆਪਣਾ ਪੰਜਾਬੀ ਭਾਸ਼ਾ ਦੇ ਸਮਰਥਨ ਵਿੱਚ ਮੁਹਿੰਮ ਜਾਰੀ ਰੱਖਣਗੇ। ਖਾਲਸਾ ਨੇ ਕਿਹਾ ਕਿ ਅਗਲੀ ਵਾਰ ਸੈਕ੍ਰੇਟੇਰੀਏਟ ਵਿੱਚ ਲਿਖੇ ਅੰਗਰੇਜ਼ੀ ਬੋਰਡਾਂ ‘ਤੇ ਕਾਲਾ ਰੰਗ ਫੇਰਨਗੇ। ਖਾਲਸਾ ਨੇ ਕੁਝ ਦਿਨ ਪਹਿਲਾਂ ਚੰਡੀਗੜ੍ਹ ਵਿੱਚ ਅੰਗਰੇਜ਼ੀ ਬੋਰਡਾਂ ‘ਤੇ ਕਾਲਾ ਰੰਗ ਫੇਰ ਦਿੱਤਾ ਸੀ।