ਓਮ ਪੁਰੀ ਨੇ ਪਤਨੀ ਵੱਲੋਂ ਲਾਏ ਕੁੱਟਮਾਰ ਦੇ ਦੋਸ਼ਾਂ ਤੋਂ ਕੀਤਾ ਇਨਕਾਰ

ਮੁੰਬਈ- ਮਸ਼ਹੂਰ ਅਦਾਕਾਰ ਓਮ ਪੁਰੀ ਨੇ ਆਪਣੀ ਦੂਜੀ ਪਤਨੀ ਨੰਦਿਤਾ ਵਲੋਂ ਘਰੇਲੂ ਹਿੰਸਾ ਦੇ ਲਾਏ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ। ਉਸ ਨੇ ਕਿਹਾ ਕਿ ਜਿਸ ਦਿਨ ਉਸ 'ਤੇ ਕੁੱਟਣ ਦੇ ਦੋਸ਼ ਲਾਏ ਜਾ ਰਹੇ ਹਨ ਉਸ ਸਮੇਂ ਉਹ ਕੋਲਕਾਤਾ 'ਚ ਸਨ। ਉਨ੍ਹਾਂ ਕਿਹਾ ਕਿ ਉਹ 25 ਅਗਸਤ ਨੂੰ ਕੋਲਕਾਤਾ ਤੋਂ ਵਾਪਸ ਮੁੜੇ ਸਨ ਤਾਂ ਉਹ 23 ਅਗਸਤ ਨੂੰ ਨੰਦਿਤਾ ਨੂੰ ਕਿਸ ਤਰਾਂ ਕੁੱਟ ਸਕਦੇ ਹਨ। ਅਦਾਕਾਰ ਨੇ ਅੱਗੇ ਦੱਸਿਆ ਕਿ ਉਸ ਦੀ ਪਤਨੀ ਨੇ ਉਸ 'ਤੇ ਸੋਟੀ ਨਾਲ ਕੁੱਟਣ ਦੇ ਦੋਸ਼ ਲਾਏ ਹਨ ਜਦ ਕਿ ਉਸ ਦੇ ਕੋਈ ਜ਼ਖਮ ਦੇ ਨਿਸ਼ਾਨ ਨਹੀਂ ਹਨ। 63 ਸਾਲਾ ਅਦਾਕਾਰ ਓਮ ਪੁਰੀ ਨੇ ਕਿਹਾ ਕਿ ਜੇਕਰ ਉਨ੍ਹਾਂ ਨੇ ਉਸ ਨੂੰ ਸੋਟੀ ਨਾਲ ਕੁੱਟਿਆ ਹੁੰਦਾ ਤਾਂ ਉਸ ਨੂੰ ਸਿਰਫ ਝਰੀਟ ਹੀ ਲੱਗਦੀ। 

ਅਦਾਕਾਰ ਨੇ ਕਿਹਾ ਕਿ ਉਸ ਦੀ ਪਤਨੀ ਹਰ ਸਾਲ ਵਿਦੇਸ਼ ਦੌਰੇ 'ਤੇ ਜਾਣ ਦੀ ਜ਼ਿਦ ਕਰਦੀ ਹੈ ਜਿਹੜਾ ਇਕ ਛੋਟੇ-ਮੋਟੇ ਰੋਲ ਕਰਨ ਵਾਲੇ ਅਦਾਕਾਰ ਲਈ ਮੁਸ਼ਕਿਲ ਹੈ। ਉਸ ਨੇ ਕਿਹਾ ਕਿ ਉਹ ਮੱਧ ਵਰਗ ਨਾਲ ਸਬੰਧ ਰੱਖਦਾ ਹੈ। ਉਹ ਸ਼ਾਹਰੁਖ ਖਾਨ ਨਹੀਂ ਹੈ ਜਿਸ ਕੋਲ ਬਹੁਤ ਸਾਰਾ ਪੈਸਾ ਹੈ।