ਮਾਲਵੇ ਦੇ 35 ਫ਼ੀਸਦੀ ਪਾਣੀ 'ਚ ਯੁਰੇਨੀਅਮ- ਭਾਭਾ ਐਟੋਮਿਕ ਰਿਸਰਚ ਸੈਂਟਰ

Posted on September 17th, 2013

ਚੰਡੀਗੜ੍ਹ : ਪੰਜਾਬ ਖ਼ਾਸ ਤੌਰ 'ਤੇ ਮਾਲਵਾ ਦੇ ਖੇਤਰ ਲਈ ਪਾਣੀ ਦੇ ਲਏ ਗਏ ਨਮੂਨਿਆਂ ਤੋਂ 35 ਫ਼ੀਸਦੀ ਨਮੂਨਿਆਂ 'ਚ ਯੁਰੇਨੀਅਮ ਮਿਲਣ ਦੀ ਪੁਸ਼ਟੀ ਹੋਈ ਹੈ। ਮਾਲਵਾ ਖੇਤਰ 'ਚ ਪਾਣੀ 'ਚ ਯੁਰੇਨੀਅਮ ਦੀ ਜਾਂਚ ਲਈ ਭਾਭਾ ਐਟੋਮਿਕ ਰਿਸਰਚ ਸੈਂਟਰ (ਬੀ ਏ ਆਰ ਸੀ) ਨੇ ਬਠਿੰਡਾ, ਫਿਰੋਜ਼ਪੁਰ, ਫ਼ਰੀਦਕੋਟ ਅਤੇ ਮਾਨਸਾ ਤੋਂ ਪਾਣੀ ਦੇ 1500 ਨਮੂਨੇ ਲਏ ਹਨ। ਇਨ੍ਹਾਂ ਨਮੂਨਿਆਂ 'ਚੋਂ 35 ਫ਼ੀਸਦੀ ਨਮੂਨਿਆਂ 'ਚ ਯੁਰੇਨੀਅਮ ਤੈਅ ਮਾਨਕਾਂ ਤੋਂ ਵੱਧ ਪਾਇਆ ਗਿਆ, ਜਿਸ ਵਿਚ ਬਠਿੰਡਾ ਜ਼ਿਲ੍ਹਾ ਸਭ ਤੋਂ ਵੱਧ ਪ੍ਰਭਾਵਿਤ ਹੈ।

ਇਹ ਜਾਣਕਾਰੀ ਬੀ ਏ ਆਰ ਸੀ ਵੱਲੋਂ ਇਸ ਇਲਾਕੇ 'ਚ ਕੀਤੀ ਗਈ ਰਿਸਰਚ ਤੋਂ ਬਾਅਦ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੂੰ ਸੌਂਪੀ ਗਈ ਹੈ। ਹਾਈ ਕੋਰਟ ਦੇ ਹੁਕਮਾਂ ਤੋਂ ਬਾਅਦ ਬੀ ਏ ਆਰ ਸੀ ਨੇ ਬਠਿੰਡਾ ਦੇ ਥਰਮਲ ਪਲਾਂਟ ਤੋਂ ਨਿਕਲਣ ਵਾਲੀ ਸੁਆਹ ਬਾਰੇ 'ਚ ਜਾਣਕਾਰੀ ਮੰਗੀ ਹੈ। ਬੀ ਏ ਆ ਰਸੀ ਨੇ ਹਾਈ ਕੋਰਟ ਨੂੰ ਦੱਸਿਆ ਕਿ ਸ਼ੁਰੂਆਤੀ ਜਾਂਚ ਤੋਂ ਸਾਹਮਣੇ ਆਇਆ ਹੈ ਕਿ ਬਠਿੰਡਾ ਦੇ ਥਰਮਲ ਪਲਾਂਟ ਤੋਂ ਨਿਕਲਣ ਵਾਲੀ ਸੁਆਹ 'ਚ ਯੁਰੇਨੀਅਮ ਦੇ ਜਿਹੜੇ ਤੱਤ ਪਾਏ ਗਏ ਹਨ, ਇਹ ਆਮ ਮਾਨਕਾਂ ਤੋਂ ਵੱਧ ਨਹੀਂ ਹੈ। ਇਸ ਦੇ ਨਾਲ ਹੀ ਬੀ ਏ ਆਰ ਸੀ ਨੇ ਕਿਹਾ ਕਿ ਮਾਲਵਾ ਖੇਤਰ ਦੇ ਪਾਣੀ ਦੀ ਰਿਸਰਚ ਅਜੇ ਜਾਰੀ ਹੈ, ਲਿਹਾਜ਼ਾ ਇਸ ਲਈ ਲਈ ਉਨ੍ਹਾਂ ਨੂੰ ਕੁਝ ਹੋਰ ਸਮਾਂ ਦਿੱਤਾ ਜਾਣਾ ਚਾਹੀਦਾ ਹੈ।