ਆਸਾਰਾਮ ਦੇ ਤੇਵਰ ਠੰਡੇ ਪੈਣ ਲੱਗੇ - ਜ਼ਮਾਨਤ ਨੂੰ ਲੈ ਕੇ ਜਲਦਬਾਜੀ ਛੱਡ ਦਿੱਤੀ

ਨਵੀਂ ਦਿੱਲੀ - ਨਾਬਾਲਗ ਨਾਲ ਜਿਣਸੀ ਸ਼ੋਸ਼ਣ ਦੇ ਮਾਮਲੇ 'ਚ ਫਸੇ ਆਸਾਰਾਮ ਹੁਣ ਪੁਲਿਸ ਦੇ ਸਾਹਮਣੇ ਹਥਿਆਰ ਸੁੱਟਦੇ ਨਜ਼ਰ ਆ ਰਹੇ ਹਨ। ਕੱਲ੍ਹ ਤੱਕ ਆਪਣੀ ਜ਼ਮਾਨਤ ਲਈ ਜੋਰ - ਸ਼ੋਰ ਨਾਲ ਹੱਥਪੈਰ ਮਾਰ ਰਹੇ ਆਸਾਰਾਮ ਨੂੰ ਵੀ ਸਮਝ 'ਚ ਆ ਗਿਆ ਹੈ ਕਿ ਉਨ੍ਹਾਂ ਲਈ ਬਚਣ ਦਾ ਰਸਤਾ ਇੰਨਾ ਸੌਖਾ ਨਹੀਂ ਹੈ। ਇਹੀ ਕਾਰਨ ਹੈ ਕਿ ਹੁਣ ਨਾ ਸਿਰਫ ਉਨ੍ਹਾਂ ਨੇ ਆਪਣੀ ਜ਼ਮਾਨਤ ਨੂੰ ਲੈ ਕੇ ਜਲਦਬਾਜੀ ਛੱਡ ਦਿੱਤੀ ਹੈ, ਸਗੋਂ ਇਸ ਕੇਸ 'ਚ ਹੁਣ ਤੱਕ ਲੁਕਦੇ ਫਿਰ ਰਹੇ ਉਨ੍ਹਾਂ ਦੇ ਸੇਵਾਦਾਰ ਵੀ ਆਤਮ ਸਮਰਪਣ ਕਰਨ ਲੱਗੇ ਹਨ। ਇਸ ਦੇ ਚੱਲਦਿਆਂ ਆਸਾਰਾਮ ਦੇ ਰਸੋਈਏ ਪ੍ਰਕਾਸ਼ ਤੇ ਉਨ੍ਹਾਂ ਦੇ ਛਿੰਦਵਾੜਾ ਆਸ਼ਰਮ ਦੇ ਸੰਚਾਲਕ ਸ਼ਰਦ ਚੰਦਰ ਨੇ ਜੋਧਪੁਰ ਸੈਸ਼ਨ ਕੋਰਟ 'ਚ ਆਤਮ ਸਮਰਪਣ ਕਰ ਦਿੱਤਾ ਹੈ। ਕੋਰਟ ਨੇ ਦੋਵਾਂ ਨੂੰ ਇੱਕ ਦਿਨ ਦੀ ਪੁਲਿਸ ਹਿਰਾਸਤ 'ਚ ਭੇਜ ਦਿੱਤਾ ਹੈ। ਆਸਾਰਾਮ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਹੀ ਪ੍ਰਕਾਸ਼ ਤੇ ਸ਼ਰਦ ਫਰਾਰ ਸਨ।