ਜ਼ਲੀਲ ਹੋਣ ਦੀ ਥਾਂ ਸਿੱਧੂ ਕਾਂਗਰਸ 'ਚ ਆ ਜਾਏ-ਜੈਰਾਮ ਰਮੇਸ਼

ਚੰਡੀਗੜ੍ਹ- ਕੇਂਦਰੀ ਪੇਂਡੂ ਵਿਕਾਸ ਤੇ ਪੰਚਾਇਤ ਮੰਤਰੀ ਜੈ ਰਾਮ ਰਮੇਸ਼ ਨੇ ਭਾਜਪਾ ਦੇ ਤੇਜ਼ ਤਰਾਰ ਮੈਂਬਰ ਲੋਕ ਸਭਾ ਸ. ਨਵਜੋਤ ਸਿੰਘ ਸਿੱਧੂ ਨੂੰ ਦੁਬਾਰਾ ਪੇਸ਼ਕਸ਼ ਕੀਤੀ ਹੈ ਕਿ ਉਹ ਭਾਜਪਾ ਵਿਚ ਜ਼ਲੀਲ ਹੋਣ ਦੀ ਬਜਾਏ ਕਾਂਗਰਸ ਵਿਚ ਸ਼ਾਮਿਲ ਹੋ ਜਾਏ, ਜਿੱਥੇ ਉਸ ਦਾ ਪੂਰਾ-ਪੂਰਾ ਸਨਮਾਨ ਤੇ ਸਤਿਕਾਰ ਕੀਤਾ ਜਾਏਗਾ। ਅੱਜ ਇੱਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਸ੍ਰੀ ਰਮੇਸ਼ ਨੇ ਵਿਚਾਰ ਪ੍ਰਗਟ ਕੀਤੇ ਕਿ ਸ. ਸਿੱਧੂ ਦਾ ਸਾਰਾ ਪਰਿਵਾਰ ਅਤੀਤ ਵਿਚ ਕਾਂਗਰਸ ਨਾਲ ਸਬੰਧਤ ਰਿਹਾ ਹੈ, ਸ. ਸਿੱਧੂ ਮੇਰੇ ਪੁਰਾਣੇ ਮਿੱਤਰ ਹਨ। ਅੱਜ ਤੋਂ ਕਈ ਸਾਲ ਪਹਿਲਾਂ ਮੈਂ ਉਨ੍ਹਾਂ ਨੂੰ ਪੇਸ਼ਕਸ਼ ਕੀਤੀ ਸੀ ਕਿ ਉਨ੍ਹਾਂ ਦੀ ਥਾਂ ਕਿਸੇ ਫਿਰਕੂ ਪਾਰਟੀ ਵਿਚ ਨਹੀਂ ਹੈ ਉਹ ਧਰਮ ਨਿਰਪੱਖ ਵਿਚਾਰਾਂ ਦੇ ਹਨ ਪਰ ਉਦੋਂ ਸ. ਸਿੱਧੂ ਚੁੱਪ ਰਹੇ ਸਨ ਪਰ ਹੁਣ ਪਿੱਛੇ ਜਿਹੇ ਮੈਂ ਫਿਰ ਉਨ੍ਹਾਂ ਨੂੰ ਇਹ ਕਿਹਾ ਸੀ ਕਿ ਭਾਜਪਾ ਵਿਚ ਉਨ੍ਹਾਂ ਨੂੰ ਸਿਆਸੀ ਪੱਖ ਤੋਂ ਵਿਸ਼ੇਸ਼ ਤੌਰ 'ਤੇ ਇਨ੍ਹਾਂ ਦਿਨਾਂ ਵਿਚ ਜ਼ਲੀਲ ਕੀਤਾ ਜਾ ਰਿਹਾ ਹੈ। 

ਸ੍ਰੀ ਰਮੇਸ਼ ਨੇ ਕਿਹਾ ਕਿ ਮੈਂ ਦਿੱਲੀ ਵਿਚ ਕਈ ਕਾਂਗਰਸੀ ਆਗੂਆਂ ਨਾਲ ਸ. ਸਿੱਧੂ ਦੀਆਂ ਮੁਲਾਕਾਤਾਂ ਵੀ ਕਰਾਈਆਂ ਸਨ। ਇਕ ਮੌਕੇ 'ਤੇ ਤਾਂ ਸਭ ਕੁਝ ਤੈਅ ਹੋ ਗਿਆ ਸੀ ਪਰ ਪਤਾ ਨਹੀਂ ਕਿ ਉਹ ਭਾਜਪਾ ਵਿਚ ਕਿਉਂ ਸ਼ਾਮਲ ਹੋ ਗਏ। ਜਦੋਂ ਸ੍ਰੀ ਰਮੇਸ਼ ਨੂੰ ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਪ੍ਰਧਾਨ ਸ. ਪ੍ਰਤਾਪ ਸਿੰਘ ਬਾਜਵਾ ਵੱਲੋਂ ਸ. ਸਿੱਧੂ ਨੂੰ ਕਾਂਗਰਸ ਵਿਚ ਸ਼ਾਮਿਲ ਕਰਨ ਦੀ ਵਿਰੋਧਤਾ ਕਰਨ ਬਾਰੇ ਦਸਿਆ ਤਾਂ ਮੁਸਕਰਾਉਂਦੇ ਹੋਏ ਸ੍ਰੀ ਰਮੇਸ਼ ਨੇ ਕਿਹਾ ਕਿ ਇਸ ਬਾਰੇ ਅੰਤਿਮ ਫੈਸਲਾ ਸ. ਬਾਜਵਾ ਨੂੰ ਪੁੱਛ ਕੇ ਹੀ ਕੀਤਾ ਜਾਏਗਾ।