ਸਬੰਧਾਂ 'ਚ ਗਰਮੀ ਲਿਆਉਣ ਲਈ ਰੂਸ ਤੇ ਚੀਨ ਦਾ ਦੌਰਾ ਕਰਨਗੇ ਡਾ. ਮਨਮੋਹਨ ਸਿੰਘ

ਨਵੀਂ ਦਿੱਲੀ : ਰੂਸ ਤੇ ਚੀਨ ਨਾਲ ਸਬੰਧਾਂ 'ਚ ਗਰਮੀ ਲਿਆਉਣ ਲਈ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ 20 ਅਕਤੂਬਰ ਨੂੰ ਦੋਵਾਂ ਦੇਸ਼ਾਂ ਦਾ ਦੌਰਾ ਕਰਨਗੇ। ਪ੍ਰਧਾਨ ਮੰਤਰੀ ਦੇ ਇਸ ਦੌਰੇ ਦੌਰਾਨ ਆਪਸੀ ਵਪਾਰ ਤੇ ਊਰਜਾ ਦਾ ਮੁੱਦਾ ਛਾਇਆ ਰਹੇਗਾ।ਦੌਰੇ ਦੇ ਪਹਿਲੇ ਪੜਾਅ 'ਤੇ ਪ੍ਰਧਾਨ ਮੰਤਰੀ 20 ਤੋਂ 22 ਅਕਤੂਬਰ ਤਕ ਰੂਸ ਵਿਚ ਰਹਿਣਗੇ। ਇਸ ਦੌਰਾਨ ਉਹ ਰੂਸੀ ਲੀਡਰਸ਼ਿਪ ਨਾਲ ਪਰਮਾਣੂ ਸਹਿਯੋਗ, ਵਪਾਰ ਤੇ ਰੱਖਿਆ ਮਸਲਿਆਂ 'ਤੇ ਚਰਚਾ ਕਰਨਗੇ। ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨਾਲ ਮੁਲਾਕਾਤ ਦੌਰਾਨ ਮਨਮੋਹਨ ਸਿੰਘ ਪਰਮਾਣੂ ਜਵਾਬਦੇਹੀ ਕਾਨੂੰਨ 'ਤੇ ਚਿੰਤਾਵਾਂ ਦੂਰ ਕਰਨ ਦੀਆਂ ਕੋਸ਼ਿਸ਼ਾਂ ਕਰਨਗੇ। ਇਸ ਤੋਂ ਇਲਾਵਾ ਉਹ ਰੂਸੀ ਨਿਵੇਸ਼ਕਾਂ (ਦੂਰਸੰਚਾਰ ਖੇਤਰ ਦੇ ਨਿਵੇਸ਼ਕਾਂ ਨੂੰ ਵੀ) ਦੇ ਹਿੱਤਾਂ ਦੀ ਰਾਖੀ ਦਾ ਵੀ ਭਰੋਸਾ ਦਿਵਾਉਣਗੇ। ਦੌਰੇ ਦੇ ਦੂਜੇ ਪੜਾਅ 'ਚ ਮਨਮੋਹਨ ਸਿੰਘ ਚੀਨ ਮੂਹਰੇ ਨਦੀਆਂ 'ਤੇ ਪੁਲ ਬਣਾਉਣ, ਵਪਾਰ ਘਾਟਾ ਤੇ ਸਰਹੱਦ 'ਤੇ ਹੋਣ ਵਾਲੀਆਂ ਘਟਨਾਵਾਂ ਨਾਲ ਜੁੜੀਆਂ ਚਿੰਤਾਵਾਂ ਉਠਾਉਣਗੇ।