ਆਸਾਰਾਮ ਦੇ ਜੰਮੂ ਆਸ਼ਰਮ 'ਚ ਦਫ਼ਨ ਹਨ ਤਿੰਨ ਬੱਚਿਆਂ ਦੀਆਂ ਲਾਸ਼ਾਂ- ਸੇਵਾਦਾਰ

ਜੰਮੂ- ਨਾਬਾਲਗ ਲੜਕੀ ਦੇ ਸਰੀਰਕ ਸ਼ੋਸ਼ਣ ਦੇ ਮਾਮਲੇ 'ਚ ਜੇਲ੍ਹ 'ਚ ਬੰਦ ਆਸਾਰਾਮ 'ਤੇ ਆਏ ਦਿਨ ਦੋਸ਼ ਤੇ ਦੋਸ਼ ਲੱਗ ਰਹੇ ਹਨ। ਹੁਣ ਆਸਾਰਾਮ 'ਤੇ ਦੋਸ਼ ਹਨ ਕਿ ਜੰਮੂ ਦੇ ਆਸ਼ਰਮ 'ਚ ਤਿੰਨ ਬੱਚਿਆਂ ਦੀਆਂ ਲਾਸ਼ਾਂ ਦਫਨ ਹਨ। ਆਸਾਰਾਮ 'ਤੇ ਇਸ ਦੋਸ਼ ਦਾ ਮਾਮਲਾ ਅਦਾਲਤ ਪਹੁੰਚ ਗਿਆ ਹੈ। ਉਥੋਂ ਦੀ ਅਦਾਲਤ ਨੇ ਮਾਮਲੇ ਦੀ ਸੁਣਵਾਈ ਕਰਦੇ ਹੋਏ ਪੁਲਿਸ ਨੂੰ ਆਸ਼ਰਮ ਦੀ ਜਾਂਚ ਕਰਨ ਦੇ ਆਦੇਸ਼ ਦਿੱਤੇ ਹਨ। ਡਾ. ਰਾਜ ਕੁਮਾਰ ਚੌਧਰੀ ਨੇ ਅਦਾਲਤ 'ਚ ਅਪੀਲ ਦਾਇਰ ਕਰਕੇ ਕਿਹਾ ਸੀ ਕਿ ਜੰਮੂ ਦੇ ਆਸ਼ਰਮ 'ਚ ਤਿੰਨ ਬੱਚਿਆਂ ਦੀਆਂ ਲਾਸ਼ਾਂ ਦਫਨ ਹਨ ਉਨ੍ਹਾਂ ਦੀ ਜਾਂਚ ਕਰਵਾਈ ਜਾਵੇ। 

ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਆਸਾਰਾਮ ਦੇ ਇਕ ਸਹਿਯੋਗੀ ਰਹਿ ਚੁੱਕੇ ਨੌਜਵਾਨ ਨੇ ਕਿਹਾ ਸੀ ਕਿ ਜਦੋਂ ਉਹ ਜੰਮੂ ਆਸ਼ਰਮ 'ਚ ਸੇਵਾਦਾਰ ਸੀ ਤਾਂ ਉਥੇ ਤਿੰਨ ਬੱਚਿਆਂ ਦੀ ਮੌਤ ਹੋਈ ਸੀ ਤੇ ਉਨ੍ਹਾਂ ਨੂੰ ਇਸੇ ਆਸ਼ਰਮ 'ਚ ਦਫਨਾ ਦਿੱਤਾ ਗਿਆ ਸੀ। ਆਸ਼ਰਮ 'ਚ ਸੇਵਾਦਾਰ ਰਹਿ ਚੁੱਕੇ ਭੋਲਾਨੰਦ ਨੇ ਦਾਅਵਾ ਕੀਤਾ ਸੀ ਕਿ ਉਹ ਉਸ ਜਗ੍ਹਾ ਨੂੰ ਅਜੇ ਵੀ ਪਹਿਚਾਣ ਸਕਦਾ ਹੈ ਜਿਥੇ ਉਨ੍ਹਾਂ ਬੱਚਿਆਂ ਦੀਆਂ ਲਾਸ਼ਾਂ ਨੂੰ ਦਫਨਾਇਆ ਗਿਆ ਸੀ। ਨਾਲ ਹੀ ਸੇਵਾਦਾਰ ਨੇ ਹੋਰ ਕਈ ਖੁਲਾਸੇ ਕਰਨ ਦੇ ਦਾਅਵੇ ਕੀਤੇ ਹਨ। ਸੇਵਾਦਾਰ ਦੇ ਇਨ੍ਹਾਂ ਦਾਅਵਿਆਂ ਨੂੰ ਆਧਾਰ ਬਣਾਉਂਦੇ ਹੋਏ ਚੌਧਰੀ ਨੇ ਅਦਾਲਤ 'ਚ ਅਪੀਲ ਕਰਕੇ ਜਾਂਚ ਕਰਨ ਦੀ ਮੰਗ ਕੀਤੀ ਹੈ। ਅਦਾਲਤ ਦੁਆਰਾ ਜੰਮੂ ਪੁਲਿਸ ਨੂੰ ਜਾਂਚ ਦੇ ਆਦੇਸ਼ ਦਿੱਤੇ ਜਾਣ ਤੋਂ ਬਾਅਦ ਜੰਮੂ ਪੁਲਿਸ ਨੇ ਕਿਹਾ ਹੈ ਕਿ ਉਹ ਜਲਦ ਹੀ ਆਸਾਰਾਮ ਤੋਂ ਇਸ ਬਾਰੇ 'ਚ ਪੁੱਛਗਿੱਛ ਕਰੇਗੀ।