ਸ਼ਰਮਾ, ਬਾਜਵਾ ਤੇ ਖਹਿਰਾ ਖ਼ਿਲਾਫ਼ ਅਸ਼ਟਾਮ ਚੋਰੀ ਦੇ ‘ਸਬੂਤ’ - ਤਹਿਸੀਲਦਾਰ

ਚੰਡੀਗੜ੍ਹ- ਪੰਜਾਬ ਦੇ ਮਾਲ ਵਿਭਾਗ ਨੇ ਸ਼੍ਰੋਮਣੀ ਅਕਾਲੀ ਦਲ ਦੇ ਖ਼ਜ਼ਾਨਚੀ ਤੇ ਮੁੱਖ ਸੰਸਦੀ ਸਕੱਤਰ ਐਨ. ਕੇ. ਸ਼ਰਮਾ ਅਤੇ ਕਾਂਗਰਸ ਆਗੂਆਂ ਫਤਹਿਜੰਗ ਸਿੰਘ ਬਾਜਵਾ ਤੇ ਸੁਖਪਾਲ ਸਿੰਘ ਖਹਿਰਾ ਨੂੰ ਸਟੈਂਪ ਡਿਊਟੀ ‘ਚੋਰੀ’ ਕਰਨ ਦਾ ਕਥਿਤ ਦੋਸ਼ੀ ਪਾਇਆ ਹੈ। ਸੂਤਰਾਂ ਮੁਤਾਬਕ ਡੇਰਾ ਬਸੀ ਅਤੇ ਮਾਜਰੀ ਦੇ ਤਹਿਸੀਲਦਾਰਾਂ ਵੱਲੋਂ ਡਿਪਟੀ ਕਮਿਸ਼ਨਰ ਮੁਹਾਲੀ ਨੂੰ ਭੇਜੀਆਂ ਮੁੱਢਲੀਆਂ ਰਿਪੋਰਟਾਂ ਵਿੱਚ ਕਿਹਾ  ਗਿਆ ਹੈ ਕਿ  ਸ਼ਰਮਾ ਦੀ ਕੰਪਨੀ ਨੇ 1.30 ਕਰੋੜ  ਰੁਪਏ , ਬਾਜਵਾ  ਨੇ 66 ਲੱਖ ਤੇ  ਖਹਿਰਾ ਨੇ 76 ਹਜ਼ਾਰ ਰੁਪਏ  ਅਸ਼ਟਾਮ ਘੱਟ ਲਗਾਏ ਹਨ। ਇਨ੍ਹਾਂ ਰਿਪੋਰਟਾਂ ਮੁਤਾਬਕ ਜ਼ਮੀਨਾਂ ਦੀਆਂ ਰਜਿਸਟਰੀਆਂ ਖੇਤੀਬਾੜੀ ਵਰਤੋਂ ਖਾਤਰ ਹੋਈਆਂ ਹਨ ਜਦੋਂਕਿ ਅਸਲੀਅਤ ਵਿੱਚ ਜ਼ਮੀਨ ਰਿਹਾਇਸ਼ੀ ਵਰਤੋਂ ਲਈ ਵਰਤੀ ਗਈ।

ਡਿਪਟੀ ਕਮਿਸ਼ਨਰ ਮੁਹਾਲੀ ਤੇਜਿੰਦਰ ਪਾਲ ਸਿੰਘ ਸਿੱਧੂ ਨੇ ਤਹਿਸੀਲਦਾਰਾਂ ਦੀਆਂ ਰਿਪੋਰਟਾਂ ਮਿਲਣ ਦੀ ਪੁਸ਼ਟੀ ਕਰਦਿਆਂ ਕਿਹਾ ‘‘ਮੈਂ ਅਧਿਕਾਰਤ ਤੌਰ ’ਤੇ ਰਿਪੋਰਟਾਂ ਬਾਰੇ ਕੁੱਝ ਨਹੀਂ ਕਹਿ ਸਕਦਾ, ਸੀਨੀਅਰ ਅਧਿਕਾਰੀ ਹੀ ਗੱਲ ਕਰ ਸਕਦੇ ਹਨ, ਮੁਕੰਮਲ ਰਿਪੋਰਟ ਵਿੱਤੀ ਕਮਿਸ਼ਨਰ ਮਾਲ ਨੂੰ ਕੁਝ ਦਿਨਾਂ ਤੱਕ ਭੇਜ ਦਿੱਤੀ ਜਾਵੇਗੀ।’’