ਦੁਨੀਆਂ ਭਰ 'ਚ 3 ਕਰੋੜ ਲੋਕ ਗੁਲਾਮਾਂ ਵਾਲੀ ਜ਼ਿੰਦਗੀ ਬਸਰ ਕਰਨ ਲਈ ਮਜ਼ਬੂਰ

ਸਰਵੇਖਣ ਅਨੁਸਾਰ ਇਨ੍ਹਾਂ ਵਿਚੋਂ ਲਗਭਗ ਅੱਧੇ ਭਾਰਤ ਵਿਚ ਰਹਿੰਦੇ ਹਨ

ਲੰਡਨ- ਦੁਨੀਆਂ ਭਰ ਵਿਚ ਲਗਭਗ 3 ਕਰੋੜ ਲੋਕ ਗੁਲਾਮਾਂ ਵਾਲੀ ਜ਼ਿੰਦਗੀ ਬਸਰ ਕਰਨ ਲਈ ਮਜ਼ਬੂਰ ਹਨ ਜਿੰਨਾਂ ਵਿਚੋਂ ਲਗਭਗ ਅੱਧੇ ਭਾਰਤ ਵਿਚ ਰਹਿੰਦੇ ਹਨ। ਇਨ੍ਹਾਂ ਵਿਚ ਜ਼ਿਆਦਾਤਰ ਮਰਦ, ਔਰਤਾਂ ਅਤੇ ਬੱਚੇ ਹਨ। ਇਸ ਸਬੰਧ ਵਿਚ ਜਾਰੀ ਕੌਮਾਂਤਰੀ ਸਰਵੇਖਣ ਰਿਪੋਰਟ ਅਨੁਸਾਰ ਇਸ ਮਾਨਵੀ-ਤਸਕਰੀ ਨੂੰ ਵਿਸ਼ੇਸ਼ ਗੈਂਗ ਵਰਗ ਵੱਲੋਂ ਨੇਪੜੇ ਚੜ੍ਹਾ ਕੇ ਇਨ੍ਹਾਂ ਕੋਲੋਂ ਦੇਹ-ਵਪਾਰ ਅਤੇ ਘੱਟ ਮਜ਼ਦੂਰੀ 'ਤੇ ਕਿਰਤ ਕਰਵਾਈ ਜਾਂਦੀ ਹੈ। ਐਂਟੀ ਸਲਾਵਰੀ ਚੈਰਿਟੀ ਵਾਕ ਫਰੀ ਫਾਊਂਡੇਸ਼ਨ ਵੱਲੋਂ ਕਰਵਾਏ ਸਰਵੇਖਣ ਅਨੁਸਾਰ 10 ਮੁਲਕਾਂ ਵਿਚ 76 ਫੀਸਦੀ ਲੋਕ (ਲਗਭਗ 2 ਕਰੋੜ 98 ਲੱਖ) ਗੁਲਾਮਾਂ ਵਾਲੀ ਜ਼ਿੰਦਗੀ ਬਸਰ ਕਰਨ ਲਈ ਮਜ਼ਬੂਰ ਹਨ। ਇਨ੍ਹਾਂ ਮੁਲਕਾਂ ਵਿਚ ਭਾਰਤ, ਚੀਨ, ਪਾਕਿਸਤਾਨ, ਨਾਈਜੀਰੀਆ, ਇਥੋਪੀਆ, ਰੂਸ, ਥਾਈਲੈਂਡ, ਕਾਂਗੋ, ਮਿਆਂਮਾਰ ਅਤੇ ਬੰਗਲਾਦੇਸ਼ ਸ਼ਾਮਿਲ ਹਨ। ਇਸ ਸਬੰਧੀ ਖੋਜ ਕਰਤਾ ਕੇਵਿਨ ਬੇਲਜ਼ ਨੇ ਦੱਸਿਆ ਕਿ ਇਸ ਸਰਵੇਖਣ ਨਾਲ ਸੁਚੇਤਤਾ ਆਵੇਗੀ ਅਤੇ ਸਰਕਾਰਾਂ ਇਸ ਪ੍ਰਤੀ ਸੁਚੇਤ ਹੋਣਗੀਆਂ।