‘‘ਕੀ ਉਹ ਹਜ਼ਾਰਾਂ ਸਿੱਖਾਂ ਦੀ ਹੱਤਿਆ ਬਾਅਦ ਗੁੱਸੇ ਹੋਇਆ ਸੀ, ਜਿਸ ਲਈ ਕਾਂਗਰਸੀ ਆਗੂ ਦੋਸ਼ੀ ਸਨ?’’ ਮੋਦੀ

ਝਾਂਸੀ (ਉੱਤਰ ਪ੍ਰਦੇਸ਼)- ਭਾਜਪਾ ਦੇ ਪ੍ਰਧਾਨ ਮੰਤਰੀ ਅਹੁਦੇ ਲਈ ਉਮੀਦਵਾਰ ਨਰੇਂਦਰ ਮੋਦੀ ਨੇ ਸਾਬਕਾ ਪ੍ਰਧਾਨ ਮੰਤਰੀ ਇੰਦਰਾ ਦੀ ਹੱਤਿਆ ਬਾਅਦ ਹਜ਼ਾਰਾਂ ਸਿੱਖਾਂ ਨੂੰ ਕਤਲ ਕੀਤੇ ਜਾਣ ਦਾ ਮੁੱਦਾ ਚੁੱਕਦਿਆਂ ਰਾਹੁਲ ਗਾਂਧੀ ਨੂੰ ਸਵਾਲ ਕੀਤਾ, ‘‘ਕੀ ਉਹ ਹਜ਼ਾਰਾਂ ਸਿੱਖਾਂ ਦੀ ਹੱਤਿਆ ਬਾਅਦ ਗੁੱਸੇ ਹੋਇਆ ਸੀ, ਜਿਸ ਲਈ ਕਾਂਗਰਸੀ ਆਗੂ ਦੋਸ਼ੀ ਸਨ?’’

ਮੋਦੀ ਨੇ ਰੈਲੀ ਦੌਰਾਨ ਕਿਹਾ, ‘‘ਮੈਂ ਸ਼ਹਿਜ਼ਾਦੇ (ਰਾਹੁਲ) ਦੇ ਚੁਰੂ (ਰਾਜਸਥਾਨ) ਵਿੱਚ ਦਿੱਤੇ ਬਿਆਨ ਬਾਰੇ ਸੁਣਿਆ ਸੀ। ਮੈਂ ਇਸ ਬਾਰੇ ਗੰਭੀਰ ਸਵਾਲ ਉਠਾਉਣੇ ਚਾਹੁੰਦਾ ਹਾਂ। ਉਸ ਨੇ ਕਿਹਾ ਸੀ ਕਿ ਉਸ ਦੀ ਦਾਦੀ ਦੀ ਹੱਤਿਆ ਬਾਅਦ ਉਹ ਬਹੁਤ ਗੁੱਸੇ ਵਿਚ ਸੀ। ਮੈਂ ਸ਼ਹਿਜ਼ਾਦੇ ਨੂੰ ਪੁੱਛਣਾ ਚਾਹੁੰਦਾ ਹਾਂ, ਕੀ ਸਾਰੇ ਕਾਂਗਰਸੀ ਗੁੱਸੇ ਵਿੱਚ ਸਨ? ਕੀ ਇਹ ਸੱਚ ਹੈ ਕਿ ਤੁਸੀਂ ਅਤੇ ਤੁਹਾਡੇ ਪਾਰਟੀ ਵਰਕਰਾਂ ਨੇ ਗੁੱਸੇ ਵਿੱਚ ਆ ਕੇ ਹਜ਼ਾਰਾਂ ਸਿੱਖਾਂ ਨੂੰ ਜਿਉਂਦੇ ਸਾੜ ਦਿੱਤਾ ਅਤੇ ਇਸ ਮਾਮਲੇ ’ਚ ਹਾਲੇ ਤਕ ਇਕ ਵੀ ਵਿਅਕਤੀ ਨੂੰ ਸਜ਼ਾ ਨਹੀਂ ਹੋਈ? ਮੈਂ ਤੁਹਾਡੇ ਗੁੱਸੇ ਨੂੰ ਸਮਝਦਾ ਹਾਂ ਪਰ ਕੀ ਤੁਸੀਂ ਹਜ਼ਾਰਾਂ ਸਿੱਖਾਂ ਦੀ ਹੱਤਿਆ ਬਾਅਦ ਗੁੱਸੇ ਹੋਏ ਸੀ।’’ 

ਮੋਦੀ ਨੇ ਦਾਅਵਾ ਕੀਤਾ ਕਿ ਲੋਕ ਸਭਾ ਚੋਣਾਂ ਨਜ਼ਦੀਕ ਆ ਰਹੀਆਂ ਹਨ ਅਤੇ ਰਾਹੁਲ ਗਾਂਧੀ ਪੁਰਾਣੇ ਜ਼ਖ਼ਮਾਂ ’ਤੇ ਨਮਕ ਛਿੜਕ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਜਿਹੜੇ ਵਿਅਕਤੀ ਵਿੱਚ ਮਨੁੱਖਤਾ ਬਚੀ ਹੈ, ਉਹ ਕਾਂਗਰਸ ਦੇ ਉਪ ਪ੍ਰਧਾਨ ਨੂੰ ਇਨ੍ਹਾਂ ਸ਼ਬਦਾਂ ਲਈ ਮੁਆਫ਼ ਨਹੀਂ ਕਰ ਸਕਦਾ।