ਊਨਾ-ਬਾਲੀਵੁੱਡ ਦੇ ਅਭਿਨੇਤਾ ਅਕਸ਼ੈ ਕੁਮਾਰ ਅਤੇ ਪੰਜਾਬੀ ਗਾਇਕ ਹਨੀ ਸਿੰਘ ‘ਪੰਜਾਬੀ ਬੋਲੀ’ ਨੂੰ ਬਦਨਾਮ ਕਰ ਰਹੇ ਹਨ। ਇਸ ਦੇ ਨਾਲ ਹੀ ਬਾਲੀਵੁੱਡ ਵਲੋਂ ਪੈਸੇ ਦੇ ਚੱਕਰ ‘ਚ ਪੰਜਾਬੀ ਗਾਇਕਾਂ ਨੂੰ ਤਰਜੀਹ ਦਿੱਤੀ ਜਾ ਰਹੀ ਹੈ, ਜਦੋਂ ਕਿ ਗਾਇਕੀ ਦੇ ਪੱਧਰ ਅਤੇ ਮੈਰਿਟ ਨੂੰ ਨਜ਼ਰ-ਅੰਦਾਜ਼ ਕੀਤਾ ਜਾ ਰਿਹਾ ਹੈ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਪੰਜਾਬ ਦੇ ਚਰਚਿਤ ਗਾਇਕ ਮਾਸਟਰ ਸਲੀਮ ਨੇ ਜਿੱਥੇ ਪੰਜਾਬੀ ਪੌਪ ਗਾਇਕ ਹਨੀ ਸਿੰਘ ‘ਤੇ ਨਿਸ਼ਾਨਾ ਸਾਧਿਆ, ਉੱਥੇ ਬਾਲੀਵੁੱਡ ਦੇ ਅਭਿਨੇਤਾ ਅਕਸ਼ੈ ਕੁਮਾਰ ਦੀ ਵੀ ਤਿੱਖੀ ਆਲੋਚਨਾ ਕੀਤੀ। ਹਿੰਦੀ ਅਤੇ ਪੰਜਾਬੀ ਦੀਆਂ ਕਈ ਫਿਲਮਾਂ ‘ਚ ਆਪਣੀ ਆਵਾਜ਼ ਦੇ ਚੁੱਕੇ ਅਤੇ ‘ਮਾਂ ਦਾ ਲਾਡਲਾ ਵਿਗੜ ਗਿਆ’ ਵਰਗੇ ਗੀਤ ਨਾਲ ਬੁਲੰਦੀਆਂ ‘ਤੇ ਪੁੱਜੇ ਸਲੀਮ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਅਕਸ਼ੈ ਕੁਮਾਰ ਅਤੇ ਹਨੀ ਸਿੰਘ ਪੰਜਾਬੀ ਭਾਸ਼ਾ ਨੂੰ ਬਦਨਾਮ ਕਰ ਰਹੇ ਹਨ। ਅਕਸ਼ੈ ਕੁਮਾਰ ਵਲੋਂ ਆਪਣੀ ਫਿਲਮ ‘ਚ ਹਨੀ ਸਿੰਘ ਦਾ ਗੀਤ ਸ਼ਾਮਲ ਕੀਤੇ ਜਾਣ ਨੂੰ ਲੈ ਕੇ ਸਲੀਮ ਨੇ ਕਿਹਾ ਕਿ ਇਹ ਅਕਸ਼ੈ ਲਈ ਸ਼ਰਮ ਵਾਲੀ ਗੱਲ ਹੈ। ਉਨ੍ਹਾਂ ਨੇ ਅਕਸ਼ੈ ਨੂੰ ਇਹ ਵੀ ਨਸੀਹਤ ਦਿੱਤੀ ਕਿ ਉਸ ਨੂੰ ਅਸ਼ਲੀਲਤਾ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ। 

ਪੰਜਾਬ ਦੇ ਸੂਫੀ ਗਾਇਕ ਪੂਰਨ ਸ਼ਾਹ ਕੋਟੀ ਦੇ ਬੇਟੇ ਮਾਸਟਰ ਸਲੀਮ ਨੇ ਕ੍ਰਿਕਟ ਦੇ ਧਨੰਤਰ ਸਚਿਨ ਤੇਂਦੁਲਕਰ, ਕਪਤਾਨ ਮਹਿੰਦਰ ਸਿੰਘ ਧੋਨੀ ਅਤੇ ਸਟਾਰ ਬੱਲੇਬਾਜ਼ ਯੁਵਰਾਜ ਸਿੰਘ ਨੂੰ ਆਪਣੀ ਗਾਇਕੀ ਦਾ ਫੈਨ ਦੱਸਿਆ। ਸਲੀਮ ਨੇ ਦਾਅਵਾ ਕੀਤਾ ਕਿ ਫੁਰਸਤ ਦੇ ਪਲਾਂ ‘ਚ ਇਹ ਸਾਰੇ ਕ੍ਰਿਕਟਰ ਉਸ ਦੇ ਗਾਣੇ ਸੁਣਦੇ ਹਨ।