'ਹਫਿੰਗਟਨ ਪੋਸਟ' ਨੇ ਸੋਨੀਆ ਦਾ ਨਾਂਅ ਅਮੀਰਾਂ ਦੀ ਸੂਚੀ 'ਚੋਂ ਹਟਾਇਆ

ਨਵੀਂ ਦਿੱਲੀ- ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੀ ਜਾਇਦਾਦ ਸਬੰਧੀ ਵੱਧ ਰਹੇ ਵਿਵਾਦ ਕਾਰਨ ਅਮਰੀਕੀ ਵੈਬਸਾਈਟ 'ਹਫਿੰਗਟਨ ਪੋਸਟ' ਨੇ ਦੁਨੀਆ ਦੇ ਸਭ ਤੋਂ ਅਮੀਰ ਨੇਤਾਵਾਂ ਦੀ ਸੂਚੀ ਵਿਚੋਂ ਸੋਨੀਆ ਗਾਂਧੀ ਦਾ ਨਾਂਅ ਹਟਾ ਲਿਆ ਹੈ | ਵੈਬਸਾਈਟ ਨੇ ਅਫਸੋਸ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਉਸ ਦੇ ਸੰਪਾਦਕ ਇਸ ਗੱਲ ਦੀ ਤਸਦੀਕ ਨਹੀਂ ਕਰ ਸਕੇ ਕਿ ਸੋਨੀਆ ਦੀ ਕੁੱਲ ਸੰਪਤੀ ਕਿੰਨੀ ਹੈ | ਵੈਬਸਾਈਟ ਨੇ ਇਕ ਸੰਪਾਦਕੀ ਲੇਖ ਵਿਚ ਕਿਹਾ ਹੈ ਕਿ ਸੋਨੀਆ ਗਾਂਧੀ ਦਾ ਨਾਂਅ ਇਕ ਹੋਰ ਵੈਬਸਾਈਟ ਦੀ ਸੂਚੀ ਦੇ ਆਧਾਰ 'ਤੇ ਸ਼ਾਮਿਲ ਕੀਤਾ ਗਿਆ ਸੀ ਜੋ ਕਿ ਹੁਣ ਹਟਾ ਦਿੱਤਾ ਗਿਆ ਹੈ | ਇਸ ਦੇ ਨਾਲ ਹੀ ਕਤਰ ਦੇ ਸਾਬਕਾ ਅਮੀਰ ਹਾਮਿਦ-ਬਿਨ-ਖ਼ਲੀਫ਼ਾ ਅਲ ਥਾਨੀ ਦਾ ਨਾਂਅ ਵੀ ਵੈਬਸਾਈਟ ਤੋਂ ਹਟਾ ਦਿੱਤਾ ਗਿਆ ਹੈ | ਵਰਣਨਯੋਗ ਹੈ ਕਿ ਕੱਲ੍ਹ ਵੈਬਸਾਈਟ 'ਤੇ ਇਕ ਰਿਪੋਰਟ ਵਿਚ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨੂੰ ਦੁਨੀਆ ਦੇ ਸਭ ਤੋਂ ਅਮੀਰ ਨੇਤਾਵਾਂ ਵਿਚੋਂ 12ਵੇਂ ਸਥਾਨ 'ਤੇ ਮਹਾਰਾਣੀ ਐਲਿਜ਼ਾਬੈਥ ਤੋਂ ਵੀ ਅਮੀਰ ਦੱਸਿਆ ਗਿਆ ਸੀ ਤੇ ਉਨ੍ਹਾਂ ਦੀ ਜਾਇਦਾਦ 2 ਅਰਬ ਡਾਲਰ ਦੱਸੀ ਗਈ ਸੀ |